Аьрасатнал гьаннарал яттил ва цIурттал 24-мур выставка дайдирхьунни майрал 23-нний Каспийскалий Аьли Аьлиевлул цIанийсса Спортрал къатраву. Выставка лахъи лагантIий дур майрал 25-ннийнин.
Гьаннарал яттил ва цIурттал выставка дуллалиссар гьаннарал ятту ябаврил, гьарза баврил хьхьичIунсса опыт машгьур баву, гьаннарал давуртту ххуй-хъин даву, хьхьичIунсса хозяйстварттал опыт ва элмийсса цIушиннарду чIярусса хозяйстварттаву ишла даву мурадрай.
Выставка даврийну бюхълай бур ккаккан дуван ватандалул ятту ябавриву дуллалисса селекциялул ва гьаннарал даву, ми давурттая кумаг хъанахъиссар чансса харж буккан бувну ласун чIярусса конкуренция духIан бюхъайсса продукция.
Выставкалий гьуртту хьунтIий дур 80-нниха лирчусса, ятту ва цIуртти лувгъи буллалисса хьхьичIунми гьаннарал хозяйствартту, коммерциялий ризкьи буллалисса Аьрасатнал 13 региондалиясса шяраваллил хозяйствалул бакIлахъиялуха зузисса хозяйствартту. Ккаккиялун бивхьуну бур 450-нния ливчусса ятту ва цIуртти.
Ва ялагу, гьуртту хъанай бур 6 элмийсса федерал институт, регионнал хIаятру, хIайвантран кьимат бищайсса экспертътурал комиссия, хьунт1иссар ххув хьуминнан наградартту дулаву, ятту ябаврил Национал союзрал члентурал аьмсса собрание, конференция, семинарду, мастер-классру.
Выставкалул хъамал бур ятту ябавриву зузисса аьлимтал ва элмийсса зузалт, Аьрасатнал Минсельхозрал пишакартал АьФ-лул регионнал АПК-лул управлениярттал органнал вакилтал ва цаймигу. Мероприятиялий хьунтIий бур 3 тематикалул ккуркки стол.
Выставкалий ккаккан дантIий бур яттил ва цIурттал жинсру: ставропольский, советский меринос, манычский меринос, жалгинский меринос, черноземельский меринос, российский мясной меринос, грознинский, волгоградский, дагестанский горный, артлухский меринос, северокавказский мясо-шерстный, советский мясо-шерстный, южный мясной, ташлинский, калмыцкий курдючный, карачаевский, лезгинский, тушинский, андийский, эдильбаевский, мукунна кьатIаллил билаятирттал жинсру.
ХIадур бувссар ХI.Аьдиловлул
