В среду, 30 января, в Махачкале, состоялась церемония официального представления временно исполняющего обязанности Президента Республики Дагестан Рамазана Гаджимурадовича Абдулатипова активу республики.

Январь зурул 30-нний МахIачкъалалив Республикалул активран ккаккан унни Дагъусттан Республикалул Президентнал къуллугъ чIумуйсса биттур буллантIисса Рамазан ХIажимурадович АьбдуллатIипов.

Тикку гьуртту хьунни АьФ-лул ХIукуматрал Председательнал хъиривчу, АьФ-лул Президентнал СКФО-райсса вакил Александр Хлопонин, Дагъусттаннал экс-президент, АьФ-лул Президентнал Администрациялул Каялувчинал хъиривчу МахIаммадссалам МахIаммадов, ДР-лул Халкьуннал Мажлисрал Председатель МахIаммад-Султан МахIаммадов, ДР-лул ХIукуматрал Председатель МахIаммад Аьбдуллаев, ДР-лул ПаччахIлугърал секретарь Такибат МахIмудова, ДР-лул ХIукуматрал члентал, АьФ-лул ПаччахIлугърал Думалул ва ДР-лул Халкьуннал Мажлисрал депутатътал, районнал ва шагьрурдал бакIчитал ва цаймигу.
Б атIаврий цалчин махъ лавхъунни Александр Хлопониннул: «ХIурмат бусса даврил уртакьтал, дустал! Жунма цинявннан кIулсса куццуй, 2013 шинал январьданул 28-нний АьФ-лул Президент Владимир Путиннул къулбас дурну дур ДР-лул Президент МахIаммадссалам МахIаммадаьлиевич МахIаммадов чIун хьуннина цалва къуллугърая мурахас аврил хIакъиравусса Указрай. Хъиривмур Указрайну Аьрасатнал Президентнал га ивтун ур АьФ-лул Президентнал Администрациялул Каялувчинал хъиривчуну. Жунма цинявннан бувчIлай бур, жулва билаятрал хъунама, Владимир Путиннул бувсса хIукмулул МахIаммадссалам МахIаммадаьлиевич МахIаммадовлул ДР-лул Президентнал къуллугърай дурсса давурттан лавайсса кьимат бищаврил барашин дуллалишиву ва ганайн хъуннасса вихшалагу дуллалишиву», — увкунни Александр Хлопониннул.
Аьрасатнал Президентнал Вакилнал мукъурттийн бувну, махъсса 3 шинал республикалий каялувшиву дуллалиминнал тамансса захIмат бивхьуссар экономикалул тагьар хъинчулий даххана давриву, хъуннасса даву дурссар миннал жяматийсса, политикийсса ва социал бутIраву. Миннаща бювхъунни гражданшиврул общество дишинсса шартIру сакин дуван.
Яла Александр Хлопониннул дакIнийн дирчунни вай шиннардий дурсса цинярда давуртту: Дагъусттаннал Экономикалул форум, Гимриннал сива дуккаву ва цаймигу.
А. Хлопониннул М. МахIаммадовлун чIа увкунни уттимур къуллугърайгу хьхьичIуннайшивуртту.
«Зунгу кIулсса куццуй, АьФ-лул Президентнал Указрайну, январьданул 28-нний ДР-лул Президентнал къуллугъ чIумуйсса биттур байману ивтунни Рамазан ХIажимурадович АьбдуллатIипов. Ттул пикрилий, ва инсан шиккун бавтIминнащал кIул уллан аьркиншиву дакъари. Жуна цинявннан ва хъинну кIулли. Ва ур даву канилух дурксса лавайсса даражалул пишакар. Ванан кIулли хIакьину Дагъусттаннай щаллу буллан аьркинсса циняв масъалартту. Ва ур федерал центрданий авторитет дусса ва бусравсса инсан. ХIурмат бусса Рамазан ХIажимурадович, на вихь дакIницIану барча тIий ура ва чIа тIий ура хъунисса хьхьичIуннайшивуртту!» – увкунни А. Хлопониннул.
Яла махъ буллунни МахIаммадссалам МахIаммадовлухьхьун: «ХIакьину хъинну агьамсса кьини дур – ванийну на щаллу буллай ура ДР-лул Президентнал къуллугъ. Билаятрал Президентнал Указрайну на ивтунна АьФ-лул Президентнал Администрациялул Каялувчинал хъиривчуну. На барчаллагь тIутIиссара В.В. Путиннухь, ва залданувун бавтIсса цинявннахь, жущалва архIал зий бивкIсса циняв дагъусттанлувтурахь», — увкунни махъ лахълахъиманал.
М. МахIаммадовлул гьартану бувсунни ДР-лул Президентнал къуллугърай зий цалла дурсса давурттая.
Ахирданий ганал Рамазан АьбдуллатIиповлун чIа увкунни республикалул каялувчинал къуллугърай тIайлабацIуртту.
Я ла ДР-лул активрал
хьхьичI ихтилат бунни Дагъусттаннал Президентнал кIанайма Рамазан АьбдуллатIиповлул:
«ХIурмат бусса Александр Геннадиевич, МахIаммадссалам МахIаммадаьлиевич, хIурмат бусса депутатътал ва министртал! На барчаллагь чин ччай ура АьФ-лул Президент В.В. Путиннухь ттуйнна вихшала даврихлу.
Аьрасатнал Президентнал ттухьхьун буллунни ттулла республикалухагу, ттулва халкьуннахагу зунсса бази. Мукунмасса бази на буллалиссара зун ччисса гьарцаннахьхьунгу. Агана зу зий бухьурча властьрал органнаву ва на каялувчи хIисаврай зухьва учирча, зува зузисса къуллугърая букьира, куну, муницIун зу рязи хьун аьркинссару. Амма му мукун бантIиссар маслихIатру ккавккун махъ, жулла аьдатирттайн чул бивщуну. На циняв къуллугъирттая букьан буван ччай акъара. Ттун аьркинни мюнпатну зузисса, дакI марцIсса инсантал.

[pullquote]Гьай-гьай, районнал, шагьрурдал каялувчитал бикIан аьркинссар дурккусса, за кIулсса, агьалинал вихшала дирхьусса инсантал. Жулла властьрал хъунмур диялдакъашиву – агьалинал чулухасса вихшала духлагавур.[/pullquote]
Гьай-гьай, районнал, шагьрурдал каялувчитал бикIан аьркинссар дурккусса, за кIулсса, агьалинал вихшала дирхьусса инсантал. Жулла властьрал хъунмур диялдакъашиву – агьалинал чулухасса вихшала духлагавур.
Жу цIубуккан булланну циняв даражардал зузалт, даврийн буцланну конкурсрайну. Конкурсрал комиссиялуву бикIан аьркинссар ДР-лул Президентнал вакилтал. Министерстварттал ва ведомстварттал комиссиярттавух бикIан аьркинссар Федерал министерстварттал вакилталгу, миннал бищун аьркинссар зузалт хIадур баврил даражалун кьимат.
Жува муданма буру инвестициярдая гъалгъа тIий. МахIаммадссалам МахIаммадовичлул хъунмасса захIмат бивхьуссар ми иширттаву. Ттул тезис цамур бур. Жунма 2 олигархнияр аьркинссар 1000 бизнесрал предприятие. На оьвтIий ура олигархтурайн Дагъусттаннайн. Зузи дара производство, дузал бара зузи кIанттурду. Мунихлу жу зухь барчаллагь учинну.
Жущава бюхълай бур захIматчинал кьадру-кьимат зана бан, зузалал, захIматчинал даву бусрав дан. ПаччахIлугърал чIявуминнан пенсияртту ва пособияртту буллай бур, амма ми буллалисса къазуншиврул бакъархха. Экстремистшиврул масъалартту хIасул хъанахъисса давуртту дакъашиврул бакъарча, инсаннан зун къаччишиврулли. Зун аьркинссар цинявннан.
Хъиривмур масъала – му энергетикар, ххуллурдур, хьхьирир.
Ссан аьркинссар Дагъусттаннан хьхьири, муния мюнпат къаласайни, республикалул бюджетравун кIапIикI къадукIлакIикун? Цаппара халкьру буссар так хьхьирия дучIаймуний ялапар хъанай. Дагъусттаннай Аьндиял Къуйсу неххай 6 ГЭС бансса икьрал дуссар. Агарда жува ми барча, гьарца щинах бюджетравун нантIиссар 5-10 млрд. къурушру. Му чIумал цIусса зузи кIанттурдугур хьунтIисса.
Яла агьаммур даву – му шяраваллил хозяйство хьхьичIуннай хъит чин давур, дукиялул ва переработкалул промышленность лядуккан давур. Жулла продукция Москавлив ва цаймигу регионнайн дуккан дуллалавур. Жулла шяраваллу кьаритлан къааьркинссар. МахIачкъалалив зузисса циняв къуллугъчитурал цалла шяраву хозяйство дикIан аьркинссар, ттул куннасса.
Аьзизсса дустал! Агана агьалинал властьрайн вихшала къадулларча, паччахIлугъ ччаннай къадацIайссар. Бачира паччахIлугъ, Ватан дуручланну, АьФ-лул инсантал, жулва дагъусттанлувтал буручланну, му чIумал цинявннал жухьва барчаллагь тIунтIиссар», — увкунни Рамазан АьбдуллатIиповлул.
ХIадур бувссар ХI. Аьдиловлул