Мартрал 6-нний Р. ХIам­затовлул цIанийсса Ми­ллатрал библиотекалуву лахъа-хъунну хьунни «Дагестанская сага» тIисса Нажават (Жанна) Абуевал луттирал презентация.
Дагъусттаннал техникалул университетрал чил билаятирттал мазурдил кафедралул доцент, филологиялул элмурдал кандидат, профессор, шаэр, чичу, переводчик, публицист Жанна Абуевал цIа нукIура машгьурну дур интеллигенциялул, творчествалул агьулданул дянив. Жаннал итабавкьуну бур 20-ксса поэзиялул ва прозалул жужру, мукунма элмийсса статьярду, монографияртту, учебно-методический пособияртту. Ва хъанай бур Аьрасатнал Чичултрал союзрал, Аьрасатнал Журналистътурал союзрал член.
Жаннал кьини хъун дан був­кIун бия ванил даврил уртакьтал, дустал, гъан-маччами.

Мажлис цила зумуну усттарну бачин бувну бия цIанихсса шаэр, таржумачи, литературалул критик, публицист Миясат Муслимова.
– Махъсса зувирахъул шиннардил лажиндарай тарихрал прозалул, роман-эпопеялул жанрай чивчусса цавагу лу бувккун бакъар жула литературалуву. «Дагестанская сага» лу дунияллийн буккаву жула литературалуву агьамсса ва ххари хьун бучIисса ишри. Жаннал творчество ххираминнангу ххаллил­сса бахшишри. «Дагестанская сага» бувккун бивкIссар 2000-ку шиннардил дайдихьулийва бутIра-бутIрайну. Шанмагу бутIа цачIуну лу ц1ана цалчинни бувксса. Барчаллагь ва даву дан кабакьу бувсса Аьра­сатнал Чичултрал союзрайн, Дагъус­ттаннал Культуралул министерствалийн. Луттираву ккаккан бувну бур ХХ-мур ттуршукулул лажиндарай Кьиблалул Аьрасатнаву хъанай бивкIсса ишру: дяъвирду, революциярду, репрессияртту, депортацияртту. Хронология дайдихьлай дур 1916-ку шиная ва къуртал хъанай дур 2000-ку шиннардий. Луттираву ккаккан бувну бур тай шиннардий инсантурал бакIрачIан бувкIмур, миннал захIматсса кьадар. Буккултрал хьхьичI бацIлай бур захIматсса заманнайн тIайла бавцIусса мукьра никирал оьрму. Ми оьлуркъусса шиннардий цала яхIгу, къириятгу дурурччусса инсантал. Миннал кьадарданийну аьч хъанай бур жула хьхьичI та заманнул ишру, – увкуна Миясат Щайховнал, луттирая буслай.

Жанна Абуевал оьрмулиясса, творчествалиясса ихтилатру бувна Миллатрал библиотекалул хъунаманал хъиривмур Сарат Жабраиловал, «Эпоха» издательствалул къатлул директор Ххадижат Кураховал, Мариян Ильясовал цIанийсса «Дараччи» фондрал президент Гульшан Хасаевал, Дагъусттаннал халкьуннал чичу Хизри Ильясовлул, филологиялул элмурдал доктор Зулайхат МахIаммадовал, лакку мазрайсса «Зунттал хъами» журналданул редактор Аьжа Аьбдурах1мановал, шаэр, журналист ПатIимат Рамазановал, шаэр Камил Дадаевлул ва м.ц.

Цинявппагу ихтилатчитал кIицI лаглай бия авторнал ля­личIисса гьунар, интеллект, тIай­лашиву, марцIшиву, пахру-ххара дакъашиву.
Жанна бур Сурхай-ханхъал наслулул душ, хантуран лайкьсса узданшивугу, яхI-къирият ва тIул-тIабиаьтгу дусса.
Жаннал оьрмулул дус, чIярусса шиннардий органнаву зий цала тIайлашиврийну, марцIшиврийну бусрав хьусса ХIасанхIусайн дакIнийн утлатисса ихтилатру бувна ванал дустурал ва даврил уртакьтурал.

Жаннал шеърирду бувккуна Дагъусттаннал лакку мазрал учительтурал ассоциациялу модератор ПатIимат Аьлиевал, Ма­хIачкъалаллал 50-мур школалул 4-мур классрал дуклаки душ Диана Шиллаевал, ванин хас бувсса шеъри бувккуна маччачув, МахIачкъалаллал 8-мур школалул дуклаки оьрчI Магьди Абуевлул. Мажлис чIюлу бувна Дагъусттаннал халкьуннал артистка Загьидат Муслимовал балайрдал.
Миясат Муслимовал дуллуна Жаннан Дагъусттаннал Культуралул министерствалул чулухасса Х1урматрал грамота.
Ахирданий Жанна Абуевал ,цила кьини хъун дан бувкIсса цинявннахь дакIнийхтунусса барчаллагьгу увкуну, бахшиш бувна цила автографирттащалсса луттирду.

Андриана Аьбдуллаева

 

1