МахIачкъалалив, Гоголя кучалий, КъюкIлил азарду хъин дайсса центр тIивтIуну зувиллийхъайсса шинну хьуну дур. Агьалинал тIалавшиннарайн бувну, шиккува тIивтIуну бур дяхттасса стационаргу. Хьхьувай азарханалий бацIан сант дакъасса, ичIуваминнал къулагъас аьркин дагьлагьисса мушакъатсса инсантуран ва къулайсса кIану бур. ХIакиннал чивчусса дарувгу бувкуну, массажрая тIайла хьуну, цIуллушиву цIакь дансса личIи-личIисса процедурардугу бувну, ахттая чул хьуну махъ вай шаппай лагай.
Кьунияхъайсса шиннардий шикку зий бур ЧIяйннал шяравасса Мариян Шалласуева. Медициналул институт къуртал бувну махъ, 2003-ку шинал, къюкIлил азарду хъин дайсса пишакар хьунсса ординатурагу бувккуну, ва бувкIун бур зун КъюкIлил азардал центрданул дяхттасса стационарданийн.
– Укунсса кIанай зун захIматссархха, нигьабуслай бакъарав? – тIутIиминнахь Марияннул учайсса бур: «Бигьасса кIану бувагу къаччива», – куну. Ва бур цила давриву паччахIгу, лагъгу. Мяйжаннугу, къюкIлил азарду дусса инсантуращал зун цаягу духтурнан бигьану къабикIай, чIявучин ччангу къабикIай. Марияннив цила язи бувгьусса пишалийн хаин къавхьуну бур. Ва тачIавгу къулаймур кIану язи бугьлай, хайр бумур кIанттух луглай къабивкIун бур. ДакI хъинсса, цIими бусса, нахIу-хIалимсса Мариян къашайшалтран ххирасса бур, даврил уртакьтурачIагу ванил хIурмат хъунмасса бур. Марияннул лякъай гьарцаннансса дарув, нахIусса махъ, мюнпатсса маслихIат.
Ва хъунма хьуну бур шанма оьрчI бусса кулпатраву. Нитти-буттал чIивиния шихуннай душвавран ххуйсса тарбия дуллуну дур. Хъуними ссурваврахь бусласимур Марияннулгу гацIана лаласайсса бивкIун бур. Шалласуевхъал шанмагу душ яхI-къирият дусса, мяърипатрал бувччусса бур. Марияннул хъуними ссурвалгу цивппа бусса кIанай бусравну ва хIурматрай бур.
Мариян жула инсантуран хъинну бусравсса Шалласу Шалласуевлул душри. Жаваблувсса къуллугъирттай зузисса ппу унугу, Марияннул тачIав пахру-ххара, дакI хъуншиву къадайссар. Ва буссар мудангу цила кIулшивурттал даража гьаз бансса чаран ляхълай. КуртIсса кIулшивуртталгу, аьчухсса хасиятралгу бур ва лахъ буллай.
Мариян бур кIива оьрчIал нину. Вайннал тарбиялул ялувгу цIакьну бавцIуну бур. Шагьрулий хъунма хьусса бунугу, цинмагу кIулли лакку маз, оьрчIангу лахьхьин буллай бур.
Жул бакIралгу ххуйсса, аькьлулулгу бувччусса Мариян! ЛичIаннав ина оьрмулухун мукунма. ЧIивиссавагу байча къавщуна, лахъисса пишалул ххуллу битаннав, цумур-цагу захIматшиву дух дансса гуж булунннав. ЦIуллушиву дулуннав.
Марияннул хъин бувсса
къашайшалтрал чулуха
Ханича Аьлиева
