Ккуллал райондалул администрациялул къатраву хьунни мусил медальлай школа къуртал бувсса выпускниктал барча буллалисса мажлис.

Гьашину райондалий мусил медальлай школа къуртал бувну бур Ккуллал 2-мур школалул выпускница Сиянат АхIмадовал ва Ваччиял школалул выпускница Айша Уцумиевал.
Вай барча бувна райондалул бакIчинал бигарду чIумуйну биттур буллалисса Ажуб ХIусмановлул.
– Ххирасса оьрчIрув, школалий дуклакисса шиннардий зу ккаккан бунни дуккавриву итххявхсса, яхI-къирият дусса, хъунанал хIурмат бусса, ххуйну тарбия бувсса оьрчIру бушиву. ДакIнийхтуну барчаллагь учин ччай ура марцIсса ххювардай дуклай бивкIсса выпускниктурахь ва, вайннан кIулшиву дуллай, хъунмасса захIмат бивхьусса учительтурахь. Школалия лавгун махъсса оьрмулуву зун хьунадакьлантIиссар захIматшивуртту. На мукIруну ура, захIматшивурттал хьхьичI ник къарирщуну, райондалулгу, республикалулгу цIа лайкьну дуруччинтIишиврий, – увкуна ванал.
Выпускниктурахь тIайлабацIу тIутIисса ва насихIатру буллали­сса ихтилатру бувна Райондалул кIулшиву дулаврил управлениялул хъунаманал хъиривмур Аминат Къянчиевал, нитти-буттал ва директортурал.
Оьрч1ал барчаллагь увкуна цахьра дарсру дихьлай бивкIсса учительтурахь ва гьарца ишираву мудан чIарав бивкIсса нитти-буттахь.