«Единая Россия» партиялул халкьуннал программа кIантту-кIанттурдай щурущи даврил ялув бацIаву мурадрай, Лакрал райондалул десант ялтту бувккунни Гъумук цIуну буллалисса садикрал.
Ваний гьуртту хьуна Лакрал райондалул бакIчи, «Единая Россия» партиялул кIанттул отделениялул секретарь Юсуп МахIаммадов, ванал хъиривчу, партиялул жямат кьамул баврил каялувчи Явсупи ХIамзаев, партиялул кIанттул отделениялул биттуршиндарал секретарь Асият АьбдурахIманова.
Республикалул инвестицион программалийхчин райондалий дурну къуртал хьуну дур ттизаманнул тIалавшиннардацIун даркьусса, шартIру къулайсса, мюхчан дурсса кIира зивулийсса къатри.
Детсадрал цIусса къатраву зун тIий бур пищеблок, медкабинет, физкультуралул ва музыкалул дарсирдансса заллу, оьрчIру школалийн хIадур баврин аьркинмунил лащу-щаллусса хасъсса кабинетру, логопедический ва методический классру, лифтру. Детсадрал къатри тIитIин дакIний бур гьашину сентябрьданий.
– Проектрайн бувну, цIусса къатраву дузал дурну дур оьрчIал мюхчаншиву дуруччинсса ва оьрчIру итххяххан баврин къулайсса шартIру. Уттинин дурну къуртал хьуну дур гьарцагу даву, ливчIун бур так лифтру итабакьин, чани левшсса чIумал зунсса генератор бишин ва техника зузи дуван, – увкуна Юсуп МахIаммадовлул.
Бакьин буллай бур Буршайнсса ххуллу
ДР-лул Транспортрал ва ххуллул хозяйствалул министерствалул паччахIлугърал программалул лагрулий, Лакрал райондалий бакьин буллай бур Гъумуча Буршайн нанисса ххуллул манзил. Ва бур республикалул агьамшиву дусса «Мамраш – Чарил ламу–ГьаракIуннал ламу» ххуллийн буклакисса, кIанттул агьамшиву дусса, райондалул шяраваллурду райцентрдануцIун дахIлахIисса ххуллу.
Уттинин бакьин бувссар Ххюлусмав бияннинсса ацIния цара километралийхсса ххуллул манзил. Реконструкциялул лагрулий ккаккан бувну бур, ххуллу утта бувну, гьану цIакь бан, зунххидикIрурду кьаралданийн дуцин, щин экьидачинсса турбарду буцин, ламу бан, ххуллийн ххюл бичин. Дан ккаккан дурну дур ххуллул мюхчашиву дуруччинсса давурттугу: ххуллул лишанну дишин, нигьачIисса кIанттурдай дацIан дуван лишанну, ххяли лекьан кунмасса кIанттурдай дуван бетондалул дайгьузанну.
ЦIанасса чIумал объектрай най дур аьрщарал давуртту, архIалва буллай бур ламу. УрчIра километралийхсса ххуллул бутIа бакьин бувну къуртал хьун тIий бур гьашину сентябрьданул ахирданийннин.
Зулайхат Тахакьаева
