Вана, ахиргу, «Илчилул» редакциялул Ххувшаврил байрандалун хасну баян бувсса, назмурду дуккаврил конкурсрал хIасиллу дурну.

Ва конкурсрал сиптачигу, сакиншинначигу «Илчилул» хъунама редактор Руслан Къардашоври. Гьармуния тIалавшинна ххисса ванал, щалва коллектив, бакIра-бакIрах гьарманахгу вичIи дирхьуну, жюрилул (жюри «Илчилул» коллективри) гьарманан ххюва баллданул шкала хIисаврайсса кьиматру бихьлахьи бунну. Яла, вай кьиматру хIисавравун лавсун, цуманан циксса баллу хьуну бурив хIисав бувнур кIантту буллу­ссагу. ЧIявусса баллу лавсмири хьхьичIун бувк­ми.

Жу бакIрайва, так Хъун дяъвилул темалун хас дурсса назмурдал конкурс тIий баян бувссия. Лакрал чичултраву сайки увагу акъассар ва дяъвилул тема аьч къадурсса, цал архIал лакку маз уттава буккаврил ххуллийсса давур, лакрал шаэртурал творчество лахьхьин дуллали­сса давур ва муницIухва, дяъви къуртал хьуну чIярусса шинну гьарчагу, ппухълуннал бюхттул­сса тарихрал хIурмат бушаврил лишанну хьунсса давур тIий буссияв жу. СВО-лул темалул хасъсса назмурду ккалаккисса видеортту гьан дуллан бивкIукун, редакциялул хIукму хьуссия кIирагу тема хIала духхан дитан.
Ва конкурсрал хъунама спонсоргу Кисловодск шагьрулий зузисса предприниматель Сиражуттин Къардашоври. КIилчинма спонсор – Халкьуннал Мажлисрал депутат Марат Илиясоври. Жу хъунмасса барчаллагьрай буру вайннайнгу, бюхъайссаксса чIявусса оьрчIру ххари буван хьурдай тIисса жул мурад бувчIуну, ялун бувксса цаймигу дугърисса спонсортурайнгу.
Цуксса хIайпнугу, конкурсрай гьуртту хьуми мудангу чIявусса бикIайссар, ххув хьуми – чан­сса. Амма ва конкурсраву циняв гьуртту хьуми хIурматран лайкьссар, ца лях гьан къаивтун, цинявннал суратру кказитрай ришлашиссару. Гьуртту хьусса цинявннан булунтIиссар лакрал машгьурсса шаэр Булбул Оьмариевал оьрчIансса назмурдал луттирдугу.

Утти бучIанну хIасиллайн.

Цалчинмур кIану – Ибрагьимов Кьурбан Мирославлул арс, Щардал школа. Вава цалчинмур кIану – Ятуева Амина Тельманнул душ, Щардал школа. Аминан ва Кьурбаннун конкурсрал жюрилул цакуццуйсса баллу бивхьуну бур. Мунияту кIиннанмагу буллалиссар цалчинмур кIанугу, ацIазарда къурушгу.
КIилчинмур кIану – АхIмадова Аьшу Русланнул душ, 4 шин. ЦIуссалакрал район, Чапаево – ххюазарда къуруш.
Шамилчинмур кIану мяйя инсаннайх бавчIуссар, гьарцаннан – шан- шаназарда къуруш арцулгу. Вайнна шамилчинмур кIанттун лайкь хьуминнал цIарду: Ибрагьимова Самира Мирославлул душ, Щардал школа; Кьурбанова КьурбанпатIимат Абуссупияннул душ, Щардал школа; Ибрагьимова Мариджан Мирославлул душ, Щардал школа; МахIаммадова Алина Узаирдул душ, Гъумучиял школа; МахIадова Мадина Кьадирдул душ, СунбатIуллал школа; АхIмадов Рамазан Русланнул арс, МахIачкъалаллал 12-мур школа (Ккуллал шяравасса); Барххулаева Аматуллагь МахIаммадлул душ, Ккурккуллал школа; Ибрагьимова Алжана Мирославлул душ, Щардал школа.

Мариян Илиясовал цIа­нийсса «Дараччи» фондрал цIаниясса премияртту: Хъювхъиял шяравасса Аьлиев МахIаммада Шамсуттиннул арс. КIундиннал шяравасса Ибрагьимова Мариян Замирдул душ, Хасавюрт; Дюкъуллал шяравасса Байрамова Ххадижа Черменнул душ.

«Приз зрительских симпатий» хIисаврайсса премия «Илчилул» журналист Бадрижамал Аьлиевал ва кказитрал дизайнер Зинфира ХIажиевал чулухасса дуллали­ссар Чихунова Милана Хизрил душнин, ЦIуссаккуллал школа.

«Инт» кафелул чулуха­сса премия дуллалиссар Щардал школалун, хасну лакку маз яшаврил ххуллий дуллалисса давринсса барчаллагь хIисаврай.

Хъусращиял шяраваллил школалун дуллалиссар «Илчилул» отделданул редактор Зулайхат Тахакьаевал цIаниятусса премия, конкурсраву чялишну гьуртту шаврихлу.

«Илчилул» журналист, Те­леграм-каналданул администратор Залму Аьб­дурахIмановал чулухасса премия дуллалиссар Бабаюртуллал райондалийсса (КIамахъаллал) Сангардал школалул дуклаки душ Маммаева Баркьисат Бадавинал душнин.

Цалчинмур ЦIувкIуллал жяматийсса ишккакку Башир СантIуевлул цIаниятусса премия дуллалиссар ЦIувкIратусса МахIаммадлул арс Мусаев ХIа­жимусан, МахIачкъалаллал 61-мур школа, вава школалий дуклакисса 1-мур ЦIувкIратусса Мустиев Арслан Артурдул арснан.

Ххув хьуцириннан дипломру ва премияртту дуллалисса мажлис бикIантIиссар июнь зурул 20-нний 11 ссятраву Поэзиялул театр­дануву. МахIачкъала, Р. ХIам­затовлул цIанийсса проспект, 12 б.

Жул хъунмасса умуд бур конкурсрай хьхьичIунсса кIантту бувгьуми цивппа ва конкурсрайн хIадур бувсса учительтуращал ва нитти-буттащал бучIанссар тIисса ва шадлугърайн. БучIан къабюхъайналгу мачча-гъаннайн тапшур буван­ссар бахшишру ласун.

ПатIимат Рамазанова