Дагъусттаннай ссуттил бугьайсса къалмул бакIлахъия хьхьичIми шиннардийминнуяр чIярусса ласун тIий бур. Муния бувсунни Аьрасатнал шяраваллил хозяйствалул министрнал хъиривчу Андрей Разиннул каялувшиврий Минеральные Воды шагьрулий хьусса батIаврий Дагъусттаннал шяраваллил хозяйствалул министрнал цалчинма хъиривчу Шарип Шариповлул.
БатIаврий гьуртту хьуна Федерациялул Советрал члентал, ПаччахIлугърал Думалул депутатътал, СКФО-лийсса АьФ-лул Президентнал вакилнал аппаратрал зузалт, АПК-лул управлениялул органнал каялувчитал ва цаймигу.
Дагъусттаннал чулуха мероприятиялий бия ДР-лул шяраваллил хозяйствалул министрнал цалчинма хъиривчу Шарип Шарипов ва Россельхозцентрданул региондалул филиалданул каялувчи Жанна Казанбиева.
Шариповлул бусаврийну, Дагъусттаннал шанна райондалий байбивхьуну бур ссуттил бугьайсса къалмул хIаллил лакьлан. Ми давурттал цалчинми хIасиллал чIалачIи буллай бур гьашинусса бакIлахъия дукIумунияр гьарзасса хьунтIий душиву. Гьашину ца гектардания ларсун дур дукIуминнуяр 4-5 центнер ххишалану.
– ХIаллил лакьаврил хIадуршин дурну дур цила чIумал. Къама лакьай комбайнайртту зий бур, ГСМ ва луртан бутIри аьркинссаксса бур. Зий бур ми давурттан хасъсса республикалул штаб, – бувсуна Шарип Шариповлул.
Бувсуна хъацIру ппив къахьуншиврул дуллалисса давурттал хIакъиравугу.
ХIасан Аьдилов
