2024-ку шинал «Газпром газораспределение Дагестан» идаралул зузалтрал цIуну бивхьуну бур шяраваллава шяраваллавунсса газрал турбарду сайки 50 километралул манзилданий, республикалул шяраваллу газрал дузал даву мурадрай.

«Къатравун газ буцаву ттинингу диркIссар, ттинияр гихуннайгу личIлачIиссар компаниялул агьаммур давуну. Гьалбатта, уттигу буссар газ къабувцуну ливчIсса архсса кIанттурду, жу ттигу зий буру тиккунгу экологиялул чулуха марцIсса ччуччияну хъанахъисса газ буцинсса давурттаха», – увкунни компаниялул гендиректор Ризван Мурадовлул.
Дагъусттаннал ХIукуматрал председатель Аьбдулмуслим Аьбдулмуслимовлул, 2024-ку шинал Гъумучиял шяраву халкь кьамул буллалисса чIумал, бувсун бивкIссар пландалий ккаккан бувну бушиву 2026-ку шинайннин Дагъусттаннал 27 райондалул 211 шяравалу газрал дузал дуван, миннувух – Лакрал райондалул шяраваллугу.
ХIасан Аьдилов