Вай гьантрай Кострома шагьрулий хьунни «Голос РХБЗ» тIисса Щалагу Аьрасатнал фестиваль-конкурс.
Патриот конкурсрал фестивальданий гьуртту хьуну цалчинсса кIану бувгьунни хасъсса аьралий операциялий бурж бартбигьлай къучагъшиврий жан дуллусса Вагьаб Багьауттиновлул душнил Мисайл. Гьашину ва фестиваль шамилчинни дуллалисса. Кострома шагьрулул областьрайсса филармониялул сахIналий патриот балайрду увкунни, Ватандалухасса, вирттаврахасса шеърирду бувккунни, къавтIавуртту дунни Аьрасатнал 13 региондалиясса 100-ннийн бивсса гьурттучитурал. Буниялагу пахру бан лайкьсса иш бур, укунсса даражалул фестивальданий жула лаккудушнил хьхьичIунсса кIану бугьаву.
Ванил гьунарданун лавайсса кьимат бишлай, Аьрасатнал Федерациялул сенатор Светлана Кирилловал увкуна: «Мисай, вин хъунмасса барчаллагь. Ина цал уттигу исват бунни Дагъусттаннай гьунар бусса, итххявхсса ва ларайсса тарбия дусса оьрчIру бушиву. ЧIа тIий бура вин оьрмулуву хъунисса тIайлабацIуртту», – куну. Мисайл уттинингу республикалул ва мунил кьатIувсса конкурсирттай гьуртту хьуну, цимилгу хьхьичIунсса кIантту бувгьуссар.
Музыкалул искусствалул кIулшивуртту лахьлай бур Мисай МахIачкъала шагьрулул оьрчIансса 5-мур искусствалул школалий. Ттигъанну Мисай кьамул бунни Федерал ва региондалул даражалийсса дуклаки оьрчIал проектирдал презентацияртту давриха, куннал куннащалсса хIала-гьурттушиврул опыт кIибачIаврин хас дурсса давурттаха зузисса «Движение первых» тIисса суккушиндаравун. Шиккугу ва дуклаки оьрчIал дянив аьралийтуран кумаг баву мурадрайсса сиптарду дачин дуллай бур.
ЧIавасса оьрмулий хасъсса аьралий операциялул гьурттучитуран чялишну кумаг баврихлу ва жяматийсса иширттавух гьуртту шаврихлу Мисай лайкь хьуну бур Дагъусттаннал бакIчи Сергей Меликовлул чулухасса Барчаллагьрал чагъарданун.
КIицI къабувну битан къахьунссар, Мисайл ниттил Майсаратлул Ленинкант поселокрай «Zов героев» тIисса аьралийтуран гъилисса яннарду дурухлахисса цех тIивтIуну бушиву. Ва цехраву Майсарат бур аьралийтуран гъилисса гъухъри, ссурссу ларкьусса, дахьра ца лажин чIалачIисса куклусса кьяпри ва спальный мешокру бурухлай.
Ва чумартсса хъамитайпа хасъсса аьралий операция байбивхьуния шинмай дурухлай бур аьралийтурансса янна. Майсаратлун кумаг буллай, янна ттислай, кьукьлай, дурухлай ва мангъал дуклай бур ванил чIавасса душ Мисайгу.
Имара Саидова
