1999-ку шинал август-сентябрь зурдардий Дагъусттаннал аьрщарайн ххявхсса къачагътал ххит бувну гьашину 25 шин хъанай дур. Вай иширттан хас дурсса мероприятиярттал лагрулий Дагъусттаннал Информациялул ва печатьрал агентствалул сакин дунни дяъвилул ишру най бивкIсса кIанттурдайнсса пресс-тур.
Журналистътуращал хьунабакьин оьвкунни ополчентурайнгу. Жул цалчинсса аьрххи ЦIуссалакрал райондалийсса ТIюхчардал шяравун багьунни. ДакIнин бутан, сентябрь зурул 5-нний ТIюхчардал шяраваллил зумакъирагърай аьс увссар виваллил аьралуннал 22-мур бригадалувасса ряха аьраличу: Василий Ташкин, Алексей Липатов, Алексей Полагаев, Борис Эрднеев, Владимир Кауфман, Алексей Паранин. Вай аьщун бивзсса кIанттай дацIан дурсса кIирагу гьайкалдануцI журналистурал тIутIив дирхьунни.
Тай ишру дакIнин бивчуна ополчентурал кьюкьраву бивкIсса Шамил Алхулаевлул ва Амир ГъалбацIовлул.
Та чIумал, цанна хъуннасса нигьачIаву дуна, Шамиллул лабивтун бивкIссар цала къатрал лувчIиннив оьруснал аьралитал ва жула милицанал зузалт. Яннагу даххана дан увну, хIухчу куна ризкьилущал ачин увну, ххассал увссар оьруснал фельдшер.
Шичча жу лавгру оьруснал саллатI кIучI увну ивкIсса Аьт1икат Табиевал къатри ккаккан.
Хъиривсса жул аьрххи бия ЦIуссалакрал шяравун. 1999-ку шинал сентябрь зуруй къачагътурайн данди бавцIуну жанну дуллусса виваллил иширттал органнал зузалтран шяраваллил майданнив дацIан дурсса гьайкалгу ххал дурну, жу бувкIру къизгъинсса талатавуртту най диркIсса «Телевышка» лахъазанттуйн. Шикку дацIан дурну дур тай талатавурттаву жанну дуллуминнал аьпа абад бувсса гьайкал. ДакIнин бутан, лахъазан дуручлай, къучагъшиврий жанну дуллусса Халид Мурачуевлун ва Мутай Исяевлун дуллуссар Аьрасатнал Вирттаврал цIарду. Пост бивкIсса кIанттурдай тIивтIуну бур Аьралуннал савлугърал музей. Шикку бур ЦIуссалакрал аьрщарай боевиктурайн данди бавцIуну жанну дуллусса вирттавран хас бувсса мурцIу. ЧIун-чIумуй музейраву хъуни классирттал оьрчIахь дишай Къучагъшиврул дарсру. Лахъазанттул цIаний най диркIсса талатавурттая бувсуна райондалул контрольно-счетная комиссиялул председатель Гайирбек Мусаевлул.
Хъунмасса барчаллагь дяъвилул ишру най бивкIсса кIанттурдайн жущал архIал бувкIсса Гайирбек Мусаевлуйн, райондалул администрациялул вакил Марат Хановлуйн, ТIюхчардал шяраваллил бакIчи Башир Алхулаевлуйн, райондалул Шяраваллил хозяйствалул управлениялул зузала НурмахIаммад НурмахIаммадовлуйн.
Андриана Аьбдуллаева
