В. Путин: ХIурмат бусса аьрас­атлувтал! Аьзизсса дустал!

Мартрал 15-нний жула щала билаятрай тIитIинтIиссар бувчIавурттал участокру: бай­би­шин­тIиссар шанна кьинилул мутталий Аьрасатнал Президентнахлу чIурду буллай.
БувчIавуртту гьашину хъана­хъиссар мяйлчин, мунил чIалачIи дуллалиссар демократиялул паччахIлугърал агьамми принципирттавасса ца – бувчIавуртту чIумуя-чIумуйн дуллай бушиву. Миннул хIасиллал тIайланмасса асар биян бантIиссар ялун дучIансса шиннардий билаятрал лябуккулийн.
Ва агьамсса ва хъинну жаваблувсса ишри. Мунияту, па­ччахIлугърал цIанасса бакIчи хIисаврай, хIакьину зуйн лаизлай ура.
Жула билаятрай властьрал бакIщаращину хъанахъиссар так агьали. Ва хъунмур ихтиярданул хIучча цIакь бувну буссар Конституциялий. Ванил хъунмур мяънанугу хъанахъиссар так зу, Аьрасатнал инсантал.
Зун аьркинссар, укунма чIу булаву бакъасса, кьянкьану баян буван зула биялалул ва мурадирттал хIакъираву, цанчирча бувчIавуртту – му ялун нанисса чIумувунсса ша хъанахъиссар.
ДакI дарцIуну ура: зун бувчI­лай буссар цуксса къабигьасса чIун дуссарив цIана жула билаятрал, цуксса захIматсса вызовру дуссарив жула хьхьичI.
Миннуйн дагьайсса жавабру дулуншиврул, захIматшивуртту духлаган даншиврул, жунма аьркинни ттинияр тихунмайгу лагма лаган ва жуйва дакI дарцIуну бикIан.
Жува ттинингу чIалачIи барду цачIу бацIан шайшиву, Аьрасатнал тархъаншивугу, суверенитетгу, мюхчаншивугу, традициярдугу, тарихгу, культурагу, дуручлай. ХIакьинусса кьини жунма аьркинну бур язи бувгьуну нанисса ххуллия жард къаучин, жула мурадру бартбигьин.
Мунийн бувну, вай гьантрай чIярусса затру жуйнна гьарцаннайн хъарну дур. ТIайланма чинна: хIакьину бувчIавурттавух гьуртту шаву хъанахъиссар патриотшиврул асарду аьлтту бавуну. Му зат хъинну бувчIлай бур Донбассрал ва Новороссиялул ялапарчитуран, миннал захIматсса тагьарданий чIурду буллуссар референдумрай Аьрасатнал цашиврухлу. Вай гьантрайгу миннал булунтIиссар цала чIурду.
ЧIурду булунтIиссар фронтрайсса жула аьралитуралгу. Миннал, цала чувшиву, виричувшиву ккаккан дуллай, дуручлай бур жула Ватан, гьуртту хъанай бур бувчIавурттавухгу, жунма цинявннан эбратну бацIлай.

Аьзизсса дустал! Жува циняв чIявумиллатру бусса Аьрасатнал халкьру – ца хъунмасса кулпатру! Жува жула билаятрал къайгъулий буссару. Мунияту на зухь тавакъю буллай ура бувчIавурттайн бучIан ва зува язи увгьусса кандидатнахлу, жула аьзизсса Аьрасатнал ялун бучIантIимунихлу чIурду булун.