Анаслул арс Роман Аьбдуллаев

Вай гьантрай, оьрмулул аргъираву, хар-хавар бакъасса бивкIулул жуятува личIи унни ГьунчIукьатIрал шяравасса Аьбдуллаев Роман Анаслул арс.
Шяраву школа къуртал бувну махъ, Дагъусттаннал политехнический институтгу бувккуну, Роман зий уссия МахIачкъалалив цала пишалий. Яла, махъ, лархьхьуну ювелирнал касмугу, зий уссия му касму дургьуну. Царай эмаратсса затру дайва Романнул мусия дикIу, арцуя дикIу. Хъинну усттарсса, «мусил кару» дия ванал. Вай дакъассагу, Романнул дукъавайсса даву дакъая, строительнал ччимур даву саргъунну, усттарну дайва.
Роман цувагу цума-цаннащал ххишала бакъа хIал бавкьусса инсан ия. ТачIав чIу лахъ бувну къаккаккайва, дакIнил ххуйсса, инсаннал чIарав ацIан хIадурсса, гъан-маччами, лагма-ялттуми ххирасса, цинявннангу хъинну бусравсса инсан ия. Цала кулпат Фаризащал архIал, хъунигу бувну, чивун буккан бунни кIия арс ва душ.
Роман ахиратравун лагаву ххишала бакъа кьурчIисса хавар хъанай бур кулпатран, оьрчIан, гъан-маччаминнан бакъа, щалагу шяраваллил жяматран.
Хъуннасса кьурчIишиву кIидачIлай, жижара буллай буру кулпатрахь Фаризахь, арсурваврахь МахIаммадлухь ва Анаслухь, душнихь Анжелахь, уссурваврахь Аьбдуллухь, Аьлихь ва АхIмадлухь, ссурваврахь Татьянахь, Светланахь, Марианнахь ва Людахь, цинявппагу махъсса мачча-гъаннахь.
Цал бунагьирттал аьпа баннав, алжан нясив баннав, махънал оьрмурдай барачат бишиннав! Ва кьурчIишиву духIансса ссавур цинявппагу гъан-маччанахьхьун, лагма-ялттуминнахьхьун дулуннав!

ГьунчIукьатIрал
жяматрал цIания
Зиябуттин ХIажимирзаев