Хасъсса аьралий операция байбивхьусса чIумал, Ватандалул мурадру буруччин хушрай лавгун, тай иширттаву ккаккан дурсса чувшивурттахлу бюхттулсса наградарттан лайкь хьуну ур ЧIяйннал шяравасса Шамил Аьлилов.
Хасъсса аьралий операция байбивхьусса чIумал ванан 44 шин диркIун дур, мунияту мобилизациялул буллалиминнавух ва къаувцуну ур. Амма Шамиллул яхIирал кьамул буллай къабивкIун бур Ватандалийх кьини дурксса, цува кунмасса жагьилтал дяъвилул цIараву талатисса чIумал, бакI бавхIуну щяикIан. СВО-лийн гьансса пикрилий ва увкIун ур военкоматрайн. Амма хушрай наниминнацIунсса тIалавшиннардайн бувну ва къаувцуну ур. Мунийну паракьат къавхьуну, цамур чаран ляхълан ивкIун ур. 2023-ку шинал Сахалиннай хушрай хасъсса аьралий операциялийн наниминнащал зузисса хъамитайпалул номер лявкъуну, оьвкуну бур. Укун увкIун ур Шамил Сахалиннайн, кIул хьуну ур цува кунма хушрай нанисса личIи-личIисса регионнаясса жагьилсса арамтуращал. Шамил усса 20-25 инсанная сакин хьусса взвод тIайла бувккун бур Владивостокрайн. Арх дакъа диркIун дур вайннал аьралий часть. Шикку контрактгу чирчуну, бивчуну бур «Шторм» роталувун. Ростов-на-Дону шагьрулийн бувцуну бувкIун, шичча Запорожскаллал направлениялий тIайла бувккун бур.
Укун агьну ур Шамил хасъсса аьралий операциялийн. Шикку цалчинсса гьантрайва захIматсса бигарду бартбигьлан багьну бур. Уттинин ласун къавхьусса позиция — вацIлул кIану, ласун амру бувкIун бур. Ва аьралийтурал хIал ххал банссагу иш хьуну бур. Командованиялул амру вайннал бартбивгьуну бур. Мунияр махъ вай бивтун бур Запорожскаллал направлениялийсса группардал командирталну. Та шин Шамиллун ва ванал аьралий дустуран хъиннура захIматсса хьуну дур. Вайннан украиннал аьралуннал яла гьужум буллалисса кIанттурдай бавцIуну, тайннал лавсъсса позициярду махъунмай зехлан багьну бур.Талай бивкIун бур захIматсса шартIирдай, дарщу-дарккусса, гъараллу дусса, бявкъусса март зурул гьантрай. Ваниннингу кIийлла щаву дирну ивкIсса Шамил, аьвкъу-гъили хьуну, гьутрурдал къашай хьуну ур. Ва хъин хьун тIайла уклай бивкIун бур, амма Шамил рязи къавхьуну, цалва цанма дарув-дарман буллай ивкIун ур. Цаппара зурдардий ва ивкIун ур щавурду дирми талатавуртту нанисса кIанттурдая буккан буллалисса группалий каялувшиву дуллай. Яла цIуллу-сагъшиврул тагьар захIмат хъанан диркIувкун, Шамил хъин хьун гьан уллан бивкIун бур. Му ппурттувугу къалавгун, цахъи махъ, отпуск лавсун лавгун, укунмасса инсантурансса азарханалий операция бувну бур.
Ватандалул мурадру буручлай ккаккан дурсса чувшиврухлу Шамил лайкь хьуну ур личIи-личIисса наградарттан. Хасъсса аьралий операциялий гьуртту хъанай хъунма хIал хьуннинма Обороналул министерствалул чулуха ванан дуллуну дур «За боевое отличие» медаль. Мунияр махъ ларсун дур «За отвагу», «За храбрость» медальлу.
Ца операциялуву Шамиллул группа гужсса битавурттахьхьун биривну бур. Душманнал гужсса цIу тIиртIуну, вацIлувун я буххан, я буккан къахъанай бивкIун бур. Эвакуациялул группалий каялувшиву дуллалисса Шамиллун, та цIаравух аьралийтал гьан бан къаччай, цува лавгун, уккан увну ур цал хIаписар, яла цамагу щавурду дирсса аьралийчу. Ва иширахлу ванан дуллуну дур Къучагъшиврул орден.
Бажар бусса, сант кIулсса Шамиллуйн мудангу захIматсса бигарду тапшур байсса бивкIун бур. Ва каялувшиву дуллай ивкIун ур кIива-шанма группа бусса гьужум бай бригадалий. НигьачIаву хъиннура хъуннасса кIанттурдайн, Шамил, аьралийтурал оьрмурду буруччаву мурадрай, цува лагайсса ивкIун ур.
Шамил буслай ур цукун ххари шайсса бивкIссарив аьралийтал мюрщи оьрчIая бувкIсса чагъардая.
– Ца ппурттуву ца шагьрулия бувкIуна гуманитар кумаг. Бия садикирттайсса мюрщи оьрчIаяссагу, дуклакки оьрчIаяссагу чагъарду ва барча буллалисса открыткартту. Арулла шин хьусса оьрчIал бия шприцру, бинтру, кисайлул парчри бивхьусса кьуцуру гьан бувну. ЧIиви оьрчIал бахшиш ттун асар хьуна. Яла на та оьрчI лявкъуну, дахIаву дав. Ниттил бувсуна арснан хъинну аьралийтал ххирашиву. Штурмовиктурал янна дуруххан данна танан тIий уссиявча, ниттил цила дурухханна тIий, къаивтунна. Жу ттигу цаннал цанначIан чичайссар, оьвчайссар. Дука-хIачIанмунил, лахха-ликканмунил жу дузалну бияв. ОьрчIаясса чагъардал ва бахшиширтталлив хъинну ххари байвав.
Яла захIматмурдив, ттула яруннил хьхьичI, ттула карунниву аьралий дустал оьрмурдацIа шаву бикIай, цIубутIуй ттуйна нава учIан къабюхълай икIайссияв, – тIий ур Шамил.
ЦIуллу-сагъшиврул тагьарданийн бувну, ва хасъсса аьралий операция нанисса кIанттурдая гьан увну ур. Аьралийтурал ттигу хIурматрай дакIнин утай аякьа дусса, цайва дакI цIуцIисса командир.
Шамил увну ур Къабардин-Балкьарнаву Терек тIисса шагьрулий, ЧIяйннал шяравасса Аьлиллул ва Айзанатлул кулпатраву. 10-мур классравун ияннин дуклай ивкIун ур Каспийскаллал школалий. 10-11-ми классру Терек шагьрулий къуртал бувну, увххун ур Пятигорскаллал Бизнесрал ва праволул управлениялул институтравун. Яла Каспийскалийн зана хьуну, цала производство тIиртIуну зий ивкIун ур. Ванал нину-ппу пандемиялул чIумал аьпалухьхьун лавгун бур. Шамиллул бур кулпат, кIива оьрчI.
Хасъсса аьралий операциялийн къауцлай бунува, цинявппа ххуллурду бувккун, Ватандалул мурадру буруччин лавгун, Шамиллул ккаккан бунни цува мяйжаннугусса патриот ушиву, ккаккан дунни зунттал чувнал чувшивугу, яхI-къириятгу. ЦIуллушиву дулуннав, Заннал урувччуну лякъиннав.
Андриана Аьбдуллаева
