Июльданул 26-нний, Дагъусттан Республикалул Конституциялул Кьини, Региондалул бакIчи Сергей Меликовлул дуллунни паччахIлугърал наградартту. Вай дуллуминнавух бур чIявусса оьрчI-бакI бусса нину-ппу, духтуртал, учительтал, промышленниктал, аьралитал, культуралул зузалт ва цаймигу.

БавтIми барча бувну махъ Сергей Меликовлул куна: – 30 шинал хьхьичI Гьанумур закондалул баян бувссар яла лавайми даражалул ххазинарттуну хъанай бушиву дагъусттанлувтурал ихтиярду ва тархъаншиву, ккаккан дурссар жула республикалул ттизаманнул диц-куц, Аьрасатнал Федерациялул цасса ихтиярдащалсса субъект хIисаврай. Жунна дакIнийссар та чIумал региондалий диркIсса захIматсса чIун, вара тагьар дия щала билаятрайгу. Амма хъамабитан къааьркинссар цамургу: 30 шинал хьхьичI Конституциялуха зий бивкIминнал жула ялун нанисса никирттахь дирхьуну диркIшиву цашиврул ва лагма лагаврил агьамсса дарс.
ХIакьинусса кьинигу яла агьаммур правалул документ дагъусттанлувтураха къуллугърай бур, циняв архIалшиврул ва тIайлашиврул, дакьаврил ва рязишиврул, патриотшиврул принципру исват буллай.
ХIакьинугу билаятрал тарихраву дахханашивуртту хъанахъисса чIун дуркIун дур. Кьини дурксса чIумал хIасул шайссар дагъусттанлувтурал язими хасиятру: чувшиву ва аьзизсса улклуйн дакI тIайлашиву, бурж бартбигьаврийн хиянат къашаву, кумагран бучIан хIадурну бушиву.
Хасъсса дяъвилул операция нанисса ишираву Дагъусттаннал аьралитурал лайкьну бартбигьлай бур цалва хьхьичIсса масъалартту, национал мурадру буручлай. Жула11 ватанлув лайкь хьуну ур «Аьрасатнал Виричу» тIисса бюхттулсса цIанин, 100-хъул лайкь хьунни «Чувшиврул ордендалун» ва цаймигу наградарттан. Цуксса хIайпнугу, ца­ппарассаннан наградартту дуллунни Ватандалул цIаний жанну кьурван дурну махъ. Вай оьр­мулува лавгссар вирттал кунма, хIучI къакуну, махъунмай къавхьуну. Вайннал цIарду даиман личIантIиссар Аьрасатнал дяъвилий бюхттулсса цIардан лайкь хьуминнал сияхIравух, – куна Сергей Меликовлул.
Республикалул бакIчинал цалчинмур награда дуллуна Каспийскалиясса, 10 оьрчI-бакI тарбия буллалисса ниттин, Написат Камилован.
– Ина вила эбратрайну чIалачIи буллай бура кулпатирттал ххазинарду, оьрчIан лахьхьин буллай бура захIмат ххирашиву ва хъуниминнал хIурмат буллан аьркиншиву. Барча т1ий ура вихь «Мать — героиня» цIа дулаву, ва ина лайкь дурсса наградар. ЧIа тIий ура вил кулпатран цIуллушиву ва узданшиву, – куна бакIчинал.
Сергей Меликовлул барчаллагь куна учительтурахь, педогогтурахь, наставниктурахь.
«Дагъусттаннал лайкь хьусса учитель» тIисса удостоверение Сергей Меликовлул дуллуна Уркарахуллал многопрофиль гимназиялул учитель Раисат Аьбдуллаеван ва Новопоселокрал школалул учитель Нисейхалум Амаханован.
Шиккура кIицI дурна медициналул зузалтрал хьхьичIунсса давурттугу. Республикалул каялувчинал канива наградартту ларсуна медициналул зузалтрал – Гюлнара Яраьлиевал, Асият ХIасановал, Абусупиян МахIаммадовлул, ПатIимат Гихаловал ва цайминналгу.
Дагъусттаннал полицейский Надир Оьмаровлун Сергей Меликовлул дуллуна Чувшиврул орден.
– Надир Оьмаровлул июньдалул 23-нний террорчитурал хьхьичIалу кьуркьуссар, цайнна захIматсса щаву дирну дунугу. Чувшиврухлу, къучагъшиврухлу ва цала къуллугърайн дакI тIайлашиврухлу Аьрасатнал Федерациялул президентнал Надирдун дуллуссар Чувшиврул орден,– куна Республикалул бакIчинал.
Наградартту дуллуна, дагъусттанлувтуран дакъасса, цайминнангу.
Сергей Меликовлул оьвкуну, республикалийн увкIуна майор Денис Диденко. Ванал билаятрал президентнащалсса хьунабакьаврий бувсун бивкIссар Да­гъусттаннал аьраличу МахIаммад Исабековлул гьунардануя ва паччахIлугърал бакIчинахь тавакъю бувну бия ванан Аьрасатнал Виричунал цIа дулун. Сергей Меликовлул майорнан дуллуна ДР-лул БакIчинал цIа чирчусса ссят. Мукуннасса ссятру дуллуна связист Валентин Петровлун ва пулеметчик Владимир Семеновлун. Вайннал цайнна нигьачIаву дусса тагьардануву ххассал увну ивкIссар захIматсса щаву дирсса дагъусттанлув ХIажимурад Казанбиев.
Наградарттан лайкь хьуна республикалул журналистъталгу.
«ДР-лул лайкь хьусса журналист» цIа дуллуна «Известия» МИЦ- рал корреспондент Мурад МахIаммадовлун, НТВ-лул корреспондент Оьмар МахIаммадовлун, МахIачкъалаливсса ВГТРК-лул корпунктрал хъунама Саркар МахIаммадовлун.
Республикалул каялувчинал наградартту дулаврил церемония къуртал дурна Владимир Путиннул мукъурттийну: «Дакъассар агьалинан дулун шайсса награда, амма гьаман вайннал виричушиву Ватандалул ва ванил мурадирттал лагма лагаву – жула ххувшавурттал гьанур».
ХIадур бувссар ХI.Аьдиловлул