МахIачкъалалив хьунни «Активное общество – активный Дагестан» тIисса цIанилусса республикалул коммерческий бакъасса идарарттал (НКО) масъаларттан хас бувсса конференция. Ванил сакиншинначиталну бувккунни ДР-лул Халкьуннал Мажлис ва Республикалул Жяматийсса палата.

Мажлис бачин бувну бия ДР-лул Жяматийсса палаталул член, политолог, журналист Ханжан Кьурбанов ва ДР-лул Халкьуннал Мажлисрал председательнал маслихIатчи, журналист Эльмира Щайхова. Шикку ихтилатру бувна ДР-лул Халкьуннал Мажлисрал председатель Заур Аскандаровлул, ДР-лул Жяматийсса палаталул председатель Аьзизбаг Черкесовлул, ДР-лул миллатрал политикалул ва диннал иширттал министр Энрик Муслимовлул, ДР-лул Энергетикалул ва тарифирдал министерствалучIасса Жяматийсса советрал председатель ЩайхмахIаммад Абашиловлул. Конференциялул даву дайдирхьуна пленарный заседаниярттая. Республикалун агьамшиву дусса масъалартту ххал бигьин бувкIун бия Дагъусттаннал парламентрал депутатътал, ДР-лул БакIчинал Администрациялул вакилтал, Дагъусттаннал парламентрал, муниципал районнал ва шагьрулул округирттал члентал, диндалул, ветерантурал, жагьилтурал идарарттал вакилтал ва чIявусса цаймигу.
Заседание дайдирхьуна Заур Аскандаровлул ихтилатрайну. Ванал цала ихтилатраву кIицI лавгуна Дагъусттан хьхьичIунмай баву мурадрайсса масъалартту ххал бигьин багьлай бушиву.

– Аькьлу-кIулши дусса, шавхьсса пикрирду бусса граждан общество дакъассаксса, демократ ихтиярдал хIукумат сакин дан къахьунтIиссар. Так аькьлу-кIулши камил хьусса инсантуращар цIанасса захIматсса чIумул тIалавшиннарду дух дан хьунтIисса. Мунийн бувну, жувагу, властьрал органналгу цачIуну ххал бигьлан аьркинссар республикалул ахIвал лавай баву мурадрайсса ххуллу-чаранну. КIицI лавгсса пикрирду дузрайн буккан бавриву хъунмасса бияла буссар граждан обществалухь. Аьрасатнал президент Владимир Путиннул Федерал Мажлисрайнсса Рисалалуву чIурчIав дурна Аьрасатнал хьхьичI бивхьусса хъунисса тарихийсса масъалартту щаллу баншиврул паччахIлугърал, граждан обществалул ва бизнесрал даву цалийн бувкIун, бавкьуну дуллан аьркиншиврий. БувчIлачIисса зат бур, властьрал органнал агьалинащал цуксса цIакьсса дахIаву дуссарив, муксса мюнпат буну дузал буллантIишиву республика хьхьичIуннай даву мурадрайсса масъаларттугу.

Дагъусттаннал бакIчи Сергей Меликовлул хъуннасса къулагъас дуллай ур республикалул социал-экономикалул тагьар къулай давриха зузисса коммерческий бакъасса идарарттах, жяматийсса суккушиннардах. Республикалий чялишну бур граждан общество хьхьичIуннай давриха зузисса ихтиярдал база. Кьамул дурну дуссар законну ва паччахIлугърал программартту, цирдагу Федерал законодательствалуву дахханашиннарду даврийну къулай дурсса. Ялагу кIицI лаган ччива Жяматийсса палаталул ялув бацIаву дуллалисса давуртту. Миннуя балжину бусантIиссар Республикалул Жяматийсса палаталул председательнал. Мукунна хъуннасса агьамшиву дуссар муниципал палатардал дачин дурсса жяматийсса давурттал. Дагъусттаннал Муфтиятрал, ХIурмат лавайсса щайх АхIмад-ХIажинал каялувшиннаралу дачин дурну дуссар бусурман халкьуннал ва гьарцагу диндалул дянивсса дусшиврул арарду цIакь даву мурадрайсса диндалул, насихIатрал, культуралул ва просвещениялул давуртту. Коммерческий бакъасса идарарттал республикалул ахIвал лавай баврил масъалартту бакъассагу, аьркинссар ми дузрайн буккан буллансса чараннугу ххал бигьлан, – увкуна Заур Аскандаровлул.

Ихтилатирттая махъ конференциялул даву дарчIуна ряхва бутIуйх. Шикку ххал бигьлай бия насихIатирттал, коммерческий бакъасса идарарттан кумагрансса грантирдал, жяматийсса ялув бацIаврил, туризмалул, ихтиярдал, ас-ламусрал, кулпатирттал ва кулпатирттаву кьиматрай думунил хIакъиравусса масъалартту.
Секциярттал экспертъталну бия Республикалул Халкьуннал Мажлисрал комитетирттал председательтал Елена Павлюченко, Мурат Пайзуллаев, Фируттин Раджабов, Асият Аьлиева, Алавуттин Мирзабалаев, Халкьуннал Мажлисрал комитетирттал председательтурал хъиривчутал Шамил Оьмаров, Марина Котенко, АьлиасхIаб Шабанов, Елена Ельникова ва Малик Багълиев.
Конференциялул хIасиллайн бувну, хIадур дурну дур маслихIатру ва къулайшиннарду хIисавравун ласунсса резолюция.
КIива секциялий модераторталну бия «Знание» тIисса Аьрасатнал обществалул лектортал.

Конференциялул хIакъиравусса
пикрирду

Камил Давдиев, ДР-лул Халкьуннал Мажлисрал председательнал хъиривчу:
– ХIакьину хьунни республикалул агьалинал оьрмулуву хьунабакьлакьисса цIурювкьусса масъаларттал хIакъиравусса конференция. Ванил секциярттал давурттай гьуртту хьунни цала-цала пикри-хияллу бусса хасъсса экспертътал. Ахирданий, конференциялий гьаз бувсса масъалартту хIисавравун лавсун, сакин дунни граждан общество ва властьрал органну чялишну зузи даву мурадрайсса резолюция. Шикку гьаз бувсса цинявппагу масъалартту дузал баврил ялув дацIантIиссар властьрал органну.

Тутубава Башанаева, Лазерный хирургиялул клиникалул хъунмур хIакин, жяматийсса ишккакку:
– Конференциялий гьаз бунни властьрал органнал ва граждан обществалул арарду цIакь даву мурадрайсса агьамсса масъалартту. Цинявппагу шикку гьаз бувсса масъалартту бия адав-инсап дусса миллат ябаврил хIакъиравусса. ЦIанасса ппурттуву вай масъалартту цинявннан цачIусса ккаллину бур. На нава бура хасъсса аьралий операциялий щавурду дирсса аьралитуран МахIачкъалаливсса ЦЛД-лул хъунмур хIакин Къараева Аьйшатлущал ванил каялувшиву дуллалисса клиникалий реабилитациялул кумаг буллай. Хасъсса аьралий операциялул гьурттучитуран буллалисса реабилитациялул кумаг уквассар. Укунсса кумаг аьркинсса СВО-лул гьурттучитураща бюхъайссар жуйн буккан. ЖучIа буссар психологталгу.

Мариям Кьаландарова, «Дараччи» ихIсандалул клубрал Москавливсса филиалданул хъунмур:
– Гъирарай гьуртту хьура конференциялул давривух. Шикку тIивтIусса ряхвагу площадкалий гьаз бунни агьамшиву дусса масъалартту. Жуятува байбивхьуну, бусан ччай бура хъуннасса даву дачин дурну бушиву СВО-лийсса жула аьралитуран гуманитар кумаг буллай, госпитальлай хъин хъанахъисса аьралитурачIан занай. ЦIана жула билаятрангу захIматсса чIун дур. Мунияту хъунмасса бияла буссар жяматийсса суккушиннардал ва коммерческий бакъасса идарарттал дуллалисса давурттал.

Зульфия Ильясова, Дагъусттаннал Жяматийсса палаталул член, Дагъусттаннал халкьуннал артистка:
– Граждан общество ва властьрал органну цачIуну ва чялишну зурчанни жуваща бюхъантIисса хьхьичI бивхьусса агьамсса мурадру бартбигьлан. Ттун ччива вай жула масъалартту властьрал инсантурангу кIулну. Жула бюхъу-гьунар ишла баврийнур кумаграх мюхтажминнал чIарав бацIан хьунтIисса. ЦIанасса чIумал на бура чув буссарив кIул бан къахъанахъисса аьралитурал хъирив бизлай, вай цумур госпитальданий буссарив кIул буллай. ЧIярумур чIумал ттун багьай вай масъаларттал хIакъираву ттула дустурайн, Федерал къуллугъирттайн, Къиримнал Республикалул каялувчитурайн оьвтIун. РахIат буккара ттущава аьралитурал нитти-буттан кумаг бан бюхъайхту.

Шамил Оьмаров, ДР-лул Халкьуннал Мажлисрал депутат:
– Дагъусттаннай бур республикалул даража лавай баву мурадрай чялишну зузисса чIявусса инсантал. Ттул пикрилий, хъунмасса мюнпат хьунссия коммерческий бакъасса идарарттал дачин дурсса социал мурадру бусса проектру дузрайн дуккан даву мурадрайсса грантру гьарза дарчан. ХIасил, властьрал органнал ва граждан обществалул цачIусса гужру мюнпатну ишла булларчан.

Имара Саидова