Пашанал душ Аьлиева Зурижат
Цавай инсантал бикIай дунияллий яргсса тIинттал кунма хъирив наниминнан ххуллу чанна буллалисса. Мукунминнавасса бия педагог, цилва пиша лавайну кIулсса, ххаллилсса инсан, Пашанал душ Аьлиева Зурижат.
Бувну бур ва 1956 шинал Лакрал райондалийсса ЧIурттащиял шяраву хъудугьултрал Пашанал ва Камилатлул кулпатраву. Ххюва оьрчI бусса кулпатраву ва цуппагу шамилчинмур бивкIун бур, школалий дуклакисса чIумала ва ниттин кумаг буллай бивкIун бур. Ччяни захIматрал кьадругу бувчIуну бур ванин.
Зурижат 1963 шинал ЧIурттащиял школалийн занан бивкIун бур. Кулпат арнил кIанттайн бизан бувайхту, ЦIуссачIурттащиял школалий 1971 шинал 8 класс марцI ххювардай къуртал бувну бур. Вара шинал Хасавюртливсса Педагогтал хIадур байсса училищалувун дуклан бувххун бур, 1975 шинал ЯтIул дипломращал зана хьуну бур буттал шяраваллил школалийн. ЗахIматрал оьрму байбивхьуну бур 1976 шинал математикалул учительницану. Гьантри, шинну най, цилла даву ххирассагу, кIулссагу вания райондалий ца яла хьхьичIунмур математикалул учительница хьуну бур.
Лавайми классирттал оьрчIал хьхьичIсса жаваблувшиннагу чIалай, цилла кIулшивуртту куртI дуван, 1976 шинал Дагъусттаннал пединститутрал математикалул отделениялийн заочнайну дуклан бувххуну бур. 1982 шинал тIайлабацIу буну къуртал бувну бур институт. Лаваймур категориялул педагог хьуну бур. Ванил дарсру хъинну усттарну, лавайсса даражалий дишайшиврул цIа ларгун дур. Зурижат Пашаевнал педагогнал гьунардания, бюхъулия, опытрая кказитирттай чичлан бивкIун бур, райондалул методикалул кабинетирттаву ванил дарсру дишаврил кьяйдарду лахьхьин дуллан бивкIун бур. Ва райОНО-рал штатрай бакъасса инспекторнугу зий бивкIун бур, 1986 шиная 2011 шиналнин тIурча – ЦIуссачIурттащиял 1-мур школалул директорнугу.
КIицI лаган аьркинни, ва каялувшиву дуллалисса педколлективраву зий бивкIшиву лак бакъассагу, чачан ва яруссагу. Ванил хIарачатрайну, коллективраву бавкьуну, хIурматрай зийгу, къуццу тIийгу бивкIшиву циняв миллат личIи къабуллай.
ЗахIмат ххирашиву, гъирарай зузаву, хьхьичIун лавсъсса мурадру барткъабивгьуну къабитайшиву – вай ванил хасиятрал цаппара лишаннур. МукьцIалла шинай математикалул учительницану, 25 шинай школалул директорну зий бивкIсса ванил хъунмасса бутIа бивхьуссар кIулшивуртту дулаврил даву дюхъан даврил ххуллий. Ванил учениктуравух бур аьлимтал, шяраваллил хозяйствалул хьхьичIунсса пишакартал, хIакинтал, учительтал. Вай циняв мудангу хIурматрай буслай бикIай цалва наставницая.
Зурижат Пашаевнал мудангу тIалавшинна дувайва учительтурая педагогнал цалчинсса правилалул хIурмат буну зун: «Ученикнан учительнал чIарав ххуйну, тIааьнну бикIан аьркинссар. Вихшалагу дуну». Дия ванил ябацIансса хасиятирттаву цамургу ххуйсса хасият: цилвамур кьимат кьюлтI буллай, цайминналсса гьаз буллалисса. Муниятугу ванил итталун, цачIу-чIарав агьманан асар къавхьуну къаличIайссия цува учIима, хьхьичIунма ушиву.
Ванил захIматран хIукуматралгу лайкьсса кьимат бивщуну бур. Ва бур «Дагъусттаннал лайкь хьусса учитель», «Отличник просвещения», дур чIярусса ХIурматрал грамотартту ва лишанну.
ЦIуминалийн бизан байхту, ва ЦIуссачIурттащиял школалий социал педагогну зий буссия. Зурижат Пашаевна архIал зузиминнал дянив бакъагу, щалвагу шяраваллил, райондалул агьалинал дянив бусравну, сийлий буссия. Ххуйсса тарбиягу дуллуну, чивун буккан бувссия кIия арс ва душ.
Лавгунни ва дунияллия педагогнал буржгу чIявучил дахIалай чинсса даражалий лавхъун, билаятрай Учительнал кьини кIицI лаглагисса, учительнал кьадру-кьимат гьаз буллалисса гьантрай. Заннал бувцунни аьрщарай учительну лявхъумур, ванил хIакьсса ххуллу-хха ягинну дакIурдиву личIанну. Махъва-махъмур ххуллийгума учительницал хIурмат бувну.
Шяраваллил жяматрал цIания жижара буллай буру ванил оьрчIахь: Аьлихь, Анвардухь, Айшатлухь ва цинявгу гъан-маччацириннахь. Цув Алжаннул ххари баннав, гьав нурданул дуцIиннав!
Хасаева Гульшан, ЦIуссачIурттащи
Ибрагьиннул арс Ихаев МахIаммад
Вай гьантрай Ихаевхъал кулпатрал ялун кьурчIисса хавар бивунни. Хасъсса аьралий операциялий къучагъшиврий жан дуллуну дур Ибрагьиннул арс МахIаммад Ихаевлул.
МахIаммад увну ур январьданул 6-нний 1985-ку шинал Ибрагьиннул ва Лариса Ихаевахъал кулпатраву.
Вайннал кулпат яхъанай бивкIун бур ТIюхчарав, яла бивзун бур Ставропольлал крайрайн. Мюрщими классирттаву МахIаммад дуклай ивкIун ур ГьунчIукьатIув. Ва пагьму бусса, дуккаврих гъира бусса оьрчI ивкIун ур.
Лавайми классирттаву дуклан лавгун ур Ставропольелийн. МахIаммад личIи-личIисса давурттай зий ивкIссар, ва яхI бусса, ссавур дусса оьрчI ия, захIматсса давурттаягу махъунай къашайва.
2011 шинал ванал кулпат бувссар, цанма хъинну ччисса, Билаллул душ Макьсудова Рамина бувцуссар. Вайннал бур кIива оьрчI – Сафия ва Жамал.
МахIаммад ия дакI тIайласса дус, даччин дакъасса, марцIсса инсан.
2025-ку шинал январьданий цала хушрай лавгун ур СВО-лийн.
Амма зана хьунсса кьадар чивчуну бакъахьунссия МахIаммадлун. Октябрьданий МахIаммад хасъсса аьралий операциялий кьурван хьусса хавар Ихаевхъал кулпатрал ялун бивунни. СВО-лий аьралий гьалмахтурал ванал хIурмат хъунмасса бия. ДакIнийхтуну бартбигьлай уссия аьралий буржгу.
МахIаммадлущал архIал къуллугъ буллай, талай бивкIминнал дакIурдиву личIантIиссар анжагъ яла чаннами, яла хъинми дакIнинбичавуртту. Ва ия ххаллилсса саллатI, хIакьсса талатала, вихшала дишин лайкьсса дус.
МахIаммад дунияллия лагаврил кьурчIишивугу кIидачIлай, дакIнийхтуну жижара буллай буру ванал нитти-буттахь, кулпатрахь, оьрчIахь, мачча-гъанминнахь, агьлу-авладрахь.
Алжан нясив баннав, рухI хъинний дишиннав, махъминнал оьрмурду лахъи баннав.
ГьунчIукьатIрал ккурандалул чулуха
ХIажибутта ХIусайнов
Алхулавл душ Ххадижат Рамазанова
Оьрмулул 95 шинаву жуятува личIи хьунни Ккуллал шяравасса ххаллилсса инсан Ххадижат Рамазанова.
Буттал кIанттул цIанийсса Хъунмасса дяъвилул шиннардий хъунмасса захIмат бувсса, жяматраву цила цIа бусраврай кьариртсса инсан бия Ххадижат.
Оьрмулул 14 шинаву школагу кьабивтун, ва лавгун бур Гьарун Саэдовлул цIанийсса Ккуллал колхозраву дояркану зун. Арулла шин дурну дур микку зий.
Цила ласнащал ХIасаннущал ванил хъуни бувну бур ряхва оьрчI. Циняв дуккингу бувну, кулпатирттал бувну махъ, ва оьрчIал оьрчIал тарбиялул ялув бавцIуну бия. Хъамал ххирасса ХхадижатлучIа тачIав бухху-букку чан къашайва. ВаничIа хъамалу къавхьусса инсан акъахьунссар Дагъусттаннай. Ванил бивхьусса ччатI цIанагу чIявуссаннан дакIний бур.
Ххадижат аьпалул шаврил кьурчIишиву кIидачIлай, жижара буллай буру оьрчIахь, оьрчIал оьрчIахь, махъсса циняв гъан-маччанахь.
Имандалий лавгун лякъиннав, алжаннул ххари баннав, махънал оьрмурдай барачат бишиннав.
Ккуллал жямат
