Июльданул 8-нний, Кулпатрал, ччаврил ва дакI тIайлашиврул кьини, МахIачкъалаллал Тарихрал музейраву хьунни «Год семьи. Камиль Чутуев» тIисса цIанилусса документал фильмрал презентация. Ва дур музейрал ва «Дагъусттан» ГТРК-рал цачIусса выпуск. Ванил авторгу бур жулва лаккудуш Назира Аьлиева.
Республикалий ва ванил кьатIув цIа ларгсса, Гъумучатусса фотограф Камил Чутуевлул ва ванал оьрмулул дус, ШавкIратусса ПатIиматлул цачIу оьрму бутлай хьуну дур 62 шин. Вайннал ччавриясса, уттинин цачIу бивтсса ххуллиясса, наслулиясса фильм дур ва. Ванил презентациялийн бувкIун бия вайннал гъан-маччами, дустал, музейрал ва телевидениялул зузалт. Шикку хьусса ихтилатругу бия Чутуевхъал кулпатрал гьану бивзсса архсса шиннардива нанисса дакIнин бичавурттал, Кулпатрал, ччаврил ва дакI тIайлашиврул кьини барча даврил журалийсса.
«Проджи» журналданул редактор Наталья Резниковал шикку увкусса куццуй, Камил Чутуевлул рирщусса ххаллилсса суратру ишла къадурсса кказит-журнал, телеканал дакъахьунссар республикалий. Вайннал кулпатрал ччавриягу, нахIу-хIалимсса арардаягу чIявуссаннан бавссар, вай цалва оьрчIангу, цайминнангу эбратрансса кулпатну хъанахъиссар.
Фильмрал автор Назира Аьлиева бур кIира шяраваллил – ХьурукIуннал ва Ххутрал дянив лявхъусса гьунар бусса душ. Ванил «Дагестан» ГТРК-лий зий 10 шинни. Зийгу бур личIи-личIисса форматирттай: ток-шоурду, реалити-шоу, документалистика, интервью. Ва бур «Дагестан» ГТРК-рал тематический вещаниялул шеф-редактор.
– На зузисса «Дагестан» ГТРК-рал «Россия1» ва «Россия 24» каналлай дуссар кулпатирттан хас дурсса «Год семьи» тIисса цIанилусса проект. Кулпатрал шинал жу хъамалу шару къачансса кулпатирттачIа, машгьурссагу, къамашгьурссагу. Ва ххуллухь жу МахIачкъала шагьрулул Тарихрал музейращал Чутуевхъал кулпатраву хьуру, ласарду интервью. Ихтилатгу хьунни дакIнийхтунусса, бюххансса, – тIий бур Назира.
Бадрижамал Аьлиева
