Ларгсса хамискьини МахIачкъалалив «Труд» стадиондалий хьунни яттирдай заназиминнал баскетболданул турнир «Кубок сильных». Цувгу хас дурну дия хасъсса аьралий операциялий ливтIуминнал кулпатирттан.
Ваний гьуртту хьуна Дагъусттаннаясса, Чачаннавасса, Ставропольский крайраясса ва Удмуртиянавасса мяйра команда.
Ванил сакиншинначитал хьуна ДР-лул Баскетболданул федерация, ДР-лул Спортрал министерствалул кабакьаврийну.
Гьуртту хъанахъиминнан тIайлабацIу чIа учин бувкIун бия ДР-лул спортрал министр Сажид Сажидов, Республикалул бакIчинал кумагчи Шамил Аьлиев, ДР-лул Баскетболданул федерациялул президент Максим Келебеев ва цаймигу.
Турнирданий ххув хьуну, «Кубок сильных» бувххуна «Локопласт» тIисса Ижевск шагьрулиясса командалул. Вава шагьрулиясса «ЛОКО» тIисса цамургу командалул бувгьуна ряххилчинмур кIану. КIилчинмур кIану бувгьуна «Ламан Аз» тIисса Грозный шагьрулиясса командалул, шамилчинмур кIану – «ДаКИ» тIисса МахIачкъалалиясса командалул.
«ДаКИ» командалийн оьвкуна ссуттил Ижевск шагьрулий хьунтIисса «Лига сильных людей» тIисса Щалагу Аьрасатнал турнирданий гьуртту хьун. Ижевскраясса тренер Николай Безумовлул муттаэтуран пишкаш бувна Удмуртиянал баскетболданул федерациялул ва «Купол-Родники» тIисса Ижевскаллал баскетболданул клубрал цIарду чирчусса баскетболданий буккай ттупру.
Зулайхат Тахакьаева
