ЦIуссалакрал райондалий хIадур хъанай бур Дагъусттаннайн ярагъуннищалсса къачагътурал кьюкьри ххярххун 25 шин ва ЦIуссалакрал райондалул 80 шинал юбилей кIицI лаган.
Вай мероприятиярттавасса цаппара хьунтIиссар ЦIуминалийсса ЦIуссалакрал шяравун бухлахисса кIанай «Аьпалул багъраву». Вай гьантрай Аьпалул багърал ялтту буккан бувкIун бия ЦIуссалакрал райондалул хъунаманал 1-ма хъиривчу Султан Хамзаев ва райондалул хъунама архитектор Ц1аххай Базанов.
Аьпалул багъраву вайннал ххал бувна мероприятияртту дансса ва, бакьин бувну, цIу буккан бувансса кIанттурду. Му бакъассагу, личIи бувна ЦIуссалакрал райондалиясса СВО-лий жанну дуллусса аьралитурал цIарду чирчусса мемориал комплекс бансса кIанугу.
ДакIнин бутанну, Ххувшаврил байрандалул гьантрай ЦIуссалакрал шяравун бухлахисса кIанай тIивтIушиву Украиннал аьрщарай нанисса хасъсса аьралий операциялий жанну дуллусса вирттаврал аьпа абад баву мурадрайсса багъ.
Ванин итадаркьуну дур 1,5 гектар аьрщарал, шикку бувгьуну бур личIи-личIисса журалул 200 мурхь. «Аьпалул багърал» лагмара дацIан дурну дур цIакьсса чапар, инсантал заназисса кIанттурдай дирхьуну дур плитка, бувну бур беседка, лагма-ялтту бивхьуну бур скамейкартту.
— Махъсса ппурттуву инсантал чялишну гьуртту хъанай бур «Аьпалул багъ» тIисса щалагу Аьрасатнал лагрулийсса акциялувух. Укунсса давурттайну, жанну дуллуми дакIнин бичаву бакъассагу, жагьилтал Ватан ххирану тарбия баву, миннавун жула тарихрал ва культуралул ирс ябансса гъира бутаву ххи хъанахъиссар. Жула мурадгу ялун нанисса ник Ватан ххирану, иш багьний ва дуруччин хIадурну тарбия давур, – увкуна Султан Хамзаевлул.
