Гьашину Лакрал райондалий школа къуртал бувшиврул аттестатру лавсунни 33 оьрчIал.
Гъумучиял школалул актовый залдануву хьунни гьашину школа къуртал бувминнан аттестатру буллалисса шадлугъ. Ваний гьуртту хьуна райондалул администрациялул ва идарарттал зузалт, школардал директортал, учительтал, школа къуртал буллалими ва вайннал нину-ппу.
Райондалул бакIчи Юсуп МахIаммадовлул барча бувна школа къуртал буллалими:
– Ххирасса выпускниктал! Зу, тIайлабацIу буну экзаменнугу дуллуну, цIусса оьрмулул ххуллийн буклай буру. На зу дакIнийхтуну барча буллай ура. Зул гьарцаннал оьрмулуву дукIлай дур ца яла агьамсса чIун. Цалчинмур занглия байбивхьуну, хIакьину ва аттестатру ласласисса шадлугърайн бияннин, зу бивтссар яргсса асардал вибувцIусса ххуллу. Махъ лирчIссар хъамакъаритайсса шинну. Ва ххуллул мутталий зущал бивкIссар зул насихIатчитал, зул тарбиялуву ликъаххайсса аьш кьадиртсса педагогтал. ДакIний битияра бусса оьрмулий зула аьзизсса школа, кIулшивурттачIансса ххуллу тIивтIусса учительтал. Хъамамабитару архIал дуклай бивкIми. Зул оьрмулуву дуркIун дур балугъравун бивсса чIун, мунин лавхьхьусса бикIантIиссар зул хьхьичI бихьлахьисса мурадругу. ХIакьину зул хьхьичI бавцIуну бур хъинну жаваблувсса мурад, зула гихунмайсса оьрму ва пиша язи бугьансса. ДакIний битияра, зу жул ялун бучIантIимурду, зуйнссар жул вихшалагу, умудругу. ЧIа тIий ура зун тIайлабацIу. Илкинсса хьуннав цIусса оьрмулувунсса зул ххуллу!» – увкуна Юсуп МахIаммадовлул.
Щардал школа къуртал бувсса Мариджан Ибрагьимовахь барчаллагь увкуна, школалул ва райондалул жяматийсса иширттавугу чялишсса гьурттушинна дуллай, республикалул лагрулийсса конкурсирттай, олимпиадарттай хьхьичIунсса ккаккиярттугу хьун дуллай, райондалул цIа ларай дуллай бивкIун бушиврухлу. КIулшиву дулаврил министр ЯхIия Бучаевлул цIанияту Барчаллагьрал чагъаргу буллуну, дуллуна арцул медаль. Барчаллагь увкуна ванил нитти-буттахь ва учительтурахь.
