Правовой академиялул студентка, ЦIуссалакрал райондалиясса Марина МахIаммадова гьуртту хьунни Щалагу Аьрасатнал даражалийсса юридий олимпиадалий.
Олимпиадалул цалчинмур тур хьуссар Пятигорск шагьрулий. Шикку чIявусса гьурттучитурал дянив най бивкIсса бяст-ччаллаву «Информационное право» тIисса номинациялий шамилчинсса кIану бувгьунни Маринал.
Олимпиадалул хъиривмур тур хьуссар Москавлив Ломоносовлул цIанийсса МГУ-луву. Ва дия Аьрасатнал билаятраясса 100-хъул вузирдавасса студентътал гьуртту хъанахъисса, хьхьичIмурнияр цимивагу даражалул захIматсса тур. Оьрмулухун дакIний личIансса асарду хьунни Маринал олимпиадалий гьуртту шаврия.
Олимпиадалий гьуртту хьуншиврул Марина хъунмасса хIаллай хIадур хъанай бивкIун бур информациялул дарсру дишайсса Анара Селимоващал.
Марина вузравугу хьхьичIунсса студентътурал сияхIрай бур. ЦIана ва дуклай бур Щалагу Аьрасатнал паччахIлугърал юстициялул университетрал Ухссавнил Ккавкказнавусса институтрал филиалданул шамилчинмур курсирай. Мукьилчинмур курсирайн бивсса ппурттуву вара олимпиадалул лидертурал сияхIравун багьансса хияллай бур.
Шиккува бусан, Марина бур ЦIуссаккуллал 2-мур школалул выпускница. Школалий дуклакисса ппурттувугу ванил, республикалул юридий олимпиадалул конкурсирттай гьуртту хьуну, цимилгу хьхьичIунсса кIанттурду бувгьуну бур.
ЧIа учинну Маринан гихуннайсса дуккавриву ва гьарица ишираву тIайлабацIуртту.
Имара Саидова
