Вай гьантрай Ххутрал шяраву кIицI ларгунни Шяраваллил кьини.
– Ва байран дуллалийни хъунмур мурад буссия шяравун кIункIу дуван жулла хъирив нанисса ник, вайннан хъама­къабитаншиврул жула мархри, нахIала буваншиврул лакку билаятрал гьаварал. Жул умуд бур буттахъал миналия жула наслулул дакIурдиву личIанссар т1исса ярг­сса, тIааьнсса асарду, – тIий ур сакиншиндарал комитетрал вакил Ися Бархаев.
Байрандалул программалийн бувну, жяматрал хIатталлив кьул­гьу-къуръан бувккуна. Хъирив бия спортрал бяст-ччаллу: волейболданул, футболданул, ядро палцІ баврил, архъан кIункIу даврил, дучри ххяххан баврил. Турнирдай ххув хьуминнан дуллуна заварду, медальлу, бахшишру. Ссайгъатру хIадур бувну бия байрандалий гьуртту хьу­сса мюрщи оьрчIангу. Шиккува тIивтIуна авадансса ссуп­рагу.
Ххутрал жямат цачIун хьуну, бувну бия ттизаманнул шартIру дусса спортрал майдан. Ванил щях даркьуну дия стадионнай ишла дай­сса, ляличIисса, кIукIлусса къат. Шикку жагьи-жугьулт футболданий, волейболданий, теннисрай буклай бия. ТIивтIуну бия воркаут майдангу. Шяраву спорт ххираминнан вардиш хъанансса сант­ру щаллу дурну дия.
Шиккува кIицI буван, Ххутрал шяраву бувну бия цIусса ФАП. СПК-гу ччаннай дацIлай дия. Шяраваллил кьини дурк­сса харжлугъгу СПК-лул цийнна ларсун дия. Бяргу марцI бувну, гъаттара къабуххансса чапаргу дацIан дурну, магъи дусса къаттагу бувну, щаллу бувну бия агьали бигьалагансса кIану.
Ххутрал жяматрал Шяраваллил кьинирду гьар шинах дуллансса умуд бур.
Р. КЪАРДАШОВ