Медициналул ххуллий бихьлахьисса захIматрахлу ва хасъсса аьралий операциялий щавурду дирминнан буллалисса кумаграхлу Грамоталун лайкь хьунни Аьрасатнал Обороналул министерствалул хасъсса санэпиднадзорданул Агьаммур центрданул фельдшер-лаборант Ххадижат ЦIаххаева.
Медициналул зузалал пиша мудангу ца яла бусравмур бур. Ци дур инсаннан цIуллу-сагъшиврияр аьркинсса. Агьалинал цIуллу-сагъшиврул къаралданий бавцIуми лайкьри ччимур барчаллагьран ва бахшишран. Хъиннува бусрав хьунни жунма хIакинталгу, чIивимур медперсоналгу хасъсса аьралий операция байбивхьуну махъ. Тай иширттаву захIматсса щавурду дирсса аьралитал бивкIулул ххяппурттаща зехлай, вайннал реабилитация дуллай хIакьину хъинну хъуннасса хъар лархъун бур жула медициналул зузалт. Мукунминнавасса ца бур Ххадижат КьурбанмахIаммадовна ЦIаххаевагу. Цила каши ва дахIавуртту ишла дуллай, коллегахъайн, медициналул къуллугъчитурайн буклай, ванил кумаг бувссар чIявусса, щавурду дирну захIматсса тагьарданувун багьсса аьралитуран, хаснува жула дагъусттан оьрчIан. Миннал хIакьинусса кьинигу дахIаву дур Ххадижатлущал. Бувмур кIулну, барчаллагьрайнма бур ччарча цивппа аьралитал, ччарча вайннал гъан-маччами. Медициналул чулухасса кумаг баву бакъассагу, сант дакъар къаувкуну, мажал бакъашиврух къабурувгун, Ххадижат ччарча даврил уртакьтуращал, ччарча цила ласнащал, оьрчIащал ва гъан-маччанащал ччя-ччяни бияйссар лакку дукрарду, нахIу-нацIу ва аьркинмургу ларсун госпитальлайн. Ва ххуйну кIулссар шиккусса аьралитурангу, зузалтрангу. Азарханардая бувкккун махъ аьралитал Ххадижатлуйн хъамалу оьвтIий, ванин бансса хъинбалдарах луглай бикIай. Ххадижатлунгу вай цила лякьлул оьрчIру кунма бур. Хъунмасса шагьрулий къабигьассар зузисса, кулпат бусса инсаннан цала даврийнгу лавгун, ичIаллилссагу бувну, укунсса чирилул давурттугу дуллан.
Ххадижатлул чумартшиврия, инсаншиврия буслан бикIай ванил коллегахъул, дустал, цинявппагу ва кIулми. Ччимур бахшишран ва барчаллагьран лайкьссар ванил дуллалисса даву тIун бикIай.
ЦIуллу баннав, Ххадижат. Мунияргу бюхттулми наградарттугу ласлай ккакканнав. Каши-кьудрат ххи даннав.
Андриана Аьбдуллаева
