Дагъусттаннал Национал музейраву

Жулла республикалул магьирлугърал ва маданиятрал идарартту хьхьичIунсса гьурттушинна дуллай бур Кулпатрал шинацIун дархIуну ттигъанну зий дайдирхьусса щалагу Аьрасатнал «Большие семейные выходные» проектравух. Ванил лагрулийсса цалчинсса шадлугъру хьунни вай ларгсса бигьалагай кьинирдай.
Дагъусттаннал Аь. Тахо-Годил цIанийсса Национал музейраву ххарину хьунабакьлай бия цалчинсса хъамал. Вай бучIаннин тIурча, хIадур дурну дия хIазсса ва мюнпатсса программа: халкьуннал аслийсса канил пишардал мюрщи оьрчIансса ва оьрмулул хъуниминнансса мастер-классру, ссавнилусса читальный зал, халкьуннал культуралиясса, багьу-бизулиясса лекциярду, викторинарду ва м.ц.
Национал музейрал зузала ПатIимат Дибировал бувккусса «Дагъусттаннал халкьуннал керамика» тIисса лекциялува биялну кIул хьуна жулла республикалул халкьуннал канил пишардал центрдая, шикку дуллалимуния, канил пишардал тарихрая.
ОьрчIан ва кьини яла хIаз бия «Дагъусттаннал тIабиаьт» тIисса залдануву. Бакьин бувсса, цIу лаган бувсса залдануву ттизаманнул кьяйдардай оьрчIал ххал бувуна жулла республикалул вацIраву ва зунттаву ялапар хъанахъисса жанаварт, бувккуна интерактив тIуркIурдай.
Музейрал хIаятраву хьуна Арт-вечеринка ва личIи-личIисса мастер-классру. Керамикалул художник ва педагог, Кьукуннал шяравасса Муслим Хавчаевлул ккаккан бувна оьрчIан синааьрщарая цуку-цукунсса караматру дуван шайссарив, усттарнал магьирсса карунниву аьрщи цимигу куццирайн-журалийн дучIайшиву.
Ва кьини музейравун бувкI­­миннан буттал улча, ванил культура, багьу-бизу кIул-къакIулшиврийн дагьайсса викторина дурна «Ватан» тIисса Мемориал комплексрал хъунама ХIамзат Оьмаровлул.
Национал музейрал директор Пахруттин МахIаммадовлул бавтIминнан кIул увна Дагъусттаннал инсантурал ккалдануву шанма миллион дузал бувсса (трехмиллионный житель) АьлихIажи ХIажиев, 2015-ку шинал увсса.
Ва кьини шикку хъанахъисса чIярусса мероприятиярттавух бия назмурду дуккаврил бяст-ччал, буттал улклуясса луттирдал выставка, читальный зал, С. Стальскийн 155 шин шаврин хас дурсса фотовыставка.
ДакIнин бутан, ва журалул шадлугъру Национал музейраву гъилахъаннин дикIантIиссар гьарца бигьалагай кьинирдай.

Поэзиялул театрдануву

«Большие семейные выходные» проектрал лагрулий шикку хьунни «Театральная суббота в Доме поэзии» цIанилусса литературалул ккалаккавуртту.
Вай дайдихьлай, Поэзиялул театрданул директор Елена Гьаруновал бувсуна ва проектрал лагрулий гьарца ххуллункьини дуллантIишиву республикалул театрдугу гьурттусса, оьрус мазрайсса ва Дагъусттаннал халкьуннал мазурдийсса шадлугъру. Бувсуна проектрал дайдихьу Поэзиялул театрданул дуршиву Серебряный векрал шаэртурал (Анна Ахматовал, Николай Гумилевлул, Осип Мандельштамлул) произведениярттацIунсса программалийну. Гихуннайми шадлугъру дуллантIишиву Яруссаннал, Лакрал, Даргиял, Оьруснал, Къумукьнал театрдал ва Ссихьрал театрданул.
Ва нюжмардиймур ххуллункьини (17:00 ссятраву) Поэзиялул ТIивтIу майданнив буккантIиссар ХI. ЦIадассал цIанийсса Яруссаннал музыкалул ва драмалул театрданул артистътал.

Изобразительный искусствардал музейраву

«Большие семейные выходные» марафондалувух П.С. ХIамзатовал цIа­нийсса Дагъусттаннал Изобразительный искусствардал музей гьуртту хьуна «Музей выходит в город» тIисса акциялийну. МахIачкъалаллал шагьрулул багъравун бухлахисса кIанай («Весна» кафелучIа) тIиртIуну дия музейрал арт-пространство.
Шикку ДМИИ-рал элмий­сса зузала, художник-график Жаннат ХIажиевал каялувшиндаралу хъанай бия оьрчIру ва вайннал нину-ппу гьуртту хъанахъисса «Нарисуй Дагестан» цIанилусса мастер-класс. Дахьва цалчин пилча, кьалан, фломастер, краскарду канил дургьуми ва сурат дишаврил сянат аьдатсса пишану хьуми оьрчIру ва нину-ппу дихьлай бия аьзизсса Дагъусттаннал зунттурдал, хьхьирил, щархъал ва шагьрурдал суратру.
Шадлугъирттавух гьурттусса оьрмулул хъуниминнал ва мюрщиминнал дуртсса ххай бура ва кьини цалла яла хъинми бигьалагай кьинирдал ххуржинттавун.
Ва журалул шадлугъру хъа­нантIиссар гьарца ххуллункьини 16:00 ссятрава 19:00 ссятравун дияннин.
Бадрижамал Аьлиева