Уттигъанну бавунни Ялув ЧIатIлухъиял ва Ставрополлал крайрал ца райондалул командарттал дянив, СВО-лий гьуртту хьуну, аьпалул хьусса Жумааьли Керимовлул цIа абад даврин хас дурсса Футболданул турнир хьун най дур тIисса хавар. «Илчи» кказитрал редакциялий жу мунил хъирив бивзру, кIул хьунни Жумааьли Керимовлул ккаккан дурсса виричушиврия.

Абаттайл арс Жумааьли Керимов увну ур Ставрополлал крайрай, Труновскаллал райондалий, Донское тIисса шяраву.
Жумааьлил ппу Абаттай ва нину Гульнара Ялув ЧIатIлухъиял шяраватуссар. Вайннал кулпат хъатIи бувну махъ, ялапар хъанай, бивкIун бур Ставрополлал крайрай 35 шинал мутталий, тиккува увну ур Жумааьлигу.|

Школа къуртал бувну махъ, аьралуннаву къуллугъгу бувну, Жумааьли, контрактгу чирчуну, къуллугъ буллай ивкIссар Ставрополлал крайрай, Буденновск шагьрулий.
СВО-лий гьуртту хъанай ивкIссар аьралий операция байбивхьусса гьантрайва, Украиннал Николаевуллал областьрай. Контракт 2016 шинал къуртал хьунугу, Жумааьли талайна ивкIссар. 2022 шинал октябрьданул 6-нний вава Николаевуллал областьрайсса Снегирево шяраву жула къучагънал жан дуллуссар Ватандалул цIаний.
Аьрасатнал президентнал ХIукмулийну аьраличунал бурж биттур буллай ккаккан дурсса чувшиврухлу ва къучагъшиврухлу Абаттайл арс Жумааьли Керимовлун дуллуссар Чувшиврул орден (орден Мужества). Донское шяраву яла дязаннивмур кучалуву дацIан дурсса хъуннасса улттуй дур Жумааьлил сурат.
Ва ивк1уну шин ларгун махъ, 2023 шинал октябрьданий Труновскаллал райондалул хъун шяраву Донскоелий хьуну бур СВО-лул гьурттучи Жумааьли Керимовлул аьпалун хас бувсса райондалул даражалийсса Футболданул кубок. Ва цувагу оьрчIнияцIа машхул хъанай ивкIун ур футболданухун, уклай ивкIун ур Донскоеллал «Урожай» командалухлу.
Интернетрава ва иширая кIул шайхту, Ялув ЧIатIлухъиял администрациялул бакIчи Махсум Махсумовлул, телефондалувух оьвкуну Донскоеллал спортрал школалул тренер Роман МикаэльяннучIан, барчаллагь куну бур шяравучунал цIа абад дуллалисса даву даврихлу. Гьашину июньдалий администрациялул бакIчи ва школалул директор Серго Дамаданов ссайгъатирттащал лавгун бур Донскоелив турнир даврихлу барчаллагь учин. Вай ххарину кьамул бувну бур райондалул каялувчи Аникеева Нина Ивановнал. Хьунабакьаврий икьрал дурну дур уттигу дуван Жумааьли Керимовлул аьпалунсса ца турнир июльданул 18-нний Ялув ЧIатIлухъиял ва Донскоеллал командарттал дянив.
Тийх футболданухун машхул хъанай бур унгу-унгуну: тикку бур цалва стадион, шанна команда – оьрчIал, чIава жагьилтурал ва балугъравун бивминнал. Гьарца командалул ур цила тренер ва хъунама тренер.
Икьрал дурсса куццуй, Ялув Ч1ат1лухъиял шяраваллил бакIчи, школалул директор ва шяраваллил цаппара хъунисри гьурттусса делегация лавгун бур Донскоелив. Вай ххуйну хьунабавкьуну бур, кумаг бувну бур бацIансса кIану дузал буван.
Июльданул 18-нний хьуну бур тIуркIу Ялув ЧIатIлухъиял ва кIанттул командарттал дянив.
ТIуркIу байбишин хьхьичI хъамаллурахь ча бувкру тIисса аьла-ссаламрал махъ лавхъуна Труновскаллал райондалул Спорткомитетрал хъунама Денис Лосьлул, спортшколалул хъунама тренер Роман Микаэльяннул.

Жумааьлил буттауссу Валерий Сулаймановлул, махъ лахълай, куна: «Жул аьрххи-ххуллу ва шикку хьунтIисса футболданул тIуркIу хас буллалиссар Абаттайл арс Жумааьли Керимовлул цIа абад даврин. Ва тарбия увну ивкIссар ттаттахъал гьунардал эбратрай. Жумааьлил хъуна бутта Мяммал арс Жумааьли Керимов гьуртту хьуссар Буттал КIанттул цIанийсса Хъун дяъвилий, Ватандалул цIаний талай, га дяъвилул ахирданий ивну ивкIссар Германиянал вирдакIну хъанай бивкIсса рейхстаграйн. Дяъвилий ккаккан бувсса гьунардахлу Жумааьли Маммаевич лайкь хьуссар Славалул, ЯтIул Ттугълил (Красного Знамени) ва Хъун дяъвилул орденнан ва чIярусса цаймигу паччахIлугърал наградарттан.
ХIакьину жула виричу Жумааьли Керимовлулгу язи бувгьуссар цала хъуна буттал аьралий ххуллу, лайкьну бартбивгьуссар захIматсса спецоперациялул масъалартту.
Аьрасатнал Гимнрахун Жумааьлил буттал Абаттайл гьаз бувна Аьрасатнал ттугъ.
ТIуркIу къуртал хьуна 6:4 счет­­рай, кIанттул команда ххув хьуну. Счет мукунсса хьурчагу, тIуркIу хъинну тамашасса хьуна тIий бур Ялув ЧIатIлухъиял делегациялул вакилтал.
ТIуркIу къуртал хьувкун, циняв футболчитал ва хъамал бувкIун бур Жумааьлил бутта­хъаннин. Шикку аьдат-эбадатругу дурну, Абаттайл уссил Сайдуннул циняв бувцуну бур цаннийнма хъамалу.
Шаппай бачин хьхьичI кIан­ттул инсантурал махъ буллуну бур Жумааьлил аьпалунсса Футболданул кубок буллан гьар шинах. Ирглийсса кубок хьунтIий бур гьашину октябрьданий. Мунийн оьвчинтIий бур Ялув ЧIатIлухъиял командалийнгу.
Муния махъ Футболданул кубок буллан тIий бур Ялув ЧIатI­лухъиял шяраву.

ХIасан Аьдилов
PS. На барчаллагь тIий ура ва макьала чичин кумаг бувсса Байдуллагь Дамадановлухь.