Экономикалул хавардал агентствалул баян бунни, Дагъусттаннал пляжирттайсса нюжмардийсса бигьалагаву Аьрасатнал цайми регионнайнияр ххирасса душиву. Аьрасатнаву дянивсса багьа бур 5000 къуруш ца кьини, Дагъусттаннайрив гъинтнил чIумал дацIлай дур 6000 къурушран.
Шиккува кIицI лаганна, Адлердай, масалдаран, 11 азарда къурушран ца кьини дацIлай душиву, Ялталий – 7-8 азарда къурушран.
Ккавкчув кIулчуври учару. ХIакьсса хIуччарду хьхьичIун ласурча, мяълум хьунтIиссар ссан ци дацIлацIиссарив, ссаву ци дуссарив. Редукторныйлив хьхьирил зуманицI яхъанай бунугу, ччанну атил буванмагу хьхьиричIан гъан къашара на. Хьхьирил гьавалия неъмат ласуннив ччан бикIай гьар шинах. Цамур билаятрайн, региондалийн гьансса гъирагу, цIакьгу бакъахьувкун, гьар шинах лагару жу Избербашрая арх дакъасса Рыбный поселокрайсса хьхьирил зуманийн бигьалаган. Ххюра зивулийсса патирхана бур шикку. Жу 2 къатта бусса квартира бугьарду. Патир учавугу къатIайлануккар, личIи-личIисса заллухъру бусса квартирарду бусса къатри дур, «Белый дом» тIисса цIанилусса. Жу ва кIану язи бугьаврил сававгу муя, таний, ва цуппалусса патир бакъа, лагма-ялтту цайми къатри къадикIайва. ЦIанакул лагма-ялтту цIусса къатри дур, дуллайгу бур. Ваниннин 5-6 шинал хьхьичI ца хьхьу-кьини 2 къатта бусса квартира бацIайва 3000-4000 къурушран. Шиная шинайн багьри гьаз хъанай, гьашину 7000 къурушран бия. Мяйжанссар, мудан бучIайсса хъамал хIисаврай, жун 1000 къурушрал кьюкьин бувна. Забронировать бувссия, 5000 къурушгу дуллуну, квартира февраль зуруйва! Ци иш багьарчагу, агар чIун чIирисса личIайхту, махъаллил хьурча лаякъатрая, 5000 къуруш махъуннай къадулайсса аьдат дия. Ттул видеортту, суратру ккарккун Телеграм-каналданий, бачIвасса квартира бурив цIуххакьай тIий, цIуххин лавгссияв заллухъруннахь. Октябрь барз къуртал хьуннин, царагу кьини бачIва бакъассар цавагу квартира увкуна. Ца зивулийсса, цIусса технологиярттал тIалавшиннардайн бувну дурсса къулайсса къатри гьантлун 15 азарда къурушран дия. Квартирардаву матахI, техника, тIахIни, гьарзат аьркинмур дур. Дукралуха зун къаччинан бур тиккува кафегу. Яла къулаймур ишрив пляж чIаравра, 100 шаттирал манзилданий душивур. Жу 4-мур зивулий буссияв. Букку балкондалийн, хьхьирийгу тамаша буллай, хIачIлачIу кофе-чяй. Яла къулай къабивзмур ва ххуллухь – аьлагъужа. ХьхьичI шиннардий, машинартту ва агьали чансса бушиврийн бувну, пахъдагьрулия неъмат ласайсса жун, гьурра-гьайталул, гьас-тIанкIлил чIурду ччай бакъая. ЦIан ларкьуннихха, ссувхIат байбишайва. Жагьилтуран дискотека ччай дурхха. Хаснува архсса регионная бувкIми чIявусса бухьувкун. Жул чIаххул, масалдаран, Новороссийскалия бувкIсса бия. ЛухIи хьхьири цачIава бунува, циван бувкIссарив къакIулли, цIуххингу ламус хьуна. ХIачIайсса щин ча ласайссар тIий цIуххин бувххуна жучIан. ХIачIайсса, дукра дайсса щин луртан дуванну жущалла ласун аьркинну бикIай. Ягу тиккура машан ласун. ЛичIину ххирану дакъая, 5 литIралул баклашка, шагьрулий 70 къурушран духьурча, тайнначIа 85 къурушран дия. Укуннасса тагьарданий чIиви ттучандалуву гьарзат дахлай дикIайва. Ттучандалул заллухъругу жухьхьун квартира буллусса агьлу бия. ХьхьичIва вай таксирдай лага-букIлан бикIайва ялтту буккан, аьркинмур диян дуван, утти кулпатраву сайки гьарманал цува заллусса машина бия. Гьаннайсса, иш бавчушиву аьлтта чIалай бия. Пляжрал ххуйшивумур – щингу марцIсса душиву, къунгу мюршну хIувусса, чартту хIала бакъасса бушиву. Ци аьламатрив къакIулли, бурган, ябитан, личIи бакъа жулва бакъухъ.
КIюрххил зунзулчаннахь хьхьирийсса щингу мукун лирцIуну, марцIну дикIайхха, хьхьирил чIангума чIалан дикIай. КарчI къадурну кIюрххил ччяни бизарча, хьхьири кIиххябуклай бувксса ххяххабургъил сурат ябатIин къашайсса дикIай. Хьхьири паракьатну бунува, кIюрххицIун чIявусса жагьилтал буккайва сапирттай гьузун. Лавхьхьунни «сап» ингилис мазрай «авцIуну гьузун» тIисса мяъналийсса бушиву. Буниялттунгу, жагьилтал хIарачатрай бия сапирттай бавцIуну, бакъагьанну чIатIа-ттархь хьхьиривун щилащи дурну гьузун. Лях-карах зизайва, шадсса чIурду буллай, къутри дуллан бикIайва. Ца ссятрайсса сапрал аренда дия 500 къурушран. Паракьатну гьузун хъанай бухьурча, ччиссаксса бия хьхьирил зуманицI машгьурсса аттракциондалий, «банандалий» лагма буккан ччиссагу. Экстримрал хъирив багьминнан банандалий цал лагма буккан багьа бия инсанная – 500 къуруш. МахIачкъалалив ххирассар тIий бия. Банандалий бурттий икIан къаччай, нигь дагьсса ухьурча, вайра 500 къуруш дулурча, лодкалуву къутI икIан итлай ия. Дучрай оьрчIру бурттий битлатисса бизнесгу дия, мотоциклетирттай бурттий бивтун ссур буллалиссагу. Вайннул багьригу — 300-500 къуруш. Гьар кьини оьрчIру бикIайва шавхьсса шагьнал лачIал оьрчилтту дахлай, майшан тIий занай, ца оьрчилу 100 къурушран. Вагу ххуйсса бизнес дия, 300 къурушран оьрчилттал килограмм духьувкун. Гъалгъа тIун гъирасса оьрчилтту даххул жухь бувсуна, цанна 12 шин душиву, компьютер машан ласунсса аьмал хьушиву, утти цIусса мобильник ласун датIлай ушиву, чанна-чанну гьантлун 100 оьрчилу даххайшиву, марцIсса доход 5000 къуруш шайшиву. Гьар кьини оьрчилтту ласун учIайну тIий, ванан 1 килограмм дулайсса дия 200 къурушран.
Гьаннайсса, бюхъу-хIарачат бума хIарачатрай ия арцу лякъин. Бивщунал бя, кьуркьунал тIама, учарухха. Сапирттайсса, бананнайсса дялахърурдугу хIисавравун ларсун, ахттайнссагу хIисав дурну, гьантлун 10 000 къуруш харж дуванну ухьурча бакъа, хьхьирийн бигьалаган буккан пайда бакъая.