Июньдалул 11-нний Дагъусттаннал бакIчи Сергей Меликовлул «Мусил ЦIуку» буллунни Аьрасатнал Виричу Фархад Худайнатовлул щащар Галина Худайнатовахьхьун. Церемониялий гьуртту хьуна гвардии прапорщикнал нину, ссу ва арс-душ. Ванан бюхттулсса цIа дуллуну душиврия кIул хьуну бия майрал байбихьулий. Худайнатов хьуссар СВО байбивхьуну махъсса 11-ма Аьрасатнал Виричу.
ГРУ-лул спецназначениялул 22-мур личIисса бригадалул спецназначениялул роталул группалул командирнал хъиривчу Фархад Худайнатовлул жан дуллуссар бунияласса виричунал кунна. Цала махъра-махъсса талатавриву ванал ххассал бувссар цащала цачIу талатимигу.
Гвардии прапорщик бакIчисса разведчиктурал группалул СВО-лул чIумал кумагрансса артиллериялущал хIала-гьурттуну бухлаган бувну бур 2 азарунниха ливчусса муттаэтурал аьралитал, 113 танк, бахьттагьалтращалсса дяъвилул 36 машина, 2 БТР, 17 ттуп, 8 минометрал расчет, наблюдениялул 30 пост ва цаймигу техника ва машинартту.
Фархад Худайнатов Каспийскалияссар. Ва гьуртту хьуссар Ухссавнил Ккавкказнаву ва Сириянаву хъанай бивкIсса дяъвилул иширттавух. 2013 шиная шийнай къуллугъ буллай ивкIун ур Кьиблалул аьралуннал округрал ГРУ-лул спецназначениялул подразделениярттаву. Ванан дуллуссар Жуковлул медаль, Чувшиврул орден, Святой Георгийл орден – 4-мур даражалул Георгийл Ххач.
Дагъусттаннал бакIчинал тIимунийну, Худайнатов къуллугъ буллай ивкIсса 22-мур спецназначениялул личIисса бригада – цIа дурксса соединенияр, му цимилагу талай диркIссар Ватан дуруччаврил яла хьхьичIунми дазурдай.
Сергей Меликовлул барчаллагь кунни Фархад Худайнатовлул ниттихь ва кулпатрахь Аьрасатнал ВиричунацIун кабакьлакьаврихлу.
«Уттигу цал на жижара буллай ура мачча-гъанссаннахь. Зуйн икрам буллай буру, хIурмат лавайсса ПатIимат Шяпиевна. Барчаллагь хьуннав вин къучагъсса зунтталчу, лайкьсса дагъусттанлув, цала Ватандалул арс тарбия аврихлу! Мукунма барчаллагь чин ччай бур вихьгу, Галина Алхасовна, муданма ганал чIаравсса инсаннахь кунма, ина ганах ялугьлай бивкIссара, вихну бивкIссара занахьуншиврийн, мунийну кумаг буллай бивкIссара ганан цала разведчикнал захIматсса задачартту бартбигьлан», – куна бакIчинал.
ХIадур бувссар ХI. Аьдиловлул
