КIул бакъа бала ялун къабияннав. Бала шанай лякъиннав. Каши хъуннасса Аллагьнал буруччиннав бала-апатIраща. Вай ва цаймигу калимартту, дуаьрду чIяруну дуккай оьрмулул хъунисса инсантурал зумату. Гьамин, укунсса дуаь, укунсса махъру Аллагьнал кьамул бувну, цалва бувсса хъинбаларду хьхьичIун багьну, хъунмасса балаллуща ххассал хьунни ва ларгсса нюжмаркьини, июльданул 12-нний, Лакрал райондалийсса КIундиннал шяравусса Малик ва Жанна МахIаммадовхъал кулпат. Ва кьини кIюрххила вайннал къатравун, 300-хъул метрардал лахъшиврия ккуру лавгун, ххявххунни 30-нния лирчусса тоннарду кIушиврул дусса къаттаксса кьун.
Къатрал магъуй хъунма вяр­чIугу бувтун, гихунмайгу ккуру бивхьусса кьунттул ларзу ласун дурну дур. Къатрал чIирттугу кув левкьун, кув хъякрурду дагьну, къатри цIу лаган дуван жапа хьунсса куццуй зия дурну дур.
Вай къатри дурну хьуну дур 30-ксса шинну, шиву Маликлул нину-ппу ялапар хъанай бивкIссар. Кулпатрал хьуну махъ шиву цачIу оьрму бутлай Маликлул ва Жаннал хьуну дур 20 шин. Ва кьинигу шаппа бивкIссар Маликгу, Жаннагу, шагьрулия бувкIсса арсругу. Вайннал кулпат мудангу ларзулун ссупралухун батIайсса бивкIссар. Ва кьинигу вай, чансса ччяни шания бивзния, кьун ххявхсса ларзулун бавтIунъя бикIантIисса. ХIаятраву му-та дуллалисса Маликлунгу, шанава чантIа тIисса махъминнангу хьумур къабувчIуссар, къатрал махъсса гургулул чIугу ци чIурив, кьун ялун бивну махъгу хъанахъимур цирив, зарзаларив дагьсса, цири хьусса…
МахIачкъалалия Гъумукунсса аьраххуллийх нанисса чIумал, ВицIхъиял дарагу кьадиртун, лавай най, БахIикIуллал шяраваллил лув бивсса чIумал, кияхунмай лавай бургарча, чIалантIиссар КIундиннал шяраваллил ялувсса кьанив дацIан дурсса «Мегафон» связьрал вышка. Ванил луватур кьунгу ккуру лавгсса, нани ххуллий тий-ший цияра кьатIа тIисса хъунисса ва мюрщисса ххялчIивгу кьадитлай. Цахъис яларайну кIиккура чIалантIиссар, хаснура хьхьурай, чани лавхъсса чIумал, цаппарасса къатригу. КIайннувасса царайннувунни кьунгу ххявхсса.
Лахъния ялавай ккуру нанисса кьунттул траекториялух бурувгун, кьун най бивкIун бур тIайланма Маликлул ва Жаннал арсру шанашимур къатлул ялун. Къатрал ялун бияйхту, цукуннив мунил цилва ххуллу баххана бувну, кIура бавну бур кияхунмай – ва ппурттуву цучIав къаивкIсса ларзулун. Ларзнил чIаравсса къатлувусса Жаннал ялунгу, чердакрайсса му-та дагьарча дакъа, кIусса цичIар дагьну дакъар. Ва ливчIун бур магъуя дагьсса фанералух. Яла арсурваврал буккан бувантIиссар хьумур къабувчIлачIисса, ццаххандарал хьусса Жанна къатлул чIавахьулттивух. Маликрив, кьун къатлуйн щусса ппурттувусса гужирал щатIул личин увну, лихха-личчагу хьуну, ахъуву лякъинтIиссар.
Шикку, гьай-гьай, къатрая тIунсса ливчIун бакъар, бюхттулсса каши цахь дусса Аллагьнал цIимилийну щинчIав цичIав хьуну бакъар.
– Малик шяраву дуллалисса гьарцагу давривух хIала уххайсса инсанни. Мизитравусса тIий, ххуллу бакьин буллалисса тIий, ччими давурттацIун дархIусса царагу субботник ванал лях гьан къаритайссар, цалва кьай духхай машиналий уссар цаятувассагу, машиналияссагу кумаг аьркинний. Цалва бувмур чирину бавцIухьунссар ва ишираву. Малик кунмасса инсантурайри шяравалу дарцIунугу дусса. Ва укунсса уну тIий, цIана ванан кумаг буванмигу чIявусса бур. Кумагрив чара бакъа аьркинни ва кулпатран. «Инсан» фондрал Лакрал райондалийсса отделениялул баян бувунни ва кулпатран кумагрансса арцу датIлатIишиву. Вайннал дуллалимур даву дакъа, шяраваллил инсантуралгу цащава шайсса кумаг бувантIиссар, – тIий ур шяравучу Низами Умаров.
– Малик ва Жанна ттул чIа­ххулли. Вайннал къатрал ялун къаттаксса кьун багьну, къатта ххябуккан бувсса, цалва яруннин къаккавкманан тагьар, сурат дурчIинну буслай бусан къахьунсса иш хьунни. Яраппий, я Аллагь, бала-апатI щинчIав къахьуннав, шайсса ххуллийгу, инсаннан зарал къавхьусса, зарал хъуслин хьунсса хьуннав. Хъунмасса захIмат бувну дурсса къатри дунугу, вания тихуннайгу цIуну къатри дуллай захIмат хьун най бунугу, вай цимурца, цIуллушиву духьурча, дуван шай­ссар. Гьарцаннахьхьун цIуллушиву дулуннав, – тIий бур ХIалимат Юсупова.
Мяйжаннугу, инсан цува ухьурча, инсаннал цIуллу-сагъшиву духьурча, къатригу дуван, цамургу дуван хьунтIиссар. Циняв цачIун хьурчаннив, дуван къашайсса даву дакъассар. Жура дуллумурди, жува бувмурди жущалвагу, жучIавагу личIайсса, кьинирдал ца кьини вана ва куццуй бала-апатIрал хьхьичI барунугу бацIайсса. Цаманан кумагран Аллагьнал ххуллий харж дурсса хъус-кьинилийри барачатгу бусса.
Балики ка-кумаг буван ччисса ухьурчан, дуллай буру «Инсан» ихIсандалул фондрал Лакрал райондалийсса отделениялул реквизитру:
2202 2061 8124 5296 – банкирал карта.
Ягу: карта дархIусса телефондалул номер: 8967-934-22-15 (Оксана Исрапиловнал цIа дуккантIиссар).
Бадрижамал Аьлиева