МахIаммадлул арс Маммаев МахIаммад-хIажи
Май зурул 18-нний Вихьуллал шяраву хьунни чIявусса инсантурал дакIурдиву пашманшиву хIасул дурсса бивкIу. Ккуллал, Лакрал ва Къизлардал даралуву яхъанахъисса лакран ахиратрал хьума ххуйну кIулссия.
МахIаммад-хIажи увссар Вихьуллал шяраву 1943-ку шинал. Ванал ппу МахIаммад Хъун дяъвилия зана къавхьуссар. МахIаммад ниттил увну 40 гьантта лавгсса чIумал, вайнначIан Хъун дяъвилий Ватан дуручлай буттал жан кьурван дуршивруя бусласисса извещение дуркIссар.
МахIаммадлул цал Вихьуллал шяраву къуртал бувссар дянивмур даражалул школа, яла, армия лавхъун махъ, дуклан увхссар Дагъусттаннал университетравун филологиялул факультетрайн. Ми диркIссар 1960-ку шинну. Университетраву тай шиннардий ихтияр дуллуну диркIун дур чил мазурдива аьрабналмур мазгу лахьлансса. МахIаммадлул язи бувгьуну бивкIун бур аьраб маз. Яла махъ цала аьрабнал мазрал чулийннайсса кIулшивугу ванал хъиннура гьарза-гьарта дурссар. Бусурманнал диндалул тIалавшиннардугу биттур дуллай, кьулгьу-кьуран биялну кIулсса инсанну хьуссар. Лавгссар ва хIаж бангу. Мунияту ванайн яла МахIаммад-хIажи, куну учайссия.
Университет къуртал бувну махъ ва зий ивкIссар оьрус мазрал ва литературалул дарсру дихьлай Лавашиял райондалий Арши тIисса шяраву, Къизлардал райондалий Большой Бердихин тIисса шяраву. Бердихиннайсса школалий зий унува, ва шяраваллил мизитрал имамнугу зий ивкIссар. Гиха зана шайхту, зий уссия Вихьуллал шяраву учительну. Цаппара шиннардий Вихьуллал шяраваллил мизитрал имамнугу. Махъсса шиннардий зий уссия Лакрал райондалийсса Хъунайннал шяраву ва Ккуллал райондалийсса ЦIийшиял шяраву.
МахIаммад учительнал касму лархьхьусса инсан ивкIнугу, ванаву бия Аллагьналва буллусса цаймигу гьунарду. Ванал ххуйну дишайва суратру, чичайва шеърирду ва хаварду. Амма ми чийвун буккан къабайва. Ламус ххишаласса инсан ия. Ванал хъирив, ва цачIана бивкIулийн ягу мавлудрайн уцин, щархъаягу машинартту бучIайссия. Ванал такьвагу хъинну кIукIлусса, чIаравминнавун шавкь дутлатисса дикIайва. Цувагу дакI хъинсса, щищалчIав цукунчIавсса рит-ххитлил зумунусса ихтилат ва бястру къабувайсса, аькьлу-кIулшилул авадансса зунтталчув ия. Кулпатирттаву хьусса бувчIу-къабувчIавурттугума ванаща щаллу дуван ца чулийн дутан бюхъайва.
МахIаммад-хIажинал ва ванал кулпатрал Аьйшал дянив хьуну ия кIия арс ва шанма душ. Арсру, кулпатру буваннинма, апатIру нясив хьуну, ахиратравун лавгуна. Душру, щар хьуну, цала-цала кулпатирттащал яхъанай бур.
МахIаммад-хIажи ахиратрал шаврил кьурчIишиву кIидачIлай буру ванал кулпат Аьйшахь, душваврахь Мадинахь, Марияннухь, Магфиратлухь, ссу СалихIатлухь, уссурвал Мусахь, Булатлухь ва махъсса цинявппагу гъан-маччаминнахь.
Яраппий, я Аллагь, ина паракьат хьусса кIанай нур дизаннав, хIавтI паммалул шануну хьуннав. Ина жун муданагу шяраваллил ххаллилсса инсанну дакIурдиву личIантIиссара. Амин!
Вихьуллал жяматрал цIания ХIажимурад ХIусайнов
МахIалил душ ХIаммадова Уммугьани
Уттигъанну оьрмулул 92 шинаву аьпалухьхьун лавгунни халкьуннан кIулшивуртту дулаврил ххуллий хъунмасса захIмат бивхьусса, ххаллилсса учитель ва тарбиячи, Гъумучиял шяравасса ХIаммадова Уммугьани МахIалил душ.
Бувну бур Уммугьани 1934-ку шинал май зурул 10-нний Гъумук, МахIали ва Аьйшат Хучраевхъал кулпатраву. ЗахIматсса дяъвилул шиннардийн тIайла дарцIуну дур ванил оьрчIшиву. 1942-ку шинал Калуга шагьрулия ххюва мюрщисса оьрчIал ялату дяъвилийн увцуну ур ппу. Му ппурттуву вайннал кулпат тийх ялапар хъанай бивкIун бур. Ласная чагъарду къабукIлан бивкIукун, нину, оьрчIругу бувцуну, Дагъусттаннайн, цила ватандалийн, бувкIун бур. Ялапар хъанай бивкIун бур Хасаврай гъанчувначIа. ЗахIматсса оьрчIшиврул шиннугу ларгун, пиша лахьхьин аьркинсса чIун дуркIукун, Уммугьанил учительнал пиша язи бувгьуну бур. 1953-ку шинал ва бувххун бур Хасавюртуллал педагогикалул училищалувун. Му къуртал байхту, тIайла бувккун бур зун ЦIуссалакрал райондалийсса ТIюхчардал шяравун. Арулва класс бусса ТIюхчардал школалий байбихьулул классирттаву дихьлай бивкIун бур оьрус мазрал дарсру.1961-ку шинал щар хьуну бур. ОьрчIру бувну махъ, зийгу бунува, ларайсса кIулшивуртту ласунсса гъирарал заочнайну бувххун бур Грознайлийсса Педагогикалул университетравун. Уммугьани зий бивкIссар ТIюхчардал школалий 1998-ку шинайннин. Ванил хIурмат хъунмасса бия архIал зузиминнал, дуклаки оьрчIал ва миннал нитти-буттал дянив.
КIулшивуртту дулаврил ххуллий бивхьусса захIматрахлу ва лайкь хьуну бур «Отличник народного просвещения», «ЗахIматрал ветеран» тIисса бусравсса цIардан. Уммугьани бия цила пиша ххирасса, оьрчIах ччаву дусса хIакьсса педагог, ххаллилсса нину, бия дакI хъинсса, хIал бавкьусса инсан. Иман-Аьлил ва Уммугьанил 65 шинай цачIу оьрму бувтун бур. Уммугьани мудан дакIний бикIантIиссар оьрчIан, оьрчIал оьрчIан, цинявппагу кIулминнан.
Уммугьани аьпалул хьусса кьурчIишиву кIидачIлай, жижара буллай буру оьрчIахь, оьрчIал оьрчIахь, махъсса гъан-маччанахь. Имандалий лавгун хьуннав, алжаннул ххари баннав, махъминнахьхьун цIуллушиву дулуннав.
ТIюхчардал жямат
Аьбдуллагьлул душ Башанаева Банакусум
Вай гьантрай оьрмулул 92 шинаву аьпалухьхьун лавгунни, ххаллилсса хъамитайпа, бусса оьрмулий заводрай зий, ларайсса ккаккияртту чIалачIи дурсса инсан, Хъун дяъвилул ятин, Хьурттал шяравасса Банакусум Башанаева.
Бувну бур Банакусум 1934-ку шинал Хьурттал шяраву, Аьбдуллагьлул ва Аьжал кулпатраву. Ванил ппу, ххюва мюрщисса оьрчIал ялату дяъвилийн увцуну, зана къавхьуну ур. Ппу дяъвилийн увцусса чIумал Банакусумлун 7 шин диркIун дур. Ва дуклай бивкIун бур Хьурттал байбихьулул школалий. Шикку мукьва классгу бувккуну, гихунмай Гъумучиял дянивмур даражалул школалий дуклай бивкIун бур. Амма ванин дуккаву кьаритан багьну бур, ххюва оьрчI ччаннай бацIан буллалисса ниттин кумаг булланшиврул.
1948-ку шинал зун бивкIун бур Буйнакскаллал трикотажный фабрикалий. Укун, оьрмулул 14 шинаву байбивхьуну бур ванил захIматрал ххуллу.1960-ку шинал, щар хьуну, МахIачкъалалив бивзун бур. Шикку зун бивкIун бур «Стекловолокно» заводрай. Оьрмулул чIяруми шиннугу шикку зий ларгун дур. ЗахIмат ххирасса, жаваблувсса, зат лаласайсса Банакусумлуя ца-кIива зурува мастер хьуну бур. Утти ва цинма кIулмур цIуну бувкIминнан лахьхьин буллан бивкIун бур.
Банакусум лайкь хьуну бур Коммунист захIматрал медальданун. Кьамул бувну бур коммунистътурал кьюкьлувун. ЧIал къавхьуну бувчIуну бур заводрал парткомрал членну. 1973-ку шинал — партиялул райкомрал членну, ца шинава — партиялул горкомрал членну. Мура шинал ванин дуллуну дур ЗахIматрал ЯтIул Ттугълил орден. 1976-ку шинал КПСС-рал 25-мур съездрал делегатну бувчIуну, Дагъусттаннал делегациялущал Москавлийн лавгун бур. Съездрая зана хьуну махъ бувчIуну бур Дагъусттаннал КПСС-рал обкомрал бюрорал членну. АцIра шин дурну дур микку.
1981-ку шинал Банакусумлун дуллуну дур Октябрь революциялул орден. Мунияр махъ ва лайкь хьуну бур ДАССР-данул Верховный Советрал Президиумрал чулухасса ХIурматрал грамоталун. Цила захIматрайну ва хIарачатрайну лахъсса даражалийн лавхъсса хъамитайпа бия Банакусум. Ванил бувтссар хъинну чIявуссаннан эбратрансса оьрму.
Банакусум аьпалул шаврил кьурчIишивугу кIидачIлай, жижара буллай буру цинявппагу ванил гъанчувнахь. Алжаннул ххари баннав, рухI бигьаний дишиннав, махъсса цинявннал оьрмурдай барачат бишиннав.
Хьурттал, ШавкIуллал ва ЧIяйннал жяматирттал цIания Шамил Кьурбанов
