Къалла-ХIусайннул душ ХIусайнова ПатIимат
Оьрмулул 77 шинаву жуятува батIул хьунни Карашатусса ХIусайннул душ ХIусайнова ПатIимат.
ПатIимат бувну бур 1947-кусса шинал Карашрал шяраву. Оьрмулул ххюра шин хьусса чIумал нитти-буттащал архIал бивзун бур МахIачкъалалив. Шикку бувккуну бур шагьрулул дянивсса даражалул 13-мур школа. Ташулул хьуну мукьах яхъанай бивкIун бур Щурагь. КIиккува ПатIимат бувххун бур Буйнакскаллал кооператив техникумравун ва тIайлабацIу буну къурталгу бувну бур му 1972-кусса шинал.
Цила оьрмулул дус Баширдущал архIал ванил бувтссар талихIрайсса, тирххандарайсса оьрму. Вайннал дянив бивзссар ххюва лайкьсса наслугу.
ЧIярусса шиннардий ПатIимат зий бивкIссар Буйнакскаллал Горторграй. Цищала зузиминнал дянивгу, цила агьулданул ва щарнил жяматрал дянивгу ва бикIайссия кьадрулий, кьиматрай.
ПатIимат аьпалухьхьун лагаврил пашманшивугу кIидачIлай, дакIнийхтунусса жижара буллай буру ласнахь Баширдухь, душваврахь, арсурваврахь ва махъсса цинявппагу уссур-ссуннахь, гъан-маччаминнахь. Цил бунагьирттал аьпа баннав, рухI рахIатний дишиннав, алжаннул ххари баннав.
Карашрал жямат
МахIаммад хIусайннул душ Будайчиева Аьбидат
Мартрал 21-нний аьпалухьхьун лавгунни СунбатIуллал шяравасса МахIаммадХIусайннул душ Будайчиева Аьбидат.
Аьбидат бувссар 1937-ку шинал МахIаммад-ХIусайннул ва СалихIатлул кулпатраву. Ва душ бакъа вайннал цамур оьрчI-душ бакъассия. Аьбидатлул ппу Буттал кIанттул цIанийсса Хъун дяъвилия зана къавхьуссар.
Аьбидатлул оьрму бувтccар «адаминал мухIлугу лялух дархIуну». Ванил Москавлив ххуйсса кьиматирттай къуртал бувссар Библиотечный институт. Ванил дарс къадирхьусса, цила даврил кIулшивуртту къадуллусса библиотекарь Ккуллал райондалий акъассар.
Цал Ваччав райондалул библиотекалий, яла 1967-ку шиная шинмай СунбатIуллал библиотекалул хъунмурну зий буссия Аьбидат. 2001-ку шинал ванин дуллуссия «Дагъусттаннал магьирлугърал лайкь хьусса зузала» тIисса цIа. Му дакъагу, Культуралул министерствалул ва райондалул чулухагу дуллуссия 12 хIурматрал грамота. Аьбидат бия агьалинал, буккултрал дянив хIурмат бусса хъамитайпа.
Цил аьпа баннав, рухI хъинний дишиннав. Аьбидатлул бивкIулул кьурчIишиву кIидачIлай, алхIам ккалай ура жула СунбатIуллал жяматрахь ва райондалул циняв библиотекартурахь.
СунбатIуллал жяматрал цIания МахIмуд Аьлилов
