Августрал 18-нний МахIачкъалалив хьунтIиссар «Атлетика забег – 2024» полумарафон. «Дагестан» РИА-лий хьусса пресс-конференциялий бувсунни ванил сакиншинначитал Сяид Жяъпаровлул ва Алексей Долгихлул. Вайннал тIимунийну, полумарафондалул ххуллу хьунтIий бур шагьрулул туристътурал кIанттурдайх. Шикку бикIан тIий бур чIявусса хъамалгу.

Полумарафондалул дайдихьу ва дайлитIу хьунтIиссар МахIачкъалаллал хъунмур майданнив.
Хъунмур ххуллул лечаврил манзил бикIантIиссар 21,1 километра. Амма гьурттучитураща бюхъантIиссар язи бугьан ванияр кутIами ххуллурдугу – 10-15 километралул манзиллу.
– Жу цинявннайн оьвтIий буру мероприятиялий гьуртту хьун. Иширайну ва хъанахъи­ссар лечаврил фестиваль, ва хьун аьркинссар кулпатру гьурттусса лечаврил шадлугъ, Кулпатрал шингу духьувкун. Мунияту оьрчI-бакI лечинтIиссар ца километралий, ваний бучIиссар лечин оьрчIащал нитти-буттангу. 5 километра – вагу любительтурал ххуллур. Спортрал манзил байбихьлахьиссар 10 километралия. Ваний лечин аьркинссар хIадур хьусса, спортрахун машхул хъанахъисса инсантал, – куна Долгихлул.
Цалчин ххуллийн буккан­тIиссар лечаврил опыт бусса гьурттучитал – 7 ссятраву. Вайннал хъирив 7ссят ва 10 минутIраву буккантIиссар яла мюрщими гьурттучитал – 1 километралул ххуллий. 10 километралул ххуллий лечинтIиссар гьурттучитал – 7 ссят ва 40 минутIраву. Махъва- махъ лечинтIиссар 5 километралийсса манзил язи бувгьуми.
Ххуллул манзилданий сакин бувну бикIантIиссар за дукайсса ва щин хIачIайсса кIанттурду. Гьарца гьурттучинан дулунтIиссар медаль.
ХIасан Аьдилов