Каримлул арс Жанаев Юрий
Вай гьантрай оьрмулул 72 шинаву жуятува личIи хьунни ГьунчIукьатIрал шяравасса Жанаев Юрий Каримлул арс.
Юрий хъанай ур хъинну машгьурсса, оьрмулуву хъунисса хьхьичIуннайшивуртту ларсъсса инсан. Ва ур Аьрасатнал ЗахIматрал Виричу (Герой Труда РФ). Жанаевлул дур генерал-майорнал чин.
ЗахIматрал ххуллу байбивхьуссар Каспийскалий, «Дагдизель» заводрай. Яла, къуртал бувну Ленинградуллал жамирду бай институтгу, Юрий зий уссия Южно-Уральск тIисса шагьрулий. Гичча ва увцуссар зун Аьрасатнал элмурдал хьхьичIунсса шагьрулийн – Обнинскалийн. Биялсса захIмат бивхьуссар Жанаевлул, Совет заманнай бикIу, махъсса чIумал бикIу, жулла паччахIлугърал кьуват лахъ буллай. Хаснува цалла кIулшивугу, хIарачатгу ккаккан бувссар ванал Чернобыллай авария хьусса чIумал. Жанаевлул захIматрангу, дурсса ккаккиярттангу хIукуматрал лахъсса кьимат бивщуссар. Аьрасатнал ЗахIматрал Виричунал цIа дакъассагу, ванан дуллуссар чIярусса цаймигу наградартту. Жанаев хъанахъиссар техникалул элмурдал кандидат.
Ванал давриву дакъассагу, ккалли дансса хьхьичIуннайшивуртту хьун дурссар спортравугу. Юрий хъанай ур боксрай уккаврил спортрал мастер, мадарасса бяст-ччаллаву хьхьичIунсса кIанттурду бувгьуссар. Цувагу уссия дакIнил уздансса, аьркиннан кумаг бан хIадурсса, цинявннанагу бусравсса инсан.
Каримлул арс Юрий жуятува лагаврил кьурчIишивугу кIидачIлай, жижара буллай буру цинявппагу ванал мачча-гъаннахь, чIаххув-чIарахнахь. Цал бунагьирттал аьпа баннав, гьав нурданул дуцIиннав, махънал оьрмурдай барачат бишиннав!
ГьунчIукьатIрал жяматрал цIания
Зиябуттин ХIажимирзаев
МАХIАММАДЛУЛ ДУШ МАХIАММАДОВА ЗУЛАЙХАТ
Уттигъанну хар-хавар бакъасса бивкIулул жуятува личIи бунни Шахьуйннал шяравасса ххаллилсса хъамитайпа МахIаммадова Зулайхат МахIаммадлул душ.
Бувссар Зулайхат 1939 шинал Шахьуйннал шяраву МахIаммадлул ва Шамалайл кулпатраву. Зулайхатлун кIира шин хьуну-къархьуну, ванил ппу лавгссар дяъвилийн, ятIа-тIар бакъа акъа хьуссар. Зулайхатлул бусса оьрмугу лавгссар буттая тIий, ванах аьтIий, цал ябитан хьурдай тIий.
Школалий дуклай бивкIссар Гъумук, детдомрай. Га чIумал ванищал архIал Гъумук бивкIссар жула цIанихсса балайчи Мариям хIаласса шахьуйннал цайми душругу. Дяъвилул ятинтураха хIукуматрал дуллалисса хъуннасса аякьалия тIийнма бикIайва Зулайхат. Школалия махъ Орджоникидзелий къуртал бувссар Машлул техникум. Цила шяравучу Аьбдуллагь МахIаммадовлун щар хьуну, лавгссар Полтава шагьрулийн. Махъату вайннал кулпат Къизлардай ялапар хъанай бивкIссар.
МахIачкъалалив бивзун, Зулайхат машлуцIун дархIусса давурттай зий бивкIссар МВД-лий, Обкомрай, Мединститутраву ва цаймигу кIанттурдай. Чув зурчангу, цилла даву дуллай бивкIссар узданну, аьй къадучIанну. ЧIярусса шиннардий бувсса захIматрахлу Зулайхат лайкь хьуссар личIи-личIисса бахшиширттан.
Мукьва оьрчI, багьайсса тарбиягу дуллуну, тIайла бувссар цалва-цалва оьрмулул ххуллурдайн.
Зулайхат бикIайва гъан-маччами, шяраваллил инсантал ххирасса, щин ци хъинбала буван хъинавав тIисса, дакIгу, кагу тIиртIусса инсан. Ванил оьрму та-бухьурчангу бигьасса къавхьуссар. ОьрчIшиву захIматсса дяъвилул шиннардийн тIайла дарцIусса, буттал лажин къаккарксса Зулайхатлун цIанасса аварасса заманнай ятIа-тIар бакъа акъа хьусса душнил ца акъа-акъасса арснал ялув вас-ццахлийсса цикссагу хьхьу-кьинирду дичлансса бувкссар. Ваная тIийнма, ванах ялугьлайнма оьрмулувагу лавгунни. Мукунна оьрмулул нязаннив бивкIусса душнил къумашивугу духIан багьссар ванин.
Зулайхатлун хъинну ххирассия «Илчи» кказитгу, бакIрая ччаннайн бияннин буккайссия, цавагу номер лях гьан къабивтун. Ванил бивкIулийну «Илчи» кказит дакIнийхтуну ххирасса буккултрал сияхIгу кутIа хьуссар.
Зулайхатлул бивкIулул кьурчIишивугу кIидачIлай, жижара буллай буру ванил душварахь Ларисахь ва Жариятлухь, арснахь ХIажимурадлухь, оьрчIал оьрчIахь, арснал щарнихь ва куявтурахь, уссурваврал оьрчIахь ва махъсса цинявппагу гъан-маччаминнахь.
Зулайхатлул рухI чаннаний, чурх куклуний хьуннав. Ванил рухI ххари дуллансса чIявусса ишру хъананнав агьлу-авладрай.
Шахьуйннал жямат
МахIмудхъал Мудуннул душ ХIамзаева Асли
ЗахIматсса цIуцIаврища ххассал къавхьуну, оьрмулул 66 шинаву жуятува личIи хьунни ЧIяйннал шяраватусса Мудуннул душ ХIамзаева Асли.
Асли бувну бур 1957-кусса шинал ЧIяйннал шяраву, Ккуллал райондалий цIа дурксса МахIмудов Мудуннул ва ПатIиматлул кулпатраву. ПатIимат (Патка) Ккуллал райондалий хьхьичIра-хьхьичI ларайсса кIулшиву ларсъсса оьрус мазрал ва литературалул учительницая. Ва оьрмулуву машан ласун къашайсса 3 зат дур: цIуллушиву, талихI, тIайлабацIу. ПатIиматлун 2 шин хьусса чIумал, оьрмулул 28 шинаву ахиратрал хьуссар ПаччахIлугърал Думалул (1914 ш.) депутатнал арснал душ, симандалулгу, дакIнилгу ххуйсса, ссурухIи куннасса ванил нину. Асли буттащал, кIилчинмур нинуну хьусса Халуннущал лавгссар Буйнакскалийн.
Буйнакскалий 4-мур школагу лавайсса кьиматирттай къуртал бувну, бувхссар Дагъусттаннал мединститутрал химиялул ва биологиялул факультетрайн. Ниттил гъилишиву ккаркнугу, ванин нинушиву дурссар Халуннул. Буттал Мудуннулгу, буттауссурваврал Аликлул ва ХIасан-ХIусайннулгу, вайннал кулпатирттал Паткал ва Асиятлулгу ванин захIматшиву ккаккан къадиртссар.
Институтраву дуклакисса 5-гу шинай ванилсса бувссар буттауссил ХIасан-ХIусайннул ва Асиятлул (аьпа баннав цал).
Къатлул хьуну махъ цила ласнащал ХIамзаев МахIаммадлущал жяматраву бусраврай оьрму бутлай бивкIссар, хъунигу бувну, щаллу бувссар арс ва душ. Асли архIал зий бивкIминнал дянивгу бусраврай буссия – МВД-лул детсадраву.
Ванил хIалал дурну дур МВД-лул, горОНО-рал, реском горисполкомрал хIурматрал грамотартту, барчаллагьрал чагъарду.
Вава оьрмулуву лас МахIаммадгу ахиратрал хьуну, оьрмулия личIину неъматгу къалавсун, лавгунни жуятува цинявннангу ххирасса Асли.
Асли аьпалухьхьун лагаврил пашманшиву кIидачIлай, дакIнийхтунусса жижара буллай буру оьрчIахь Акраматлухь, душнихь, уссурваврахь Бунияминнухь, Сабирдухь, ниттирссихь ПатIиматлухь, ссурахъаврахь, махъсса цинявппагу гъан-маччаминнахь.
Цил бунагьирттал аьпа баннав, рухI бигьаний дишиннав.
Алжаннул ххари баннав.
ЧIяйннал жямат
Рамазаннул арс Исмяев Исмяй
Уттигъанну оьрмулул 85 шинаву жуятува личIи хьунни ЧIяйннал шяравасса Рамазаннул арс Исмяев Исмяй.
Исмяй увну ур 1938-кусса шинал цIанихсса Исмяйхъал ва Багъатирхъал Рамазаннул ва Рабиятлул кулпатраву.
Ччяни ласгу ахиратрал хьуну, тай захIматсса шиннардий 22 шинавусса Рабиятлун канихьсса 2 оьрч1ащал цикссагу захIмат буллан багьну бур. Ссил оьрчIру, АхIма ва Исмяй, цала оьрчIруну хIисав буллай, ссил чIарав бавцIуну бур уссурвал Абумуслим ва Абусупиян ( аьпа баннав цал).
Исмяй чIивинийва захIмат ххирасса, гьарцаннан кумаг байсса, гъан-маччаминнан ххирасса, мукъуй цIу бусса оьрчI ивк1ссар.
ЧIяйннал школалий 7 классгу бувккуну, цала хъунама уссищал, АхIмащал, зун увхссар «Дагдизель» заводрайн. Шичча ва лавгссар армиялий къуллугъ бан. Зана хьуну махъгу кIура авссар тава «Дагдизель» заводрайн.
Цал слесарьну, яла бригадирну, яла 4-мур цехрал мастерну зий ванал дурссар сайки 50 шин.
Исмяй жяматийсса давурттавухгу хIала-гьурттушинна дуллай – заводрал профкомралгу, цехрал парторганизациялул комитетралгу членну уссия. Заводраву зий унува къуртал бувссар Буйнакскаллал кооператив техникум. Давривусса ккаккияртту хIисав дурну, ванан дуллуссар 1970-ку шинал «В. И. Лениннул 100 шин» медаль, Главкрая – ХIурматрал грамота, арцуйнусса бахшишру.
Исмяй ия хъинну дакIнил ххуйсса, инсантурал чIарав ацIан хIадурсса, гъан-маччами хъинну ххирасса, бусравсса инсан.
1984-ку шинал кIул бакъасса бала бивссар ванал ниттийн, оьрчIайн – ца нюжмардул мутталий ботулизмалул ливтIуссар жяматрал дакIурдива къабуккайсса Исмяйл нину Рабият, оьрчI, хъиривмур шинал — 2-ма оьрчI. Мукунсса мусиватгу бувхIуну, хъуна увну, къатлул ан бювхъуссар арс Рустам.
Исмяйл цIа бусраврай ва сийлий личIантIиссар тухумрал ва ЧIяйннал жяматрал дянив.
Исмяй аьпалул шаврил кьурчIишиву кIидачIлай, жижара буллай буру кулпатрахь ПатIиматлухь, арснахь Рустамлухь, арснал щарнихь Асиятлухь, уссихь АхIмахь, ссурвавран кIанайсса ссурахъаврахь Насибатлухь, Рукьижатлухь, Сагъиратлухь, ссурахъаврахь МахIаммадрашидлухь, Айдахь, щарнил ссурваврахь Муслиматлухь, Муъминатлухь, цинявппагу мачча-гъаннахь.
Цал бунагьирттал аьпа баннав, рухI бигьаний дишиннав, алжаннул ххари аннав, махънал оьрмурдай барачат бишиннав!
ЧIяйннал жямат
