Июль зурул 25-нний МахIачкъалалив, Расул ХIамзатовлул цIанийсса Республикалул национал библиотекалуву, бусравсса хъамаллурайнгу оьвкуну, лахъа-хъунсса даражалий хьунни ДР-лул лайкь хьусса учитель Айгунов МахIаммад Ризауттиновичлул луттирал презентация. Ччясса оьрмулуву дунияллия лавгсса буттал аьпа абад баву мурадрайсса кроссвордирттал сборник итабакьин кабакьу бувну бия ванал арс Аьвдулкарин Айгуновлул. Мажлисгу хьунни ванал сипталийн бувну.

Ва кьинисса бусравсса хъамаллуравух бия Москавуллал Соборный мизитрал имам АхIмад-хIажи Залихаев, ДГПУ-рал технологиялул ва экономикалул факультетрал декан ХIусайн МахIаммадов, Аьра­сатнал Виричу НурмахIаммад ХIажимахIаммадовлул ппу Энгельс ХIажимахIаммадов, ге­нерал-майор Муслим Даххаев, МахIачкъала шагьрулул Мажлисрал депутатътурал председатель Марис Илиясов, МахIачкъала шагьрулул 25-мур школалул директор Асват Кьурбановна ва цаймигу.

Мажлисрал гьурттучитурахь, буттал аьпа абад баву мурадрай ххаллилсса давуртту дачин дурсса Аьвдулкарин Айгуновлухь барчаллагь тIутIисса, видеообращениялийхчIинсса ихтилат бувна Архсса Баргъбуккавал билаят ва Арктика хьхьичIунмай бавриха зузисса министрнал цалчинма хъиривчу ХIажимахIаммад ХIусайновлул.
Шиккува бусанну, уттигъаннугу Аьвдулкариннул цала бу­ттал аьпалун хас дурсса ххаллилсса Спортрал турнир дуршиву.

МахIаммад Ризауттинович чIярусса шиннардий ­уссия Бабаюртуллал райондалийсса Сангардал дянивмур даражалул школалий директорну. Ва ия бюхъу-бажар бусса, цала даву кIанийн дуртун дуван кIулсса, учительтурайгу, дуклаки оьрчIайгу дакI аьтIутIисса инсан. Ванал каялувшиву дуллалисса ппурттуву Сангардал школа буссия республикалул хьхьичIунсса школардал сияхIраву. Кроссвордру сакин баву бия МахIаммадлул хобби. Ванал сакин бувну бур 200-нния ливчусса кроссвордру. Буттал захIмат бакIуйн буккан баву мурадрай, ванал хIасул бувсса кроссвордругу цачIун бувну, Аьвдулкариннул итабавкьуна ххаллилсса сборник. Вай луттирдугу бавчIуна ванал презентациялийн бувкIсса хъамаллурайх ва шагьрулул школардал библиотекарттайх.

АьвдулкариннучIа буттал дустурал чулухунмайсса хIурмат лавайсса бушиву исват хъанай бия мажлисрайн бувкIсса хъамаллурал ихтилатирттайн бувну.
Мероприятиялий цалчин ихтилат бувна Аьвдулкарин дуклай ивк1сса факультетрал декан ХIусайн МахIаммадовлул:
– Аьвдулкарин кунмасса студентътурал декан нава ивк1шиврия мудангу пахрулий икIара. Ва ия дуккавривугу, спортравугу итххявхсса, бюхъу-бажар бусса студент. Ва кунма хьхьичIун ливчусса бия ванал ссу Эльвира Айгуновагу. Ва ур дусшиву дуруччин, хъуниминнал хIурмат буван кIулсса хасиятрал инсан. Вуз къуртал бувну махъгу, ванал цурда-ца байран лях гьан къаритай цала преподавательтурах къулагъас къадурсса, – увкуна ванал.
Оьрмулул угьара хьусса, 29 шинай ДГПУ-рал факультетрал деканну зузисса ХIусайн Мусаевичлухь барчаллагь тIий, ванан дакIний личIансса бахшишгу дурна Аьвдулкарин Айгуновлул.

Хъирив ихтилат бувна Энгельс ХIажимахIаммадовлул:
– МахIаммадлул аькьилшиврия, ванал бусраврай бувтсса оьр­мулия чIявусса бавссар. ХIакьину шикку буллалисса ихтилатирттайнугу бувчIунни уздансса, ххаллилсса инсан ивкIшиву Аьвдукариннул ппу. Цува куна тарбия увну ур ванал цала арсгу. Нитти-буттал мурад оьрчIру лайкьсса тарбиягу дуллуну, оьрмулул ххуллийн тIайла бацIан бавур. Ва чулуха Аьвдулкариннул буттаща бювхъуну бур ххаллилсса арс тарбия уван, – увкуна ванал.
– ХIакьину на гъирарай увкIра цIанихсса аьлимчунал, ххаллил­сса инсаннал аьпа абад баву мурадрайсса мероприятиялий гьуртту хьун. Цинявннан хIисав хьухьунссар, Аьвдулкариннул гьарца шинал, чIявусса бусравсса хъамаллурайнгу оьвкуну, цала буттал аьпа абад баврин хас дурсса спортрал турнирду тIайла дуккайшиву. Ванийну, ялун нанисса никиран бакъассагу, жунма цинявннангу ванал исват бунни нитти-буттал чулухунмайсса хIурмат-кьимат цукунсса бикIан аьркинссарив. Хъунисса къуллугъирттай зузи­сса инсантал бикIай, мажал ба­къашиврул, нитти-буттах дагьай­сса аякьа дан къархьунни тIий, хIайп тIутIисса. Ци къуллугърай зий цува ухьурчангу, нину-ппу хьхьичIунну бикIан аьркиншиву жунма цинявннан ккаккан буллай ур Аьвдулкарин.
Спортраву личIи-личIисса хьхьичIуннайшивуртту ларсъсса, цIанихсса спортсмен акъассагу, Аьвдулкарин ур мюхтажнан кумаг бан, чIарав ацIан хIадурсса инсангу.
Мажлисрай жува цачIун буван савав хьусса кроссвордирттал сборник итабакьавугу хъуннасса агьамшиву дусса давур, – увкуна Муслим Даххаевлул.
Марис Илиясовлул кIицI лавгуна, буттал аьпа абад баврин хас дурсса даврил тасттикь буллалишиву кулпатрал ирс цIакьну ябуллай бушиву.
– ХIакьину жунма ххуйну чIалай бур инсан дунияллия лавгун махъгу ванал аьпа абад баву мурадрай чIявусса цIанихсса чемпионталгу, бусравсса хъамалгу цачIун батIин бюхъайшиву. Аьвдулкариннул чIарав мудангу бу­ссар цува кунма чумартсса, дугърисса инсантал. Шиккун бувкIсса, махъ нанисса, хьхьичIунсса инсантурайнугу чIалай бур ва аьчух­сса, дустуран ххирасса инсан ушиву. Барчаллагь, Аьвдулкарин, гихуннайгу бусравсса давуртту дуллансса каши-кьудрат дулуннав вихьхьун, – увкуна ванал.
Лакрал муфтийтурал советрал председатель МухIаммад Майрановлул барчаллагь увкуна буттал цIа марцIну дуручлачи­сса арснахь.
– Аьпалул хьусса буттал ва оьрмулул дугьара хьусса ниттил ПатIиматлул хIурмат буниялагу лавайсса бур АьвдулкариннучIа. Нинугу ванал ссахкIуй мюхтаж хьун къариртун, хъатлия хъатлийн дутлай ядуллай ур, – увкуна ванал.
Ва мероприятиялул асар биян бувсса цинявппагу гьурттучитал бия: «Аьвдулкариннул нитти-буттал чулухуннайсса ургаврил яхIливун бивчунну, шичча буккайхту, мугьлат бакъа жула нитти-буттайн оьвчинну»,– тIий.
Ахирданий Аьвдулкариннул барчаллагь увкуна цала оьр­мулуву агьамшиву дусса мероприятиялий гьуртту хьун ва чIарав бацIан бувкIсса цинявппагу инсантурахь.

Имара Саидова