Республикалул Р. ХIамзатовлул цIанийсса Национал библиотекалий хьунни Дагъусттан Республикалул Информациялул ва печатьрал агентствалул каялувчи Аьбдуразакь Жамалуттиновлул ва «Дагъусттан» тIисса луттирду итабакьай къатлул каялувчи УмархIусман ХIажиевлул пресс-конференция.
Ванийсса ихтилатру хъунмурчIин бия ттигъанну Москавлив хьусса «ЯтIул майдан» тIисса луттирдал фестивальданий ва Уфа шагьрулий хьусса Дунияллул халкьуннал дянивсса «Китап-Байрам» тIисса луттирдал ярмаркалий дурсса гьурттушиндараясса.
«Дагъусттан» ИД (Издательский дом) хьунни «Книга года» тIисса конкурсрал «Лучшее издание классической художественной литературы» номинациялул лауреат, хъуннасса проект щаллу даврихлу. Вай бур Расул ХIамзатовлул луттирду, ванал юбилейрацIун бавхIуну буккан бувсса. Шикку итабакьаврил (издательско-полиграфиялул) даража муксса лавайсса бивкIун бурхха, ва проект конкурсрал Гран-прилун лайкь шаврицIун Шинал иширангу («Событие года») ккалли дурну дур. Гьарца шинал дуллай, 34-чин хьусса «Книга года» конкурсрал тарихраву цалчин хъанай бур Ухссавнил Ккавкказнавасса издательство ва даражалул бахшишран лайкь хьусса иш. Ванил хIакъираву Республикалул бакIчи Сергей Меликовлул цIаний Аьрасатнал луттирду бищултрал ассоциациялул президент Константин Чеченевлул чивчусса чагъар бувккуна Аьбдуразакь Жамалуттиновлул.
Конкурсрай гьуртту хьуну бур 172 издательство, 730 проект. ЛичIи-личIисса хьхьичIунсса издательствардугу гьурттусса бигьа бакъасса бяст-ччаллаву «Дагестан» ИД хьхьичIун буккаврил чIалачIи буллалиссар ва, ца жулла республикалий бакъа, щалва билаятрайгу конкуренция духIан бюхъайсса, цалла даву куртIну кIулсса идарагу, пишакарсса зузалтгу бушиву.
Ларгсса шинал ва издательствалул итабавкьуну бур Расул ХIамзатовлул луттирдал 80 азаруннийн бивсса экземплярду, вайксса луттирду бивщусса иш совет заманная шинмай хьуну бакъар. УмархIусман ХIажиевлул бувсуна гьашину «Дагъусттан» издательствалун 10 шин хъанай душиву, ва идара тIивтIуния шинмай цивппа мудангу хъуннасса къулагъас дуллай бушиву жулла республикалул бусрав-сий ларай дуллалисса, культура, багьу-бизу чIалачIи буллалисса луттирду буккан баврих, ва журалул гьарца лугу ца сувенир кунмасса шайшиву.
– Дагъусттаннал буссар луттирдацIун бавхIусса хъинну куртIсса тарих. Карунних чивчусса луттирду ппив хъанай бивкIссар шяраваллавух, канища канихьхьун буллай, цIуницIакул чичлай. ЖучIава мудангу бивкIссар кIулшивурттачIан кIункIу тIисса дурккусса инсантал. Луттирал кьадру мудангу бивкIссар, ххуйсса лу чахгума баххана бувайсса бивкIссар. Мунияту жугу хIарачат буллай буру жулва буттал буттахъал ва ххуллий цIакь дурсса, Абуссупиян Акаевлул ва МахIаммад-Мирза Мавраевлул дачин дурну диркIсса луттирду бищаврил аьдатру дуруччин. ХIакьину жулва билаятрай Дагъусттаннал чулухуннайсса къулагъас ларайсса дур. Ва кIану жува цIакь буллан аьркинссару хъин-хъинсса луттирду, альбомру, каталогру бищаврийнугу, – увкуна У. ХIажиевлул.
Ахирданий вайннал журналистътурал суаллахьхьун дуллунни жавабругу.
Бадрижамал Аьлиева
