Дагъусттаннал кIулшиву хьхьичIуннай даврил институтраву хьусса сессиялий гьуртту хьунни ЦIуссалакрал райондалул КIулшиву дулаврил управлениялул хъунмур Светлана Къудаева, ванил хъиривмур Аида Жиржисова, управлениялул хьхьичIунмур пишакар Ирина Мажидова.\

Сессиялул агьаммур мурад бия «Сферум» тIисса информациялул ва коммуникациялул платформа мюнпатну ва чялиш дуккан дурну зузи дуллансса ххуллу-чаранну лякъаву.
Шиккура кIицI ларгуна платформа зузи давриву хьунадакьлакьисса захIматшивурттугу. Цифралул журалий кIулшиву дулаврил ялув бацIаву дуллалисса пишакартурая сакин дурну дия 2 команда. Гьарца командалун багьлай бия «Сферум» платформа зузи дуллалийни дайшишру дуллалисса масъалартту аьлтту буван.
Сессиялий хIасиллу дурна республикалул муниципалитетирттал дянив баян бувсса интеллектуал тIуркIулул. Ванийгу ЦIуссалакрал райондалиясса командалул 2-мур кIану бувгьуна.
Имара Саидова