Вай гьантрай Хасавюртуллал азарханалийн ттула иширай бувкIсса ппурттуву, ца лахIзалий бувхссияв Кулпатирттал цIуллушиву дуруччаврил центрданул отделениялул хъунама хIакин Зайнуллагь Мирзоевлущал маслихIат ккаккан. Муданна кунна, ва кьинигу ванал кабинетрал нузру дия тIиртIуну. На ялун бивра, азарханалул каялувчитал, медиктал ва ванал дустал лагма лавгун, 70 шинал юбилей Зайнуллагь Нуруллагьовичлухь барча дуллалисса кIанттайн.
Бусравсса хIакин барча ан бувкIун бия, лакрал бакъассагу, личIи-личIисса миллатирттал чIявусса инсантал. ЦIуллушиву дуруччавриву бивхьусса захIматрахлу дуллуна ванан Аьрасатнал ва Дагъусттаннал ЦIуллушиву дуруччаврил министерствардал, ДР-лул медициналул зузалтрал профсоюзрал чулухасса ХIурматрал грамотартту.
Хасавюрт шагьрулийсса Кулпатирттал цIуллушиву дуруччаврил центрданул гьану бивзсса, ДР-лул лайкь хьусса хIакин, Дагъусттаннал Халкьуннал Мажлисрал кIира созыврал депутат, ДР-лул Жяматийсса палаталучIасса ЦIуллушиву дуруччаврил комитетрал эксперт, ЦIуссалакрал райондалийсса «Возрождение Родины» тIисса ихIсандалул фондрал каялувчи Зайнуллагь Мирзоев къакIулсса нажагьсса бухьунссар. Хасавюртлив ва цинявннан кIулссар дежурный хIакинну ва ххассал бувуну. ЧIири-хъунсса цIунцIия хьусса инсантал кумаграл хъирив левчунма бучIайссар ваначIан. Халкьуннан кIулссар Зайнуллагь Мирзоев, дакI хъуншиву къадурну, цачIанма бувкIсса цинявппагу къашайшалтран аьркинсса медициналул кумаг буван х1адурсса ушиву.
ДР-лул лайкь хьусса хIакин, Зайнуллагьлул ппу Нуруллагь Мирзоевлулгу, ЦIуссалакрал райондалул азарханалий хъунама хIакинну зий, бусраврай цала цIа кьариртссар инсантурал дянив. Дагъусттаннал Госсоветрал Указрайн бувну ЦIуссалакрал райондалул азарханалун МахIаммадлул арс Нуруллагь Мирзоевлул цIа дирзссар.
ЧIяву баннав укунсса лак жула дянив!
ХIурмат бусса Зайнуллагь Нуруллагьович!
Ина увсса кьини барча тIий, чIа тIий буру вин цIуллушиву, бигьа-рахIатсса, винма ххираминналгу, инава ххираминналгу вив лавсъсса лахъисса оьрму. Ина мукуна, бивзний ша бакьлай, бувсний махъ бацIлай, личIаннав!
ЦIуссалакрал райондалул ва Хасавюрт шагьрулул
агьалинал цIания Заграулла Ибрагьимова
