АрвахIкьини, август зурул 7-нний, «Замана» кказитрал редакциялий хьунни Дагъусттаннал аьралий комиссариатрал Агьали аьралий къуллугърайн хIадур баврил отделданул хъунаманал хъиривчу, полковник Явнус Жамбалаевлул пресс-конференция.
Явнус Рамазанович ур аьралуннаву савсъсса, Авгъан дяъвилий, 1999-ку шиналсса дяъвилул иширттаву, Чачаннавусса, Таджикнавусса иширттаву, мукуна СВО-лий гьуртту хьусса, личIи-личIисса наградарттан лайкь хьусса аьраличу.
Гьашину 1999-ку шинал Дагъусттаннайн ххявхсса дунияллул террористал ххит бувну 25 шин бартлаглай дур. Аьраличунал цала ихтилатгу вай иширттая байбивхьуна. Явнус Жамбалаевлул бувсуна 1999-ку шинал ЦIумадиял, Бущихъиял, ЦIуссалакрал районнай хьусса иширттая.
– Совет Союз ппив шаву ттуршукулул геополитикалул катастрофа хьуссар. Билаятрал цашиву хIуркку дансса ишру хьуссар террористътурал интервенция ва хъиривсса хасавюртуллал капитуляция. ЗахIматсса тагьар хIасул хьуссар Дагъусттаннай.
1999-ку шинал на, Санкт-Петербургуллал Михайловско-артиллерийская академиягу къуртал бувну, отпускалий увкIун уссияв. Та ппурттуву Саид Амировлул сипталий Ватан дуруччин ччисса ополчентурая интербригадарду буллай бия, нагу мукунсса бригадалий каялувшиву дуллай уссияв. КIицI лаган, та чIумал интербригадарду сакин баврил хъуннасса хъар лархъссар, цамуния къатIурчагу, информациялул дяъвилуву. Цинявппагу ца хьуну, террористътурайн данди бавцIуну, жура ккаккан дурссар Дагъусттаннал халкьуннал цашиву, – увкуна Явнус Жамбалаевлул.
Ванал бувсуна дунияллул террористал Дагъусттаннайн ххяххан багьана хьусса иширттаягу. 1998-ку шинал Дагъусттаннайсса тагьар оьлухълан дикIайхту, террористътурал кьаст лархIушиву, му ишла дурну, Дагъусттан кIибищун бан. МуницIун най бивкIссар Къадардал даралувусса ишругу. Цаппарассаннал кьаст лархIуссар кIикку шариаьтрал республика дан.
Полковникнал бусласимунийн бувну, Дагъусттаннайсса иширттаву оьрмулуцIа хьуну ур 275 саллатI, щавурду дирну дур 970 инсаннайн. Тай иширттаву жула халкьуннал ккаккан бувссар аьралуннащал цачIу бушиву.
Явнус Рамазановичлул мукунма бувсуна хасъсса аьралий операция нанисса кIанттурдайсса тагьардания. Мобилизациялул хIакъиравусса журналистътурал суалданухьхьун жаваб дуллай, ванал бувчIин бувна мунин чара бакъашиву дакъашиву, хIакьинусса кьини контрактрай СВО-лийн наними биялсса бушиву. 2022-ку шинал сентябрь зуруй 300 инсан мобилизациялул хьуну ивкIхьурча, 2023-ку шинал мобилизация къадурнура 500-ннийн бивсса чиваркI бувкIун бур хасъсса аьралий операциялий гьурттушинна дан.
– Жунма ччикун, анаварсса бущилий къахъанай бухьурчагума цаппара ишру, му бувчIлачIисса зат бур. Жуйнма данди бавцIуну бур 54 билаят. 1200 километралия ливчусса кIанттурдай, Херсоннал областьрая байбивхьуну, Курскаллал областьрайн бияннин, най бур дяъвилул ишру. Ци чулийгу, жува хьхьичIунмай най буссару. Луганскаллал область щала тархъан дурссар, Херсонналсса – 80%, Донецкаллалсса – 80%. Мукунна Запорожскаллал область. Харьковрал областьрай тIивтIуссар «Север» группировка, – бувсуна Явнус Жамбалаевлул. Ванал кIицI лавгуна аьралуннаву къуллугъ бан бувцусса (срочная служба) жагьилтал хасъсса аьралий операция нанисса кIанттурдайн гьан къабайшиву.
Андриана Аьбдуллаева
