Лакрал райондалул имам МухIаммад Майрановлул оьмралийнсса (чIивимур хIажлийнсса) путевка пишкаш дунни «Ислам в Лакии» порталданул администратор Арсланаьли Сулаймановлун. Ва лакрал миллатрал дянив дин цIакь шаврил ххуллийгу, лакку маз лахьхьаврил, яшаврил ххуллийгу хъуннасса даву дуллалисса, буттал улча дазу дакъа ххирасса, хIалимсса, хьхьичIун урувгсса жагьил ур.

Жу уттинингу бувсъссия, ва порталданул хIарачатрайну лакку маз лахьхьин ччиминнансса онлайн-курсру зузи бувну бушиву, вай курсирдая рязиссагу чIявусса бушиву. Дунияллул ччимур мурцIний, Ютуб каналданий ниттил мазрайсса дарсирдах вичIи дишин, урган бюхъаву хъунмасса тIайлабацIурхха. Цаймигу хайр-мюнпатрансса давуртту дуллай ур Арсланаьли паракьатну, иттав къаххяхлай.
– Ва бахшиш ттун хаварбакъулийсса хьунни. МухIаммадлул ттучIан, оьмралийн гьан ччисса мурад бурив тIий чивчуна. На ххаришиврул гьанавиххигума хьунав цахъис. Ва ттул цалчинсса аьрххир мубараксса аьрщарайнсса, жула МухIаммад ИдавсичIансса (с.аь.с.), Ин ша Аллагь, сентябрь зурул 18-нний жула имам МухIаммад Майрановлущал ххуллийн буккантIиссару, – увкуна Арсланаьлил.
Нагу ванахь бусав, тиха учIайхту, цалчинсса интервью ванаща ласунсса тамахI ттулва бушивугу, лакрал уссурваврал куннал кув гьаз буллалисса, чIарав бацIлацIисса тIуллу чIалай, ттулламур дакIгу ххари хъанай душивугу.