Дагъусттаннал гуманитар институтраву хьунни зунттал душварал лаххиялун хас бувсса «Одежда горянки» тIисса ккуркки стол.
Мероприятиялул дайдихьу дуллалисса махъ лахълай, ректор НухIкьади БахIмудкьадиевлул увкуна: «Жува ихтиярдал билаятрай яхъанай буру. Жунна дин дуван къадагъа дуллалисса акъар. МуницIухва жува, Аьрасатнал ялапарлувтал хIисаврай, цIакь дурсса законну кьамул дуллан аьркинссару. Цуксса хIайпнугу, жува бардултру, динийсса кьиматрайсса ххазинарду цалва мурадру дузрайн буккан буван ишла буллай бушиврул, жагьилтурай къия хъанай душиврул». Спикертурал балжину бувсуна Дагъусттаннал хъаннил лаххия ци журалул диркIссарив, бувсуна никаб ва хиджабру республикалул культуралул бутIувун дагьлай дусса-дакъасса. РАН-далул ДФИЦ — рал тарихрал, археологиялул ва этнографиялул институтрал хъунама элмийсса зузала, тарихрал элмурдал кандидат Майсарат Мусаевал дагъусттаннал миллатрал лаххиялул хIакъираву мяълумну бувсуна: «Зунттал душварал лаххия районнал, хIатта шяраваллалгума личIи-личIисса диркIссар. Лаххия – хъамитайпалул паспорт куннасса зат диркIссар, лаххиялийну бувчIайсса бивкIссар хъамитайпа цумур шяравассарив. БакIрайн дутаймур, чIюлушиннарду личIи-личIисса дикIан бюхъайссар, амма гъухъри, хIажакру, карщив чара бакъа чурх кIучI буллалисса диркIссар. Никаб ва паранжа къалаххайсса диркIссар дагъусттаннал хъаннил, ми къакъулайсса дунутIий. Ми лаххайсса диркIссар Дарбантлив яхъанахъисса цаппара парснал душварал, ми душру цивппагу сайки кьатIу-шавгу къабуккайсса, лявкIуну яхъанахъисса бивкIссар», – увкуна ванил.
Исламрал элмурдал магистр Манар Умм аль-Гьудал бувсуна бусурманнал аьдатрайсса хиджабрая, хIакьсса мяъна-мурадрая ва хъамитайпалул занакьулушиннарая: «Хиджабрал хъамитайпа чил ярунная буручлачиссар, гьаз буллалиссар. Жул хиджаб ялув духIлансса мурадгу бакъар, так бувчIуну ччай бур, бусурман душнин цилла ххуйшиву кIучI дуваву цукун агьамссарив. ХIакьсса хиджаб –мучIал парча бакъарча, хъамитайпалул дакIри, къабучIимуния махъаллил хьусса, Аллагьнал чулиннай тIиртIусса». Тарихийсса хъиривлаявуртту дуллалисса центрданул зузала Саида МахIаммадовал ккаккан дурна суратирттай Дагъусттаннал хъаннил XIX-мур аьсрулул ахирданий ва XX-мур аьсрулул дайдихьулий цукунсса лаххия диркIссарив. Исламрал элмурдал доктор МухIаммад Урминскийл, 4-гу мазгьабрайн бувну дурчIин дурна никабрал мяъна, бувсуна никабирттайн чIумуйнусса къадагъа дуваврий аьй-бювкьу дуллан къабучIишиву.
ПатIимат Рамазанова
