Майрал 22-нний МахIачкъалалив федерал омбудсмен Татьяна Москальковал каялувшиврий хьунни Щалагу Аьрасатнал Инсаннал ихтиярдал вакилтурал (Уполномоченные по правам человека) координациялул совет. Совет хас бувну бия архсса, биян захIматсса ва шяраваллал кIанттурдайсса инсантурал ихтиярду дуруччаврил масъаларттан.
Советрай гьуртту хьуна Дагъусттаннал бакIчи Сергей Меликов, ДР-лул Халкьуннал Мажлисрал председатель Заур Аскандаров, ПаччахIлугърал Думалул депутатътал, Аьрасатнал Федерациялул сенатортал, Аьрасатнал цIуллушиву дуруччаврил, просвещениялул, захIматрал ва социал иширттал министртурал хъиривчутал, региондалул омбудсментал.
Советрал гьурттучитурахь аьла-ссалам буллалисса махъ лавхъуна Сергей Меликовлул.
«Ттун барчаллагь учин ччай бур Татьяна Николаевна Москальковахь республикалий Совет буван вихшала даврихлу. Дагъусттаннай тамансса шяраваллу дур лахъсса зунттаву гьан-бучIан захIматсса, ми лядуккан даву ва кумаг баву – жул ца хъунмур масъалар», – куна региондалул каялувчинал.
Ванал тIимунийну, 950 азара инсан ялапар хъанай усса ур биян захIматсса шяраваллил кIанттурдай, миннал ихтиярдугу дуруччин аьркинну бур цIана дуллалисса экономикалул реформарттайну.
Субъектрал каялувчинал дакIнин бувтуна – ларгсса шинал Республикалул бакIчинал Федерациялул Советрай сипта дурну диркIшиву зунттал территорияртту лядуккан даврил паччахIлугърал политика камил даврил хIакъираву.
АьФ-лул Минэкономразвитиялий дузал бувну бур ми давуртту билаятрал циняв зунттал территориярттай дуллансса зузи группа.
Му бакъассагу, региондалий зий дур Закон «О горных территориях», бартдигьлай бур хасъсса программа, микку ккаккан бувну бур кумаг буллан бизнесрангу, агьалинангу.
Сергей Меликовлул бувсуна аьралитуран ва миннал кулпатирттан кумаг буллай бушиврул хIакъиравугу.
Татьяна Москальковал бусаврийну, гьар шинах федерал омбудсменначIан дучIайсса дур сайки 1 азарда лабизаву биян захIматсса кIанттурдайсса ва архсса шяраваллавасса инсантураяту.
Миннал агьамми проблемартту укунсса бур: ичIаллил дузалшиндарал, багьу-бизулул захIматшиву, зузи кIанттурду бакъашиву, харжру чансса бушиву, шяраваллил хозяйствалул бакIлахъия машай дуккан дуван къабюхълай бушиву, культуралул къатри бакъашиву, цIусса школарду тIалавну бушиву, ххуллурду ххуйсса бакъашиву, интернет дакъашиву.
Татьяна Москальковал омбудсментурахь бувсуна бан-битанмунил хIакъираву.
Советрал хIасиллайн чул бивщуну Аьрасатнал омбудсментурал Федерал органнайн, билаятрал субъектирдал бакIчитурайн хIадур бантIий бур законодательство ххуй-хъин даврил хIакъиравусса рекомендация.
ХIасан Аьдилов
