Ттигъанну Росреестрданул Дагъусттаннайсса Управлениялул зузала, Кумиял шяравасса Сулайл ва КIундиннал шяравасса Умал арс, Бахрам Мирзаевлун дуллунни «Почетный донор России» тIисса бусравсса цIа.

Донор хьуншиврул инсаннал хьхьичIра-хьхьичI дикIан аьркинни цIимилул дакI, цаманан кумаг буллансса гъира, зуву. КIилчин – цалла цIуллу-сагъшиврул ялув ацIаву, низам. Вай ва чIявусса цаймигу язисса махъру учин хьунссар цалва чIунархIалминнан ва цаярва оьрмулул мюрщиминнан цимурцаннуву эбратну хъанахъисса Бахрамлуя.
Ванал ттинин дуллуну дур 20-нния лирчусса литрарду – мукьцIаллий кIийлва оьтту буллуну. Цикссагу инсантурал оьрмурду ххассал бан, вай аьдатсса оьрмулул кьаралданийн зана битан кабавкьуну бур ванал.

Бахрамлул цалчинма-цалчин оь буллуну бур 2010-ку шинал.
– Операция бувну, оьттуцIа хьусса, мукунма цайми-цайми ишру хьуну, оь аьркин хъанахъисса инсантуран ттуява кумаг хьуншиврул буллай ура, – тIий ур Бахрам.
Вайва гьантрай Бахрам «Федеральный регистр доноров костного мозга» тIисса сакиншиннарал сияхIрайгу авцIунни. Хасъсса анализ дуллунни, ттурчIал нярал пересадка дакъа хъин хьунсса хьул-умуд бакъасса къашайшалт ххассал бавриву цаятува кумаг бикIаншиврул.

Увссар Бахрам апрельданул 12-нний 1983-ку шинал Лаккуй. Дуклай ивкIссар КIундиннал дянивмур даражалул школалий. Ва къуртал бувайхту, лавгссар армиялийн, къуллугъ буллай ивкIссар Ухссавнил Флотрай. Зана хьуну махъ зий ивкIссар личIи-личIисса давурттай. 2014-ку шиная 2021-ку шинайн ияннин зий ивкIссар Ах1мад-Хан Султаннул цIанийсса МахIачкъалаллал аэропортрай. Вай махъсса шиннардий зий ур Росреестрданул Дагъусттаннайсса Управлениялий. Бахрамлул кулпат Нурижат бур Кумиял шяравасса, вайннал дянив бур шанма оьрчI.

Виву инсантуран кумаг буллансса каши-кьудратгу, гъирагу тачIав чан къахьуннав, Бахрам, ина кунмасса чумартсса инсанталгу жула дянив чIяву баннав. Амма зул кумаг аьркин хъанахъисса ишру шайссаксса чанну хъананнав.

Бадрижамал Аьлиева