Июньдалул 21-нний МахIачкъала шагьрулул хъун майданнив Аьпалул ва къювулул кьинилун хас бувну хьунни щалагу Аьрасатнал «Огненные картины войны» тIисса акция.

Ва хьунни «Единая Ро­ссия» партиялул щурущи бувсса «Ис­торическая память» тIисса проектрал лагрулий. «Единая Россия» партиялул регионал отделениялул, ДР-лул Жагьилтурал иширттал министерствалущал, «Молодая Гвардия» ва «Движение Первых» суккушиннардащал цачIуну, хъуншагьрулул дямайданнив, 1000кв/м кIанттай, 25 азарва майлул чирахъ лавхъун, хIасул дурунни «Дяъвилул цIарал сурат». Муний ккаккан бувну бия Аьрасатнал Виричу Аьбдул-ХIаким Исмяилов рейхстаграй ттугъ бишлашисса лахIза, Расул ХIамзатовлул шеърирдавасса кьурукьру, ялтту ва лултту «Помним», «Гордимся» тIисса чичрурдугу дирхьуну.

Вирттаврал аьпа буруччаврил ххуллийсса иширал чIарах къабувккунни бигьалаган майданнив бувксса туристалгу.
«ХIакьинусса аьпалул кьини дур хасъсса мяъна-мурадрал видурцIусса. Аьрасат цIунилгу къарщи бацIлай бур Западрал чулухасса хIусутшиврийн.
Хасъсса аьралий операциялий талатисса жула аьралитал, хIат-хIисав дакъасса къучагъшивуртту ккаккан дуллай, тикрал дуллай бур цала ттаттахъал виричувшивуртту. Тарихийсса аьпа буруччаву, ялун нанисса ник ватан ххирану тарбия даву хъанай бур «Единая Россия» партиялул программалул ца яла агьамсса ххуллу ва жула яла къалагайсса бурж, цувгу «тарихрал аьпа» тIисса проектрал лагрулий жува биттур буллалисса», – увкунни Дагъус­ттаннал жагьилтурал иширттал министр, «Единая Россия» партиялул «Историческая память» проектрал координатор Камил Саидовлул.

Шиккува кIицI бан, ва акция Дагъусттаннай хъанахъиссар шамилчин. Гьашину акция бунни хъуннасса лагрулий кIива шагьрулий – МахIачкъалалив ва Дарбантлив.
Дарбантлив шагьрулул майданнив, 10 азарва майлул чирахъ лавхъун, хIасул дурну дур 1941 шинал Дарбантлив бавтIун бивкIсса Дагъусттаннал 345-мур битултрал дивизиялул виричувшиву ккаккан дуллалисса «цIарал сурат».

Зулайхат Тахакьаева