Аьрасатнал билаят захIматсса тагьарданувун багьсса ппурттуву жула жагьилтурал ккаккан бунни иш багьний Ватан дуруччаву гьарицагу адаминал бурж бушиву. Ва ххуллухьсса «Илчи» кказитрал хъамаличувгу ур Ватандалул мурадру хьхьичI ххуттай бивхьусса, къучагъшивруцIун, мяърипатралгу увччусса, ас-намус бусса жагьил, ЦIийшиял шяравасса Аьвдулхаликьлул ва Щардал шяравасса Уммукусумлул арс Наибхан Магатуев.
Наибханнул сайки шин шавай дур хасъсса операциялий гьуртту хъанай. ЦIана ва увкIун ур отпускрай. Ватандалий ванах ялугьлай бур нину, ппу, шанма ссу ва махъсса гъан-маччами.
Аьралуннаву къуллугъ бувну дачIи шин лагайхту, Наибханнуйн воекоматрайн оьвкуну бур мобилизациялувун агьлагьишиву бусан.
– ТIайламур бусан, на нава рязину военкоматрайн лавгун, ца шинайсса контракт чирчуссия. Билаятрай укунсса тагьар хIасул хьусса ппурттуву ттул дакIнил кьамул къабувна мобилизациялия махъаллил хьун. Контракт чирчуния махъ ттул хъунмасса хIал хьуна ниттихь цукун бусан хъинавав тIий. Цумур ниттинни ччисса цала оьрчIру, дяъвилийн бакъагу, нигьачIаву дусса кIанттурдайн итабакьин. Гьай-гьай, на аьралий операциялийн ачин нанисса кIул шайхту, нину-ппу хъювусул бувккуна, – буслай ур Наибхан.
Наибханнул 2017 шинал къуртал бувну бур ЦIуминалийсса Шушиял шяравусса школа. Ванан марцIну кIулну бур лакку маз. Школа къуртал байхту, къуллугъ буллай ивкIун ур Архангельскаллал областьрайсса Мирный тIисса шагьрулий Аьралий-космический гужирдал аьралуннаву. Шикку ва хьхьичIунну къуллугъ буллай ивкIун ур.
Контракт чирчуну ца нюжмардува ва гьан увну ур Буденновск шагьрулийн. Шикку ва лахьлай ивкIун ур дронну итадакьайсса ва зузи дайсса куц. Ца нюжмар тиккугу дурну, гьан увну ур Къиримнавун. Август зурул 15-нния шийнай, хIакьинусса кьининин,Наибхан ур хасъсса аьралий операциялий гьуртту хъанай. Къуллугъ буллай ур Херсонский областьрай дроннал операторну. Ва дур кьюлтIну, душманнан хIисав къахьунну, ца позициялия дрон гьаз дурну, техника дусса кIану лявкъуну, информация штабрайн гьан буван багьлагьисса даву. Дронну итадакьайсса разведкалул группалуву, Наибхангу хIисавну, шама инсан ур. Ца ппурттуву, душманнал дрон хъирив дагьну, каний цIунцIия хьуну дур.
Август зуруй къуртал хъанай дур
Наибханнул контракт. Цувама ур уттигу контракт лахъи дансса ниятрай. Ванан цукунчIав аьралий гьалмахтал кьабитансса пикри бакъар. Кания гипс букьайхту, цIунилгу гьалмахтурачIан зана хьун ччай ур.
– Жу буссияв вацIлуву блиндажраву яхъанай. Цакуну ттул бакIрал ялтту гьанан диркIуна дрон. На уссияв та дрон жуласса ххай. Гания ливхъун най вацIлувух, блиндажравун ухлахийни ка цIун хьусса ххай ивкIра, циявхьур, гъаргъун ляркъунни, – тIий ур Наибхан.
– Цукун личIи дару жула дронну тайнналминнуя?
–Тайннал дронну жулламиннуха лархьхьусса дакъар. Жулламиннуй кIяласса бантру бавхIуну бикIай, дирхьуну дикIай Z лишанну. ЧIяруну тайнналми дронну лишанну дакъасса, ялун бурувгун личIи дан къашайсса дикIай. Дур «Баба-яга» тIисса хъунисса дроннугу. Ми дичирчан, жун премияртту дулай. Миннулли техника пIякь учин дайсса.
– Зул украиннал инсантуращалсса, тайннал зущалсса хIалкьазия цукунсса дур?
– Тикку бур шагьрурду мурахас баннин ялугьлагьисса оьрмулул бугьарасса инсантал. Нигь дикIай тайннан жу ярагъуннищал заназийни. БакIрай итталун къабагьанмур буллан бикIайва. Утти тIурча, ялунгума жун дансса хъиншиврух луглан бикIай. Цаламиннал зулму-къия дуллай бур тIий, жуйн аьрзирдай бучIай.
– Шаппай оьвчин бучIиссарив, связьрайхчIин саллатI бусса кIантту кIул буллай, нигьачIаву дуссар тIий бурхха?
– УрчIва-ацIва номер буссар бахханасса, шаппай оьвчин ишла буллалисса. На шания чантI учиннин циняв номердайн оьвкуну бикIай ниттил. «Вил чIу бавну махъ рухI дуркIунни, ттул арс, Заннал урувччуну лякъиннав инагу, вил гьалмахталгу» тIисса дур ниттил дуаьрду.
– Наибхан, тийх ниттил дурсса цуми дукрарду дакIнин дагьайва?
– Ниттил бувсса гьавккури, чуттурду дакIнин багьайва. Тийхгу жул блиндажраву буссия тIанттуй лахъайсса пач. ХIарачат байссия жущара шайсса куццуйсса дукрарду дуван.
– Цукунсса дур вил позывной?
– Ттул позывной «Горец» тIисса дур.
Барчаллагьрай ур Наибхан, цивппа тийх буссаксса хIаллай жула халкьуннал гьан буллай бивкIсса ссайгъатирттахлу. Август зуруй къуртал хъанай дур ванал контракт. Цувама ур уттигу контракт лахъи дансса ниятрай. Ванан цукунчIав аьралий гьалмахтал кьабитансса пикри бакъар. Кания гипс букьайхту, цIунилгу гьалмахтурачIан зана хьун ччай ур. Наибхан буслай ур дайдихьулийнияр цIана жула аьралитурал даража лавай хьушиву. Снарядру, дронну, ккулларду, аьралуннансса лаххи-ликкия диялну душиву. Шавай увкIун махъ Наибханнун буллуну бур дяъвилул иширттал ветераннал удостоверениягу.
– Барчаллагь, Наибхан. Ина кунмасса патриотътал буссаксса, ххувшаву ласунтIишиврийнсса вихшала хъиннура цIакь хъанай дур халкьуннал дакIурдиву. Зула оьрмурдан нигьачIаву дунугу, вас-ццах бакъа, Ватан дуручлай буру зу. Ватандалул мурадру буручлачисса цинявппагу аьралитал цIуллуну-сагъну зана хьуннав ссавур дакъа цахва ялугьлагьисса ичIувациринначIан.
Имара Саидова
