«Лица патриотов» тIисса проектрал лагрулий МахIачкъала шагьрулул Мажлисрал депутатътал Эльмира Абиева, Тимур Аьлиев, Рашидбаг Оздемиров ва Белла Багъдуева бивунни СВО-лий къучагъну жан дуллусса Вагьаб Багьауттиновлул кулпат МайсаратлучIан.
Ванил хъамаллурахь бувсуна, цила ласнал аьпалун хас бувну, аьралитуран янна дурухлахисса «Zов героев» тIисса цех тIивтIуну бушиву. Ва цехраву Майсарат бур аьралитуран гъилисса гъухъри, ссурссу ларкьусса, дахьра ца лажин чIалачIисса куклусса кьяпри ва спальный мешокру бурухлай.
ЦичIанма бувкIсса хъамаллурангу ванил ккаккан бувна аьралитуран янна дурухлахисса цех. Майсарат цуппагу цIанихсса модельер-конструктор бур. Цуппагу хасъсса аьралий операция байбивхьуния шийнмай ласнал цинма пиш-каш бувсса янна дуруххай машиналий аьралитуран янна дурухлай бур. ЦIана ванил цех гьарта-гьарза хьуну бур. Утти Майсаратлун аьралитуран янна дурухлан кумаг буллай бур чIаххув-чIаравми ва мачча-гъанми.
Майсарат, цуппа ттучаннайх лавгун, чурххан тIааьнсса, кIукIлусса яннарду дурчIуну, бурухлай бур аьралитуран гьухъри. Гьухъри буруххансса янна машан ласун ванин кумаг буллай бур хасъсса аьралий операциялий аьпалул хьусса аьралитурал ниттихъул ва кулпатру. Аьралитуран янна дурухлахисса акциярттал хъунмур харжлугъ дуккан дуллай, мудан чIарав ацIлай ур ванил ласнал уссу Халимбаг Багьауттиновгу.
Депутатътурангу Майсаратлул ккаккан дурна СВО-лийн тIайла дуккан хIадур дурсса янналул партия.
– ХIакьинусса кьини цума-цагу инсаннаща цащава шайсса кумаг бан бюхъайссар жула аьралитуран. Цинявннан хIисав шайхьунссар хасъсса аьралий операциялий гьуртту хъанахъисса аьралитуран чялишну кумаг буллай, чIарав бацIлацIисса чIявусса душру-хъами. Майсарат Багьауттиновагу миннавасса хIакьсса патриот бур. ЧIалай дур ванил дуллалисса давуртту аьралитураха аякьалийсса ва дакIнийхтунусса душиву. Майсарат буниялагу бур вирттаврал кунна кьянкьасса дакIгу, чумартсса тIуллугу дусса хъамитайпа. Лайкьсса тарбия дуллай, патриот зумуну хъуни буллай бур цила арс ва душгу, – увкуна Эльмира Абиевал.
Депутатътурал Майсаратлул захIматран лайкьсса кьимат бишлай, буллуна ванин «За патриотизм и активную гражданскую позицию» тIисса Барчаллагьрал чагъар ва аьралитуран гьухъри буруххансса янна машан ласунсса арцугу.
