Ца хавар бувсуна вай гьантрай ттухь ттула гьалмахчув, Гъумучатусса Аслан Аьлиевлул. Ва хавар ванахьгу бувсун бия 1969-ку шинал Москавлив жула цIанихсса аьлимчув Амир Амаевлул, вай цачIанма хъамалу бувкIсса чIумал – Аслангу, Амирдул хъабакIсса уссу Дандамаев АьбдурахIмангу.
…1968 шин. Дахьва-дахьва къуртал хьуну бур Чехословакиянавусса ишру. Та чIумал Чехословакия, СССР бакIчисса Варшавский договорданува буккан ччай, жула хIукуматрайн къарщисса политика дачин дурну бивкIссар. Му чIумал СССР-данул, вайми социалистический хIукуматирттащал архIал аьрал бавкьуну, тай паракьат бувссар. Мунин бувну, та шиналгу, хъиривсса шиннардийгу Чехословакиянал халкь, хъинну жуятува рязи бакъа, лулттура жуйнна къарщисса давурттив дуллай бивкIссар.
Сайки муна му чIумал тайннал хъуншагьрулий, Прагалий, хьун аьркинну бивкIун бур Дунияллул халкьуннал дянивсса ядерный темалуха зузисса аьлимтурал симпозиум. Иш мукун багьну бухьувкун, пикри буллай бивкIун бур тIайла буккан бурив тиккун жулва вакилтал ягу бакъарив. Махъва-махъгу, СССР-данул ХIукуматрал хIукму бувну бур тIайла буккан делегация. Мунил каялувчинугу ивтун ур Амир Амаев.
БувкIун бур Прагалийн. Аэропортрай вай щилчIав хьунабавкьуну бакъар, аьдатрайн бувну, хьунабакьин аьркинну бунува. Бувгьуну таксигу, бувкIун бур гостиницалийн. Тикку хъинну махIаттал хьуну бур жулва вакилтал бучIаврия, ва яла сант дакъами номерду ккаккан бувну бур яхъанан. Амирдул куну бур жулваминнахь: «Вайннал ци дулларчангу, къулагъас мадару, паракьатну бикIияра», – куну. Хьхьурай жулва вакилтал бусса номердаву дарщуну дур щин. КIюрххил ччяни бивзун, ляркъуну дур щингу, кипятильникгу. Гъили дурну щингу, чIирттугу бивчуну, лажин-кагу шюршуну дур.
БувкIун бур залданувун, щябивкIун бур. Симпозиум бачин бансса президиумгу, мунил хъунамагу вай бучIаннин бувчIуну бивкIун бур. Амирдул жула делегациялун бувчIин бувну бур ци дуллан аьркинссарив, цукун занакьулу хъанан аьркинссарив, ци гьурттушинна дуллан аьркинссарив. Симпозиумрал цалчинмур кьини цукун-дунугу ларгун дур. Хъирив кьини тIурчан, вайми хIукуматирттаясса вакилтурал тIалавшиндарайн бувну, президиумгу, симпозиумрал хъунамагу аххана увну ур. Хъунаманугу увчIуну ур Амир Амаев. Вания тийнмайгу симпозиум, къуртал хьуннин, най бивкIун бур Амирдул каялувшиндарай!
Тти ххал бара, дунияллийсса аьлимтурал дянив цуксса сий дуну ивкIун урив, цуксса миннал чулуха хIурмат лавайну ивкIун урив жула лаккучув, хIатта жухва ххуй бакъа буруглагисса хIукуматрай хъанахъисса Дунияллул халкьуннал дянивсса симпозиумрал хъунаману увчIин!
Вана укун ххишала акъа лайкьсса, хъинну хIурмат лавайсса аьлимчув ва инсан ивкIун ур Жабраиллул арс Амир Амаев! Аьпа баннав цал!
Зиябуттин ХIажимирзаев
