Июль зурул 6-нний МахIачкъалалив хьунни «Справедливая Россия – За правду» партиялул ва «Молодежь Справедливой России» суккушиннарал сипталийн бувну дуллалисса «Дагестан против террора и экстремизма» тIисса цIанилусса заседание. Ва дачин дурну ия ДР-лул Халкьуннал Мажлисрал председательнал хъиривчу, «Справедливая Россия – За правду» партиялул отделениялул каялувчи Камил Давдиев.

Шикку гьуртту хьуна ДР-лул миллатрал политикалул ва диндалул иширттал министрнал хъиривчу Расул ХIажиев, «Справедливая Россия – За правду» партиялул бюрорал советрал секретарь Мурат Пайзуллаев, ДР-лул Халкьуннал Мажлисрал депутат, СКФО-райсса «Молодежь Справедливой России» суккушиннарал председатель Марат Аьлияров.
Камил Давдиевлул, заседание дайдихьлай, дакIнин бивчуна июнь зурул 23-нний Дагъусттаннай дурсса терактрацIун бавхIуну хьусса оьзрурду. Ванал агьалинайн, хаснува партиялул члентурайн, оьвчаву дурна, ялун нанисса ник экстремизмалуща дуруччаву мурадрайсса давуртту дуллан аьркиншиву.
Расул ХIажиевлул цала ихтилатраву кIицI лавгуна экстремистътурал мурад жула республикалий граждан дяъви байбишин кьаст лахIлахIисса бивкIшиву. Амма миннаща къавхьуссар мукунсса пикрирду дузрайн буккан буван. Цинявннан кIулсса куццуй, 1999 шинал 25 азарунния ливчусса дагъусттанлувтал ярагъгу канихьну террористътурал кьюкьрайн къарщи бувккун бивкIссар.
Марат Аьлияровлул бувсуна экстремистътал хъунмурчIин жагьилсса оьрчIру хъяврин буллай, ми цала чулийн кIункIу буллай бушиву. Жагьилтурахь насихIат буллалисса ихтилатру бувна ДР-лул Халкьуннал Мажлисрал депутат Шамил Оьмаровлул, Буйнакск шагьрулийсса партиялул отделениялул советрал председатель Марат Жанхаевлул, Дарбант шагьрулул мажлисрал депутат Видади Асадовлул. Шиккува маслихIат хьуна, партиялувун кьамул буллалисса кандидатътурал багьу-бизу ххал бувну, хъирив лавну махъ бакъа кьамул къабуллан.
Имара Саидова