Июньдалул 11-нний Заур Аскандаровлул каялувшиврий хьунни ДР-лул Халкьуннал Мажлисрал 34-мур сессия. Байбихьулий ххал бивгьунни ДР-лул Халкьуннал Мажлисрал 10-мур регламентрал 98-мур статьялуву дахханашивуртту даврил масъала.
Законодательствалул, законшиврул, паччахIлугъ дузал даврил, регламентрал ва кIанттул цилакаялувшиврул комитетрал председатель Артур Исрапиловлул бусаврийну, дахханашивуртту дуллалиссар Халкьуннал Мажлисрайн дуркIсса федерал законнал агьамми проектру цачIу ххал дигьин бюхъаву мурадрай.
«Об отзыве на проект федерального закона № 639663-8 «О внесении изменений в части первую и вторую Налогового кодекса Российской Федерации и отдельные законодательные акты Российской Федерации» масъалалул хIакъираву махъ лавхъуна Бюджетрал, финансирттал ва налогирттал комитетрал председатель Марат Илиясовлул. Ванал бусаврийну, ва закондалул проектрал мурад хъанай бур АьФ-лул Президентнал Федерал Собраниялийнсса Рисала бартдигьаву. Закондалул проектрай ккаккан бувну бур налогирттал системалул доходирттай налогру дишаврил параметрарду даххана даву.
Закондалул проектрал хIакъираву Заур Аскандаровлул бувчIин бувна цIушиннардуну хъанахъишиву инсантурал ласайсса доходирттан дишайсса налогирттал прогрессив шкала (НДФЛ) ва идарарттал ялундукIулун дишайсса налогру лахъ шаву 20 процентрая 25 процентрайн диянцIа.
Яла парламентрал спикернал депутатътурахь ва республикалул ялапарлувтурахь барча дурна Аьрасатнал Кьини ва ялун нанисса Кьурбан байран.
ХIадур бувссар ХI.Аьдиловлул