ХIакьинусса кьини жула билаятрай хъанахъисса иширттаву агьаммур дур хасъсса аьралий операциялул тема. ЦIуссалакрал райондалия тамансса жагьилтал бур чIярусса шиннардий оьбалартту бухIлай бивкIсса агьали неонацизмалия мурахас буллай. Ва ххуллухь на бусан ччай бура хасъсса аьралий операциялий гьуртту хъанахъисса ДучIиннал шяравасса сержант Муса Аьзиевлуя.

Оьрмулул 58 шинавусса Мусал, хушрай лавгун, чирчуну дур СВО-лий гьуртту хьунсса контракт. Ваниннингу, ларгсса шинал, командировкалий ивкIун ур Луганскаллал Халкьуннал Республикалий. ВСУ-рал лекьа-пIякьу бувсса шагьрурдал ва шяраваллал инфраструктура цIу дуккан даву мурадрай, «Мосгаз» АО-лул тIайла бувксса пишакартурал бригадалувух Мусагу ивкIун ур. Та ппурттуву ванан асар хьуну бур тайннал инсантурачIа ххишала бакъа хIурмат-кьиматрайсса, къучагъну аьралий бигарду бартбигьлагьисса, агьали неонацизмалуцIа мурахас буллалисса жула жагьилтал. Ватандалул мурадру хьхьичI ххуттай бивхьусса жагьилтурал гъира бувтун, цIунилгу СВО-лийн занахьунсса пикри бувну бур Мусал.
Июль зурул 1-нний хIукму бувну бур Муса Аьзиев автомобильный взводрал шоферну итан­сса. Майкоп шагьрулия лавгун ур ва хасъсса аьралий операциялий гьуртту хъанан.
Шиккува кIицI лаган, къа­чIявусса бухьунссар ванал оьрмулувусса, тийх хъанахъимургу ккавксса, цивппа рязину хасъсса аьралий операциялий гьуртту хьун гьан ччисса инсантал.
ИчIува Мусах ялугьлай бур кулпат ва кIива оьрчI. Ци бан­ссия, вайннангу рязи хьун багьну бур, хасъсса аьралий операциялий ххувшаву ласун, цува хIакьсса патриот ушиву ккаккан буваву мурадрай аьралий политикалул ххуллу язи бувгьуну бувсса х1укмулущал.
ЧIа учинну жула виричувнан, ччясса мутталий ххувшавугу ларсун, цIуллу-сагъну цала ужагърайн занашаву.

Имара Саидовал