АьбдулмутIаллиблул душ Кьурбанова Ххадижат-Кубра
Оьрмулул 80 шинаву жуятува личIи хьунни дакI-аьмал авадансса инсан, уздансса хъамитайпа, Хьурттал шяраватусса АьбдулмутIаллиблул ва Таибатул душ Ххадижат-Кубра.
Ххадижат бувну бур 1944-ку шинал Хьурив. Яла нитти-буттащал лавгун бур Ашттархан шагьрулийн. Дарсирдайн занази хьувкун, Лаккуйн бувкIун, цила ниттил ниттичIа яхъанай, буттал шяраву бувккуну бур 7 класс. Муния махъ къуртал бувну бур Гъумучиял дянивмур даражалул школа. Яла, цIунилгу Ашттарханнайн лавгун, тикку бувккуну бур Балугъирттал институт, хьуну бур ихтиолог.
Къатлул хьуну махъ цила ласнащал Шамиллущал бивзун бур МахIачкъалалийн. Шикку ва сайки 20 шинал мутталий дарсру дихьлай бивкIун бур МахIачкъалаллал рыбопромышленный техникумраву. Ва техникум лавкьуну мукьах, Ххадижат-Кубра, ххуйсса специалист бушиву кIулну, «Запкасрыбводрал» тIалав бувну бур зун цачIанма. Шикку зийгу ванил хьуну дур 12 шин. Махъсса шиннардий дарсру дихьлай бивкIун бур Дагъусттаннал паччахIлугърал университетраву, пенсиялийн букканнин.
Ванил хIалал дурну дур «Заслуженный рыбовод России» тIисса хъуннасса цIа. Ххадижат-Кубра архIал зий бивкIминнал дянивгу хIурматрай бивкIун бур мудан. Мукунма бусраврай бивкIун бур цила мачча-гъаннал дянивгу, жяматрал дянивгу.
Ххадижат-Кубра аьпалухьхьун лагаврил пашманшивугу кIидачIлай, дакIнийхтунусса жижара буллай буру ласнахь Шамиллухь, арсурваврахь ва махъсса мачча-гъаннахь.
Цил бунагьирттал аьпа баннав, алжаннул ххари баннав, махъминнал оьрмурдай барачат бишиннав.
Хьурттал
ва ХьурукIуннал жяматру
АхIмадлул душ Аьлиева Гуржамал
ЗахIматсса цIуцIаврища ххассал къавхьуну, оьрмулул 73 шинаву жуятува личIи хьунни Карашрал шяраватусса АхIмадлул душ Аьлиева Гуржамал.
Гуржамал бувну бур 1951-кусса шинал Карашав. ХьхьичIунсса кьиматирттай 1970-ку шинал къуртал бувну бур Карашрал къутандалийсса дянивмур даражалул школа. Муния махъ мукьра шинай зий бивкIун бур цилва бувккусса мува школалул лаборантну.
Яла, МахIачкъалалив бивзун мукьах, чIярусса шиннардий ва зий бивкIун бур МахIачкъалаллал Приборду дай заводрай. Хъунмасса хIурматрай ва кьадрулийгу бивкIун бур цуппа зузисса коллективрал дянив. ХIалал дурну дур хIурматрал грамотартту ва барчаллагьрал чагъарду.
ХIал бавкьусса, дакI-аьмал уздансса, гьарца даймуниву, дитаймуниву итххявхсса инсан бия Гуржамал. Мудангу бусраврай ва сийлийгу буссия цила агьлу-авладрал ва щалагу жяматрал дянив.
Гуржамал аьпалухьхьун лагаврил пашманшивугу кIидачIлай, дакIнийхтунусса жижара буллай буру ласнахь Маликлухь, душваврахь Аьишатлухь, Жамилахь, Зугьрахь, уссихь Рашидлухь, ссихь Марияннухь ва махъсса цинявппагу гъан-маччаминнахь.
Цил бунагьирттал аьпа баннав, рухI бигьаний дишиннав. Алжаннул ххари баннав.
Карашрал жямат
Вай гьантрай жул аьзизсса уссу, шяраваллил жяматрангу бусравсса, дустурангу ххирасса МахIмудов МахIмуд аьпалухьхьун лавгун 6 шин хъанай дур. Гьарица кьинигу жун асар хъанай бур ва чIарав акъашиву.
Бургъихагу лавхьхьусса,
Зурул лащингу дусса,
Жул никъурттай къавтIалай,
Ххира уссай, МахIмудий.
Инт дучIайхту, ина жун
ТIутIал кацIру булайва:
Интгу гъан хъанай дурхха,
ТIутIив тти дакъассарив?
Шинну циксса гьарчангу,
Хъамакъаитанссара,
Тти аьпа буваннав вил,
Жул мусил бакI, ххазинай,
Ххари аннав алжаннул!
Заза
Шамсулваранал арс Дандамаев ХIажи
Мартрал 11-нний оьрмулул 86 шинаву жуятува личIи хьунни ГьунчIукьатIрал шяравасса Дандамаев ХIажи Шамсулваранал арс.
Къуртал бувну Дагъусттаннал шяраваллил хозяйствалул институтгу, ХIажи зий уссия МахIачкъалаллал винзаводрай, яла –Дагъусттаннал дуки-хIачIиялул элму ахттар дуллалисса институтраву. Шикку ва зий ивкIссар личIи-личIисса лахъсса къуллугъирттай. 1975-шинал Дандамаев ХIажи ивтссар Дагъусттаннал лухIитIутIул ва чахир дуккаврил элму ахттар дуллалисса институтрал директорну. 1988 шиная шийнай, пенсиялийн укканнин ва ивкIссар Дагъусттаннал ХIукуматрал комитетрай зий. Ва цувагу хъанахъиссар биологиялул элмурдал кандидат. ХIажинал 100-нния лирчусса элмийсса макьалартту чирчуссар личIи-личIисса кказитирттай ва журналлай. Ванал буссар 11 цалла ляхъан дурсса затирттал патент.
ХIажи ия хъинну дакIнил ххуйсса, инсаннал чIарав ацIан хIадурсса, гъан-маччами хъинну ххирасса, цинявннангу бусравсса инсан. Ванал цала кулпат Светащал архIал, хъунигу бувну, чивун уккан унни 2 ххаллилсса арс.
ХIажи аьпалул шаврил кьурчIишивугу кIидачIлай, жижара буллай буру кулпатрахь Светахь, арсурваврахь Шамсулваранахь ва Маратлухь, уссихь Мусахь, ссурваврахь Нинахь ва Зинахь, цинявппагу мачча-гъаннахь. Цал бунагьирттал аьпа баннав, алжаннул ххари аннав, махънал оьрмурдай барачат бишиннав!
ГьунчIукьатIрал жямат
